Ingün tun dadour il nair
La Festa federala da tir a Cuoira e contuorns es in plain’acziun. Per millis e millis da tregantas e tregants ha quista festa la medemma gronda valur sco pels luottaders la Festa federala da luotta. Eir pro la Festa federala da tir daja nempe in tschertas disciplinas raïnas e rais. Ün tal titel manca amo ad ün dals meglders tregants da pistola in tuot il Grischun, Elmar Fallet da Müstair. Cuort avant cha sias concurrenzas da qualificaziun han lö, ha la FMR visità al tregant da pistola paschiunà.
Quiet e focussà tira il tregant da pistola Elmar Fallet da Müstair tun per tun seis program da la saira. Id es il «Matchcup», ün tir chantunal sün 50 meters ingio chi’s tira üna jada al mais e chi düra tuot la stà cun ün final dals meglders tregants grischuns in settember a St. Antönien. Tuottafat cuntaint culla saira nu para Elmar Fallet dad esser.
«Sch’eu guard uossa il resultat nun esa uschè mal, ma las serias sveltas nu sun idas uschè bain», analisescha Elmar Fallet ils «acceptabels» 570 puncts ch’el ha trat quist mais, congualond culs «excellents» 580 puncts da l’ultima jada ed agiundscha riond cha forsa haja quai da chefar cul squitsch da la visita da la FMR.
Adüna trar per guadagnar
Savair ir intuorn cun squitsch, pel paur da 55 ons insè ingün problem. Elmar Fallet vala nempe sco ün dals meglders tregants da pistola in tuot il Grischun. Ed eir sur ils cunfins grischuns oura as saja fich bain chi ch’el es. Ch’el nu giaja a concurrenzas però nimia simplamaing be per trar, dimpersè adüna per tillas guadagnar, accentuescha il tregant da pistola paschiunà. Ed uschea ha Elmar Fallet pudü ramassar fingià blers titels e bleras medaglias dürant sia carriera.
Sco per exaimpel üna vainchina da titels sco champiun grischun, la victoria culla gruppa da match grischun a la Festa federala da tir i’l Vallais dal 2015, il titel sco champiun svizzer dal 2017 a Thun e be pel nair da l’ungla nun haja bastü pel titel dal rai a la Festa federala da tir a Lucerna dal 2021. Implü ha il tregant da Müstair survgni fingià quatter jadas la distincziun sco tregant grischun da l’on.
«Ils Fallets sun forsa ün zich sco ils Tomaschetts illa Surselva. Eu n’ha schon survgni quist dun in chüna», manaja Elmar Fallet, guardond inavo grat sün üna carriera chi ha cumanzà insè magara tard.
L’art da far adüna il listess
Fingià adüna fascinà dal trar cul schluppet, ha Elmar Fallet pür dal 2009 chattà la via pro’l sport da trar culla pistola. Però uschè tard sco cha sia carriera sco tregant da pistola ha cumanzà, uschè svelt es gnü il success. Be güsta trais ons davo ch’el vaiva cumanzà a trar culla pistola, ha Elmar Fallet pudü guadagnar il tir chantunal a Tusan.
«La carriera es statta, pel trenamaint ch’eu fetsch, bod na da crajer», resümescha il paur da vachas svessa eir adüna darcheu ün zich stupefat da quists ultims ons. «Il trar sülla schaibgia es per mai pudair invlidar ils problems dal minchadi. Tü stoust invlidar tuot ils problems per pudair far ün bun resultat. E quai es il bel.»
E per cha quai funcziuna lura eir adüna uschè sco giavüschà, douvra tenor Elmar Fallet ouravant tuot üna buna fitness, ün man quiet, üna buna controlla da flà e buna coordinaziun tanter tscharvè e daint. E cha lura nu saja il sajettar «insomma ingün’art – l’art es da far adüna il listess», quai chi ha nom per Elmar Fallet: «Tocker simplamaing nöglia dadour il nair!»
Tun per tun – tir per tir
E tenor quist princip tira il tregant da pistola Elmar Fallet fingià daspö var 17 ons tun per tun – dürant indombrablas sairas, saja quai i’l stand da tir a Müstair obain lura in tuot ils oters stands da tir, dalöntsch e dastrusch, dürant concurrenzas regiunalas, chantunalas o sco uossa apunta concurrenzas federalas.
La festa da tir federala chi ha lö quists dis a Cuoira e contuorns es ün dals puncts culminants per mincha treganta e mincha tregant, uschea eir per Elmar Fallet. Quai chi vala pels luottaders la Festa federala da luotta, vala pellas tregantas ed ils tregants la Festa federala da tir. Eir quia as poja nempe dvantar in tschertas disciplinas raïna e rai – üna da las distincziun las plü onuraivlas chi manca amo illa vaidrina da medaglias dal tregant da Müstair.
Cha nervus nu saja el amo, manaja Elmar Fallet tuot calm. Cha’l prüm üna jada saja il böt da far ün bun resultat pro las concurrenzas da qualificaziun chi han lö in pacs dis e cha lura cumanzarà, in vista a las rondas finalas in lügl, eir pro el a batter il cour planet ün zich plü svelt. Però, cha tuot saja a la fin finala eir quista vouta avert, conclüda il tregant da pistola paschiunà la saira maniond per finir: «Vairamaing esa simpel. Tü stoust simplamaing esser l’ultim il meglder.»
Gust da leger dapli?