A scola cugl tractor

An pacs deis è igl onn da scola 2025/26 a fegn e scolars e scolaras dastgan sa legrar sen las vacanzas. A fegn vo la scola er per Lucas Bläsi, igl mat da 16 onns tgi stat a Vasarauls. Per el scumainza ena nova etappa dalla veta cun far en amprendissadi da mecanist agricol. Igl è betg ena casualitad tg’el è sa decidia da far chel amprendissadi. Gio da mattatsch è Luca Bläsi adegna sto fascino da maschinas agricolas e chegl è er cun 16 onns uscheia.

Tratg se è el a Vasarauls sen igl bagn puril «Spisagger Hof», ena pensiun per tgavals tgi sies genitours Markus e Ramona Bläsi magnan gio siva da diesch onns. Lour mat è en grond ageid per bab e mamma, ma igl pi gugent vo el cun tot las maschinas tgi totgan tigl pour-esser digl bagn puril.

Ena passiun da Luca Bläsi è da restaurar maschinas agricolas viglias. Egna da chellas è en tractor dalla marca «Bührer». Restauro chel tractor da passa 60 onns ò el igl anviern passo durant ple tg’en meis. Luca Bläsi dei: «Chel model da tractor ò Bührer construia digl 1960 anfignen igl 1970, e cun en motor da treis cilinders.» Chels tractors da chella marca svizra èn tractors robusts construias cunzont pigl basigns dall’agricultura svizra da muntogna. 

Cumpro igl tractor per 1500 francs

Sur la plattafurma «Ricardo» veva Luca Bläsi cumpro ena maschina dalla marca «Bucher Transporter». Igl è alloura sto ena casualitad tgi igl mat ò vasia sen la plattafurma «Ricardo» igl tractor vigl dalla marca «Bührer». Luca Bläsi ò intganto la maschina e pigl intgant paea 1500 francs. A madem mument è el nia da vender sur la plattafurma «Ricardo» igl «Bucher Transporter» ad ena persunga digl cantun Berna. El seia sto ple tgi angal ventirevel da pudeir cumprar igl tractor «Bührer», ò detg Luca Bläsi cun inscuntrar el a Casti.

Igl è betg sto ena casualitad d’antupar Luca Bläsi a Casti. La raschung è tgi el vo mintga de a scola cugl agen tractor, igl «Bührer», da Vasarauls a Casti ed anavos. Sies tractor vei siva dalla restauraziun or scu tg’el fiss gist nov or dalla producziun a Hinwil, igl li noua tgi chella marca vign fabritgeida. Cun discorrer cugl cumpogn da Vasarauls sa mossa adegna daple la sia passiun e fascinaziun pigl sies tractor e per la sia marca da tractors prefereida «Bührer». Luca Bläsi dei: «Ia va investia numerousas ouras per restaurar e reparar igl tractor, el era fitg da ravetna.» Tocs da reserva vegia el er catto per restaurar e reparar la maschina. Ossa seia el losch da sies vehichel.

25 km l’oura

Chels deis vegia el da mussar avant igl tractor alla controlla da vehichels a motor, ò menziuno Luca Bläsi. La controlla vegia li a Brinzauls, noua tgi er otras maschinas vignan controlladas. Ma igl interessant dall’istorgia digl tractor «Bührer» è bagn tgi Luca Bläsi vo cun chel a scola da Vasarauls a Casti. Pi spert tgi la maschina è stada restaurada è el betg ple ia a scola cugl «töfli», mabagn cugl tractor. Igl amprem vegian igls sies conscolars e las sias conscolaras bagn catto chegl fitg tschert, alla fegn finala tuttegna catto chegl per cool.

Catto chegl per cool ed er per agen vegian alloura er igls scolasts. Igl pedel dalla tgesa da scola Cumpogna a Casti seia er dalunga sto pront da lascher parcar igl tractor segl parcadi da scola. Chegl seia sto impurtant, pertge schiglio vess el gia da cattar en oter li per parcar.

Ensacu vo l’istorgia digl tractor «Bührer» bagn a pêr cun Luca Bläsi. El è en mat da buna luna, fitg legher e cuntaint. El ò menziuno: «Da Vasarauls a Casti vaia cugl tractor radond diesch minutas.» La sveltezza maximala digl sies tractor è tar 25 km l’oura. Dei ò Luca Bläsi betg ple da far chel viadi cun eir igls proxims deis a fegn la sia scola fundamentala. Siva antscheva per el a Coira igl amprendissadi da ­mecanist agricol.

Pigls proxims quatter onns è el adegna fatschento cun maschinas agricolas, tg’èn per el en mond fascinant. Dad eir da Vasarauls a Coira cugl sies tractor «Bührer» saro strousch pussebel – ma da sa simgier da chel è adegna pussebel.