Daguot d’in niev brischavinars
La Destillaria Daguot a Glion vegn menada d’in niev team. Robert Cathomas e Beni Simeon han decidiu da surdar il menaschi els mauns da Ralph Krättli. Sustenius vegn el da Stefan Cathomas e Thomas Krättli. La midada ei succedida cull’entschatta da quest meins.
Avon 13 onns han Robert Cathomas (72) e Beni Simeon (75) fundau la Destillaria Daguot GmbH a Glion. Ussa va l’interpresa che ha grond success cun ses destillats en novs mauns. Il fegl da Robert Cathomas, Stefan Cathomas (40), surpren la societad ensemen cun Thomas Krättli (39). Els dus lavuran gia maun en maun ell’interpresa da schubergiar Cathomas. La fatschenta vegn denton menada da Ralph Krättli (42), il frar da Thomas Krättli, omisdus da Vaz Sut. Sco els orienteschan lur clientella quels dis, ei la midada dalla fatschenta sefatga cugl emprem da zercladur 2026.
Ina nova era
«Per nus ei il temps da calar arrivaus. Nus savein surdar la fatschenta en buns mauns, stein denton vinavon a disposiziun per plaid e cussegl», dian Beni Simeon e Robert Cathomas. Els ein stai brischavinars cun tgierp ed olma: «Quei che ha entschiet sco hobi, ei la fin finala sesviluppau en ina direcziun che nus havessen mai sminau. Gest per quei motiv havein nus plascher ch’il menaschi ha ina successiun.» Ei hagi bein dau interessents per l’interpresa, mo la fin finala seigi ei stau clar: «Sch’enzatgi en famiglia ha interess dad ella, lu resta ella en famiglia.» Per Robert Cathomas eis ei per quei motiv clar: «Quei ei la megliera soluziun per nus.»
Cuntinuar cun qualitad
La finamira dil niev meinagestiun Ralph Krättli ch’ei la nova fatscha dalla Destillaria Daguot ei evidenta: «Jeu vi cuntinuar culla qualitad dalla destillaria.» Per quei motiv vegn el a frequentar ils cuors da brischavinars, mo era da nezegiar la savida ed experientscha da ses dus antecessurs Robert Cathomas e Beni Simeon: «Quei ch’els san, sai jeu buc emprender mo aschia. Lur sustegn ei d’impurtonza.» El center dall’activitad dalla Destillaria Daguot stattan ils products actuals. «Nus lein cuntinuar culla paletta da products, dar peisa alla qualitad e nezegiar ils fretgs dalla regiun. Il mument ei quei tschereschas selvadias», di Thomas Krättli che vegn a sustener siu frar Ralph communablamein cun Stefan Cathomas surtut en fatgs administrativs. El decuors dils 13 onns da si’existenza ha la Destillaria Daguot survegniu in fetg bien num per ses products, seigi a concurrenzas sco tier la clientella. Quella reputaziun oblighescha naturalmein era il niev team dall’interpresa. En quei senn di Stefan Cathomas: «Las fatschas midan, mo buca ils products.»
Pissiun e carezia
La Destillaria Daguot ei aschidadir il pop d’ina idea ch’ei naschida duront la catsch’aulta. «Nus essan sedumandai tgei trafficar il temps da pensiun», relatan Beni Simeon e Robert Cathomas. Igl ei lu buc iu ditg entochen ch’els han concretisau lur idea, absolviu ils cuors da brischavinars ed endrizzau lur menaschi a Glion. Ensemen cun lur consortas Justina Simeon e Marianne Cathomas han els lu menau la destillaria duront 13 onns. Dapi lu brischan els mintg’onn rodund 30 tonnas fretgs a vinars. Quei corrispunda a 6000 entochen 8000 butteglias da miez liter. Barschau vegn sulettamein fretgs indigens sco plogas, meila, péra, puaunas e cudugns. Leutier vegn il vinars da jarvas, mo era whisky ei el sortiment ni in liquor da mèl d’aviuls cun jarvas. Las cundiziuns d’insumma astgar barschar vinars ein fetg severas e survegnir la licenzia ei cumbinau cun claras directivas. Duas gadas ei la Destillaria Daguot vegnida distinguida sco destillaria digl onn dalla Svizra e cun in tschuppel products ha ella gudignau medaglias d’aur dalla DistiSuisse, la concurrenza da spirituosas dalla Svizra.
Gust da leger dapli?