Per dapli effizienza ed energia regenerabla

«Nus vulain far fit nossas chasas per il futur.» – Cun quests pleds ha Nicole Sigron avert mesemna saira l’occurrenza d’infurmaziun davart il nov program da promoziun d’energia da Vaz. En la Sala da cultura da Lai ha ella, la parsura da la cumissiun Citad d’energia da Vaz (guarda box), dastgà beneventar radund 30 persunas. Co che chantun e vischnanca sustegnan investiziuns en l’effizienza energetica ed energias regenerablas, han declerà Michael Casutt da l’Uffizi d’energia e da traffic chantunal, Beat Germann da la partiziun ovras da la vischnanca Vaz ed il cussegliader d’energia Michael Hartmann.

La vischnanca suonda il chantun

Sco che Beat Germann ha explitgà, è il nov program da promoziun communal – ch’è en vigur dapi il 1. da schaner 2026 – relativamain simpel: «La vischnanca sa basa sin las decisiuns dal chantun.» Vul dir tgi che survegn sustegn dal chantun, po era dumandar e quintar cun sustegn da la vischnanca e quai en l’autezza da 10 % dal sustegn chantunal. Las dumondas ston dentant vegnir inoltradas 90 dis avant l’entschatta da construcziun. Plinavant contribuescha la vischnanca maximalmain 30 000 francs per project e la cumpart da contribuziuns publicas na dastga betg surpassar 50 % dals custs.

Cunquai che las contribuziuns finanzialas derivan dal fond d’energia (Stromsparfonds), è il sustegn communal dentant limità. «A disposiziun avain nus radund 250 000 francs per onn», ha Beat Germann confermà envers la FMR. Finanzià vegn il fond d’energia cun ina taxa d’electricitad per l’import da 50 raps per kWh. Quest onn n’ha la vischnanca dentant anc pajà naginas contribuziuns. «Nus avain gì trais quatter dumondas en connex cun il program, ma naginas annunzias da projects», uschia Beat Germann.

Era la cussegliaziun vegn sustegnida

Damai che la vischnanca da Vaz s’orientescha finanzialmain als sustegns chantunals, prescriva il program da promoziun dal chantun era, tge mesiras che vegnan sustegnidas. Quellas tanschan dad infrastructura da chargiar vehichels electrics sur implants fotovoltaics fin isolaziuns e stgaudaments da laina. Cunquai che la contribuziun chantunala vegn calculada tut tenor mesira en moda differenta, èsi in pau pli cumplitgà che tar la vischnanca. Sco che Michael Casutt ha declerà a la saira d’infurmaziun, saja perquai cusseglià da s’infurmar tar l’Uffizi d’energia e da traffic dal Grischun pertutgant finanziaziun e cundiziuns. «La dumonda sto dentant en mintga cas vegnir inoltrada avant l’entschatta da construcziun. Il meglier gist ensemen cun la dumonda da bajegiar», ha il manader da project dal chantun punctuà.

Las infurmaziuns necessarias na chattan ins tar il chantun dentant betg mo en furma scritta. Quel porscha en connex cun ses program da promoziun er in’emprima cussegliaziun gratuita per chattar access al tema. Tgi che ha en vista in project concret e dumonda cussegliaziun pli detagliada, sto dentant pajar per questa purschida. Ma era quella purschida sustegna la vischnanca da Vaz en il rom da ses program da promoziun d’energia, sco che Michael Hartmann ha explitgà.