Dus novs lufs-tscherver en Surselva

Ina maioritad dal parlament grischun è la mesemna s’exprimida per metter ora dus lufs-tscherver en la Surselva. Quels duain remplazzar ils trais lufs-tscherver sajettads per sbagl en Surselva. Il deputà Gian Derungs ed il deputà Walter Grass n’han betg pudì impedir quest pass cun lur intervenziuns.

La raschun ch’il parlament grischun ha insumma discutà il mardi e la mesemna durant pliras uras cun radund 20 votums davart ils lufs-tscherver èn stadas duas intervenziuns. Il deputà sursilvan partent Gian Derungs (Center) ed il deputà dal PPS Walter Grass vulevan impedir ch’il Chantun remplazzia ils trais lufs-tscherver ch’èn vegnids sajettads per sbagl d’in guardiaselvaschina durant la chatscha da lufs l’onn 2024 en Surselva.

Il parlament n’ha dentant betg acceptà las intervenziuns. Cun 70 cunter 41 vuschs ed ina abstenziun èn deputadas e deputads s’exprimì cunter Gian Derungs. E cun 73 cunter 37 vuschs n’èn ils deputads e las deputadas era betg entrads sin la proposta da Walter Grass. Cun questas decisiuns vegn defendida la posiziun da la Regenza da vul recolonisar ils lufs-tscherver.

Betg prendì serius ils quitads da puras e purs

Gian Derungs ha declerà: «Dapi onns cumbatta il Grischun, sustegnì da tut las partidas burgaisas, per ina regulaziun correcta dals animals da rapina gronds. Las tensiuns tranter l’agricultura ed ils animals da rapina gronds èn bain enconuschentas a tuttas e tuts.» Dad ussa metter ora novs animals da rapina gronds dettia l’impressiun ch’ils quitads da puras e purs na vegnian betg prendids serius.

Il luf-tscherver vala sco periclità

Il spezial vi da questa decisiun: Ils Liberal­democrats (PLD) ed ils Verdliberals (PVL) han en quest cas sustegnì la posiziun da la Regenza e betg la proposta da lur collegas burgais. Il deputà partent Tarzisius Caviezel (PLD/Tavau) ha argumentà en la debatta: «I va en quest cas mo per restabilir il stadi oriund e tras quai cumpensar ils lufs-tscherver ch’èn vegnids sajettads per sbagl.» Ils culps fallads hajan procurà per ina gronda sensaziun naziunala ed internaziunala. «Il luf-tscherver vala sco ferm periclità e la protecziun da spezias d’animals periclitads stat scrit en la lescha.»

In dal Giura ed in da las Carpatas

Era la deputada Géraldine Danuser (PVL/Cuira) era d’in sumegliant avis. «A mai para che las reacziuns sin questa mesira èn per part pli grondas che la mesira sezza», ha ella ditg faschond allusiun a la lunga durada da la debatta. «Cun la recolonisaziun vegn rinforzada la diversitad genetica da la populaziun dals lufs-tscherver. Ina populaziun sauna è era en l’interess d’in ecosistem che funcziuna.» Il luf-tscherver gidia a regular effectivs da chavriel e chamutschs e sustegna uschia la regiuvinaziun dal guaud.

La consequenza da la decisiun dal Cussegl grond: Il Chantun metta uss ora sco planisà in luf-tscherver dal Giura ed in da las Carpatas en Surselva. Quels ston però l’emprim vegnir tschiffads en las regiuns numnadas.