Partida populara gudogna diesch sezs – Center perda sis sezs

La Partida Populara ha gudagnà questas elecziuns. En il futur è ella represchentada cun 35 persunas en il Cussegl grond. Il Center perda – sper in sez en la Regenza – sis sezs en il parlament. Uschia n’è el betg pli la fracziun la pli ferma. Terz gronda fracziun è la PLD.

Il cunfin da 3 % per vegnir en il parlament adempleschan tut las partidas. Tut las partidas han almain tschintg sezs ed han uschia fermezza da fracziun. La participaziun a l’urna ha muntà a 47,9 % – cun in spectrum da var 40 fin 67 %.

38 dunnas ed 82 umens

La statistica da panaschar da la chanzlia chantunala mussa il suandant: La PPS ha surtut pudì «engular» vuschs da la PLD e dal Center. Tar las partidas sanestras ha surtut la Verda pudì ir per vuschs da la PS – tschintg pli pauc per la PS, tschintg dapli per la Verda. La PS e la Verda han enfin ussa furmà ensemen ina fracziun. Las vuschs èn pia restadas en il medem champ.

38 dunnas ed 82 umens represchentan ils circuls electorals a partir dal proxim avust en il Cussegl grond. La quota da dunnas è vinavant tar circa in terz.

Tranter auter èn las candidatas ed il candidat da la Regenza betg elegids – Aita Zanetti, Nora Saratz Cazin e Maurizio Michael – puspè vegnids reelegids en il Cussegl grond.

Trumpada tar il Center

Per il president dal Center Grischun, Kevin Brunold, n’èra oz betg in bun di: «Igl è ina trumpada per nus che nus avain sis sezs pli pauc.» Perder sis sezs en il parlament e betg pli esser la fracziun la pli ferma fetschia mal. Surtut trist saja el per las persunas che n’èn betg vegnidas reelegidas. In motiv per il resultat nausch saja tenor el l’iniziativa da 10 milliuns – quella haja tratg bleras persunas dretgas a l’urna.

Il proxim temp stoppia il Center dentant pigliar sut la marella ils resultats: «Nus stuain guardar tge che nus avain fatg falladamain e tge che nus savain far meglier ils proxims onns», ha Kevin Brunold ditg envers RTR.

Plaschair tar la Verda e la PPS

Pli grond è il plaschair tar la Verda: Ins haja cuntanschì la finamira dad avair fermezza da fracziun – in grondius sentiment, uschia la presidenta Anita Mazzetta: «Quai è super, quai era propi la finamira principala che nus avain gì.» Ussa ch’els èn in’atgna fracziun possian els far lur atgna politica ed i vegnia prendì enconuschientscha dad els sco Verds. «Quai vegn a rinforzar nossa partida fermamain», ha ella ditg envers RTR. I saja grev da dir pertge ch’els hajan pudì gudagnar tschintg sezs, els hajan empruvà da far ina buna lavur, hajan gì blera preschientscha ed ina campagna pli frestga.

Ed il pli grond è il plaschair tar la PPS. Sco ch’il president, Roman Hug, ha ditg, hajan ins tschernì ils dretgs temas – per exempel segirezza. «Nus avain sentì sin via che la glieud vul realisar noss temas.» El haja il sentiment che la glieud sa fida era da la PPS e ch’ella po realisar quests temas.