Nouv schlantsch pella bieraria
I dà güsta plüs müdamaints pro la Bieraria Tschlin SA. In avegnir vain la biera imbutigliada e distribuida da la bieraria Locher da l’Appenzell. Implü es Reto Rauch gnü elet a la radunanza generala da sonda passada sco president dal cussagl administrativ.
Las actualas temperaturas chodas ed il champiunadi mundial da ballapè pisseran cha’l marchà da biera gira bain. Ma quai nun es tuot on il cas. Il marchà da biera es nempe tuot oter co simpel. Quai manaja il mainagestiun da la Bieraria Tschlin SA Fadri Riatsch. I saja adüna greiv da pudair exister i’l marchà da biera. «Ma nossa bieraria es pitschna e biologica, cun quella nischa speraina d’ans etablir.»
Nouva collavuraziun
La Bieraria Tschlin SA ha salvà in sonda passada sia radunanza generala. Ella ha prodot dal 2025 raduond 1530 hectoliters biera. Quella quantità es plü o main sül listess nivel sco ils ons avant. Cun ir sur ils cudeschs ha la bieraria pudü far respargns in divers lös e pudü realisar ün pitschen guadogn pel 2025. Sia gronda sfida es l’imbutigliar e la distribuziun da l’aigna biera.
A la radunanza generala ha la suprastanza perquai preschantà üna nouva collavuraziun culla bieraria Locher d’Appenzell. Quella surpiglia l’imbutigliar e la distribuziun. «Nus eschan persvas cha cun quel contrat da collavuraziun pudaina sgürar inavant l’avegnir da la bieraria», declera Fadri Riatsch invers RTR.
Nouvas fatschas
Ün ulteriur pass per pudair promouver la vendita es eir gnü fat in sonda passada: Cun Remo Flütsch es gnü elet ün profi da vendita i’l cussagl administrativ. El lavura nempe illa bieraria Locher e cugnuoscha la vendita da biera. «Nus vain vuglü avair ad inchün chi ha la vusch dal marchà in nos cussagl administrativ», declera Fadri Riatsch ed agiundscha: «Cun sias cugnuschentschas po’l güdar a manar strategicamaing nossa bieraria.»
Implü daja ün müdamaint al timun da la Bieraria Tschlin SA. A Philip Bucher chi ha manà ils ultims ons la bieraria segua Reto Rauch da Sent sco president dal cussagl administrativ. Reto Rauch ha fingià manà sur divers ons la gestiun da la Bieraria Tschlin SA. Sper il nouv president es gnü reelet Jonas Misteli i’l cussagl administrativ. Nouv i’l cussagl da la bieraria sun eir Chasper Cadonau ed apunta il perit Remo Flütsch.
Culla nouva strategia e culla nouva collavuraziun spera la Bieraria Tschlin SA inavant sün ün success. «Eu crai cha quels chi cugnuoschan l’istorgia da la bieraria san chi dà fingià daspö 20 ons ün pa ün cumbat», conclüda il mainagestiun Fadri Riatsch invers RTR. «Ed eu pens cha quel cumbat va inavant, i nu sarà nempe uschea chi vain üna jada bler plü simpel. Ma in ün on sarana amo adüna quia cha nus prodüain biera.»
Gust da leger dapli?