467,5 milliuns per vias, punts, binaris e tunnel
En il Partenz tranter Fideris e Küblis survegnan la via naziunala, la via locala e la lingia da la Viafier retica in cumplettamain nov trassé sin ina lunghezza da 3,5 kilometers. Ils custs totals muntan a totalmain 467,5 milliuns francs per l’entir project.
La Viafier Retica e l’Uffizi da construcziun bassa dal Grischun han infurmà mardi saira la populaziun davart in nov grond project communabel en il Partenz. Tenor ina communicaziun da la viafier vegnan la via e la lingia dal tren tranter Fideris e Küblis projectads nov per 467,5 milliuns francs. La raschun è che sin quel tschancun da 3,5 km lunghezza sa chattan la via naziunala e locala e la lingia dal tren in sper l’auter en ina chavorgia stretga. Quai ha dentant per consequenza ch’ils trens pon charrar be cun 45 km/h ed er ils autos ston pervi da las stortas stretgas ed il vial stretg ir pli plaun.
Quella situaziun duai ussa sa midar cun la nova construcziun. Il vial da la via naziunala N 28 vegn gulivà e permetta cuntinuadamain spertadads dad 80 km/h. La nova lingia da la viafier garantescha sveltezzas maximalas da 120 km/h.
Nov tunnel da Fideris
La lingia da la viafier vegn spustada levamain davent da Fideris vers sid ed entra tar la staziun da Fideris en il nov tunnel da Fideris che vegn ad esser 1385 meters lung. Suenter il tunnel maina il traject sur ina punt da 200 meters. Per garantir la segirezza cunter auas grondas en l’ulteriur traject en direcziun da Küblis dovri ina nova punt sur l’aual d’Ariesch ed ina nova punt Dalvazza sur il flum Landquart.
Tut en tut dovri sin il tschancun da 750 meters tranter Äuli e Dalvazza per autos e trens set novas punts ed ina construcziun da sustegn pli lunga. Il traffic plaun vegn en l’avegnir manà sur il traject existent.
La Viafier retica abolescha la fermada a la staziun da Fideris pervi da las lavurs da construcziun a partir da l’onn 2030. Actualmain sa ferman là be singuls trens durant uras marginalas. L’edifizi da la staziun che stat sut protecziun, vegn spustà e mantegnì.
Dapli spazi e dapli segirtad
Cunquai ch’il trassé da la viafier giu en il fund da la val svanesca grazia al tunnel da Fideris, datti dapli spazi per la nova via naziunala e la nova via locala, quai che munta era dapli segirtad. Plinavant po en l’avegnir vegnir guntgì da nov sin la via locala tar lavurs da mantegniment u en cas d’in accident sin la via naziunala. Ultra da quai vegn augmentada cun il nov project la protecziun cunter privels da la natira e flums ed ils auals survegnan dapli spazi. «Sper in augment da segirtad resulta per la viafier in gudogn da temp da passa duas minutas», scriva la Viafier Retica en sia communicaziun.
Lavurs duran fin il 2037
Las lavurs da construcziun cumenzan probablamain l’onn 2028. Il tunnel da Fideris duai esser a fin da l’onn 2034 avant che la via naziunala e la via locala vegnan construidas da nov durant ils onns 2035 fin 2037. Dals totalmain 467,5 milliuns francs vegnan investids 169 milliuns en l’infrastructura stradala e 298,5 milliuns francs en quella da la viafier.
La Confederaziun surpiglia tenor il pledader da medias da la Viafier retica, Simon Rageth tut ils custs da la viafier e 92 % dals custs da las vias. Il rest finanziescha il chantun Grischun. I sa tracta d’in project cuminaivel da la Viafier retica, da l’Uffizi da construcziun bassa dal Grischun e da l’Uffizi federal da vias. La Viafier retica è la manadra dal project.
Gust da leger dapli?