La colligiaziun veglia a Soliva svanescha

Avon sis onns ha la vischnaunca erigiu ina nova punt a Mulins ella val che sparta Curaglia e Soliva. 85 000 francs ha ella schau custar quella. Il motiv: L’aura dalla Val Plattas caschunava adina puspei donns ella val, era vid la punt. Cun construir ella empau pli ad ault ha la vischnaunca sperau da saver sligiar il problem.

La via veglia si Soliva

Mo igl ei vegniu auter che spitgau. Danovamein ha il flum menau bia material. «La davosa ga ei quei stau il flum dalla Val da Soliva. Quella ei vegnida cun massa crappa che ha disfatg igl entir territori da Mulins», di il president communal Claudio Simonet. Parallelmein ha la vischnaunca constatau moviments dil terren ella costa encunter Curaglia. «Quei terren spundiv seruschna. Consequentamein ei la punt setratga. Nus havein lu schau intercurir la spunda d’in biro specialisau. Sin fundament dils resultats ha quel cussegliau a nus da serrar la via e da spazzar la punt», declara Claudio Simonet. Cun auters plaids vul quei dir ch’ei dat negina punt pli per traversar il flum a Mulins. «Quei vul denton era dir che nus stuein serrar la Senda dils senns sin quei tschancun ed il medem mument era la via veglia da Curaglia a Soliva», di Claudio Simonet. L’jamna vargada han collaboraturs dil menaschi tecnic dalla vischnaunca da Medel entschiet cullas lavurs da spazzar la punt.

Senda dils senns els Piogns

Che la punt sto vegnir spazzada e la via serrada a Mulins ha era consequenzas per la Senda dils senns. Entochen ussa menava quella da Curaglia sut la resgia viaden ella val. «Da niev meina ella silla via forestala sper la resgia si e lu dil trutg viaden els Piogns. Da leu naven eis ella lu puspei sil tschancun original che meina si Biscuolm», di Claudio Simonet. Denter Mulins e Piogns sesanflavan dus posts dalla Senda dils senns. «Quels ein vegni remplazzai. La senda cuntegn aunc adina dudisch posts. Da niev entscheiva e cala la senda sur la resgia», di il president communal. Pli cuorta vegn la senda buca pervia da quella correctura. Las tablas dils dudisch posts ein vegnidas remplazzadas ed ils differents posts ein vegni migliurai. «Quei ha custau rodund 20 000 francs, mo ussa ei tut pli professiunal», di Claudio Simonet (mira era box).

Impurtonta colligiaziun

Igl onn 1985 ha la construcziun dalla via da meglieraziun da Curaglia a Soliva entschiet e treis onns pli tard eis ella vegnida catramada. Cheutras han vischinas e vischins digl uclaun retschiert ina nova colligiaziun adattada era per scadin vehichel. Avon che quella via vegni baghegiada menava la via da Soliva naven da sur il vitg da Curaglia ella val a Mulins e da leu siadora egl uclaun. «La via veglia enta Mulins e dalla spunda teissa siadora si Soliva era plitost ina via crucis. Onns da grondas plievgias e draccas vegnevan punts, piogns e vias lavai naven dallas undas ed ei restava mo ina grava. Aschia ei culs onns tut vegniu destruiu giu Mulins: Il mulin da Pieder Lutz, il nuegl, in grond toc prau e pli tard in clavaziel. Aunc ils onns 1927, 1954 e 1987 ein las vias e las punts daventadas unfrendas dallas auas furibundas. Tgi che carrava cun in motor agricol da quella via si e giu stueva savens star eri per saver seperschuader, schebein las rodas da siu vehichel seigien aunc en via.» Quei san ins leger el cudisch Val Medel, cumparius 1996. L’entschatta dils onns 1930 vivevan aunc quater famiglias cun 21 persunas a Soliva. Oz ha Soliva gnanc in pugn plein habitontas e habitonts.