Es «Robi, il robot» la nouva «randulina»?

«Arumbazonis», uscheja as nomnan ils chantaduors e la squedra intuorn la registraziun da chanzuns rumauntschas per iffaunts. E quels «Arumbazonis» haun preschanto in marculdi passo desch nouvas chanzuns dal proget musical per promouver la lingua rumauntscha. L’iniziant dal proget Daniel Manzoni vuless collier cul proget musica, lingua e cumünaunza in maniera unica.

Resun d’infanzia

Il musseder da Segl ho scrit düraunt ils ultims 13 ans las chanzuns in puter e coordinescha daspö la prümavaira da l’an passo il proget. Daspö meg 2025 è’l landervi cun üna squedra – nempe ils «Arumbazonis» – da realiser pass per pass il proget da la finanziaziun, registraziun fin a la publicaziun. Svess es Daniel Manzoni creschieu sü a Samedan cun rischs tudas-chas. Pür scu giuvnot ho el realiso che regal ch’el hegia clappo da la scoula rumauntscha e ch’el vuless der inavous qualchosa a quella. In quist reguard sajan impustüt chanzuns d’infanzia centrelas. «Chanzuns sun centrelas per l’identificaziun cul muond inua cha essans creschieus sü», disch Daniel Manzoni.

A S-chanf sun gnidas preschantedas l’eivna passeda desch nouvas chanzuns our dal repertori dal proget, accumpagnedas d’üna cuorta invista i’l proget, cun chaunt e dafatta cun üna polonesa cumünaivla illa sela polivalenta da la scoula. Sgür cha’ls preschaints s’haun in marculdi passo algurdos dad ün u l’oter ballin da Chalandamarz in quel mumaint?

Chanzuns per mincha gust

Düraunt ils prossems mais da sted vegnan creedas inavaunt bundant 70 ulteriuras chanzuns. Quistas vegnan alura publichedas successivmaing. Persunas da scoulina, scoula primara e scoula da musica da l’Engiadin’Ota s’haun partecipedas cun grand ingaschamaint a las registraziuns. Ses gruppas cun musicantas e musicants da diversas vschinaunchas as partecipeschan al proget e daun vita a las chanzuns cun clavazin, ghitarra, vusch e bgera creativited. Las chanzuns dessan eir gnir tradüttas in oters idioms.

Scu ch’ün creschieu d’hozindi ho ill’uraglia la chanzun da «Sch’eau füss ’na la randulina» scu memüergia d’infanzia, uscheja ho forsa ün dals iffaunts preschaints in ün pêr ans ill’uraglia üna chanzun dal proget «Arumballabum». Las nouvas chanzuns rumauntschas per iffaunts quintan dal minchadi, dal muvimaint, dal chanter e suter. Uscheja as nomnan las chanzuns p.ex. «Robi, il robot» u «Nicòla, il squigliat».