Tanter plaschair e displaschair

Grondas emoziuns e qualche surpraisas. Las elecziuns da dumengia passada han pisserà in tuot il chantun per tensiuns, plaschair ed eir displaschair. Uschea per exaimpel eir i’ls circuls electorals da Suot Tasna e Ramosch. Quia haja dat ouravant tuot duos victurs ed üna chi ha trat la cuorta.

Success per Duosch Fadri Felix

Illas elecziuns da dumengia passada ha Duosch Fadri Felix dal PLD procurà per ün retuorn i’l Grond cussagl. Quai davo ch’el vaiva pers quist sez avant quatter ons cunter il PS. Cun 347 vuschs ed il terz meglder resultat es el darcheu gnü elet e das-cha ir da­nouvamaing a politisar a Cuoira. Quai sper Reto Rauch dal PPS cun 607 vuschs ed Aita Zanetti dal Center cun 613 vuschs.

«Cler ch’ün pêr vuschs daplü füssan stattas amo bel da surgnir, quai es adüna uschea. Però per finir es il resultat quel chi’s douvra per gnir elet e perquai han quellas 940 vuschs cha nus vain surgni sco parti eir bastü. E da quellas pudain nus esser propa superbis cha nus vain fat uschè bleras vuschs tuots insembel», manaja Duosch Fadri Felix ün di davo sia reconquista.

Sconfitta per Aita Biert

Plaschair pro’l PLD, intant displaschair pro’l PS. Eir scha’l parti socialdemocratic vaiva avant quatter ons guadagnà il sez dals liberals plütöst in möd surprendent, es la malavita davo las elecziuns listess magara gronda pro la deputada in uffizi Aita Biert: «Eu d’eira trista e dischillusa. Eu n’ha propa stuvü cumbatter eir cullas larmas. Eu vess gugent rapreschantà l’Engiadina Bassa amo üna jada per quatter ons.»

Da sia prestaziun politica nun haja mancà, manaja Aita Biert plünavant, forsa magara da sia preschentscha dürant il cumbat electoral. Causa motivs da sandà nun ha ella pudü esser uschè preschainta a tantas occurrenzas sco giavüschà. Cha a tuottavia saja però dad acceptar la decisiun e ch’ella resta eir inavant activa illa politica. Ma na sco politicra svessa, dimpersè sco uman critic chi perseguitescha la politica.

Eir il PLD perda ün sez

Plü pac plaschair ha il nouv elet Duosch Fadri Felix eir dal resultat i’l circul da Ramosch. Quia nun ha il PLD plü pudü tegner il sez liberal sco fin quia. Cun 260 vuschs guadogna il president cumünal da Samignun, Daniel Högger dal PPS l’unic sez i’l circul.

«Quai es propa puchà», manaja Duosch Fadri Felix analisond il resultat. «Ils liberals d’eiran plü bod fich ferms in Engiadina Bassa, ma il trend muossa in ün’otra direcziun.» Üna buna collavuraziun insembel sainza politica d’opposiziun, quai es quai cha Duosch Fadri Felix as giavüscha da quinderinavant. Ouravant tuot cul sez chi va uossa a favur dal PPS ed eir in vista al grond guadogn dal parti popular in general i’l Grond cussagl ed il sez illa Regenza.

PPS cun nouva fatscha

Per Daniel Högger s’inclegia quai da sai. Il president cumünal da Samignun politisescha inamöd in prüma lingia «sco uman e na sco commember d’ün parti politic» e cha perquai saja l’algrezcha güsta tant plü gronda. «Eu n’ha grond plaschair ch’eu sun gnü elet. Eir pervi da quai ch’eu nu savaiva co valütar mias schanzas i’l cumün da Valsot.»  

Eir il fat cha seis agen parti – al qual es el commember pür daspö raduond ün mez on –  ha gnü ün tal success til fetscha ourdvart grond plaschair, impustüt l’elecziun da Valérie Favre Accola. «Eu chat fich important cha Valérie Favre Accola es gnüda eletta illa Regenza. Listess che partits politics, in ün gremi da tschinch nu po quai simplamaing na esser ch’ün parti ha trais sezs.»

Plaschair e displaschair sun dimena fich daspera in üna regiun ingio chi nu vain be elet partits politics, dimpersè eir persunas.