Las spindreras da Glion sedostan
Cun ina brev aviarta sedostan las spindreras dil Spital regiunal Surselva per la partiziun da naschientschas a Glion. Tenor il Cantun e la corporaziun da vischnauncas SanaSurselva duei la partiziun da naschientschas dil spital da Glion vegnir serrada. La FMR ha confruntau ils adressats dalla brev aviarta culs quitaus e las reproschas dallas spindreras da Glion.
La brev aviarta publicada ella gasetta Südostschweiz dallas spindreras dil spital da Glion ei adressada al cusseglier guvernativ Peter Peyer, al president dalla SanaSurselva René Epp ed alla populaziun dalla Surselva. Ella brev aviarta scrivan las spindreras ch’ellas sappien buca capir ch’ellas seigien vegnidas informadas entras las medias ch’ellas piardien probablamein lur plaz da lavur.
Ei semeglia in donn collateral
«Nus vulessen dir alla populaziun sursilvana che nus seigien era vinavon cheu cun nossa partiziun da naschientschas», scrivan las spindreras plaid per plaid ella brev aviarta. Ellas hagien giavischau da far in di dallas portas aviartas ella partiziun da naschientschas. Quei ed era aunc autras activitads da promoziun seigien denton buca vegnidas lubidas dils organs superiurs dil spital. «Tgi che desista d’ina partiziun da naschientschas, ch’ei ina prestaziun aschi impurtonta per famiglias e per il provediment general en ina regiun, ei en duer culponts d’argumentar quei enviers la populaziun. Ils arguments che nus udin oz, semeglian plitost ad in donn collateral ch’ei sedaus pervia d’in auter svilup», scrivan las spindreras da Glion. E cun quei auter svilup manegian ellas la chirurgia da 24 uras che vegn sistida. Per consequenza sto era la partiziun da naschientschas vegnir serrada.
Remarcas che fan mal
En lur brev publica reageschan las spindreras era sin las remarcas concernent lur cumpetenzas professiunalas. La remarca da cusseglier guvernativ Peter Peyer che la lavur seigi buc engrazieivla per spindreras che accumpognien mo ina ni pli paucas naschientschas enteifer in’jamna, seigi per ellas ina constataziun che fetschi mal e seigi buca correcta. El text ha ei num: «Nus spindreras dil spital da Glion essan sapientivamein sedecididas per in spital pign per che nus saveien accumpignar las famiglias a moda cumplessiva.» La professiun da spindrera cuntegni bia dapli che «mo» igl accumpignament duront las naschientschas.
Ei dat avunda spindreras qualificadas
Las spindreras criticheschan l’intenziun dalla SanaSurselva da serrar la partiziun da naschientschas «Per cass che las delegadas ed ils delegai dalla SanaSurselva decidan da serrar la partiziun da naschientschas a Glion a la fin dil 2026, vulessen nus sco spindreras informar che la partiziun da naschientschas vegn buca serrada pervia da munconza da forzas da lavur qualificadas.
Il Grischun dispona da biaras spindreras bein scoladas e cun experientscha. Ei dat spindreras che han negina plazza, malgrad ch’ellas han bunas qualificaziuns ed experientschas.» D’ina munconza generala da specialistas e da specialists sappi ins pia strusch discuorer el cantun Grischun.
Capientscha per las finanzas
Ella brev publica scrivan las spindreras ch’ellas hagien capientscha per la situaziun finanziala dil Spital regiunal Surselva. Ils spitals regiunals seigien denton buca cheu per far gudogns, mobein per segirar il provediment da basa. Las spindreras scrivan: «En vesta al preventiv 2026 essan nus vegnidas informadas ch’ils pertschiens da plazzas libras en nossa partiziun vegnien buc occupai pli. Nus havein giu bunas annunzias ed ei ha era dau spindreras en nies team che fussen stadas promtas d’augmentar lur pensum da lavur. Da discuorer sut quellas premissas da munconza da persunal qualificau resentin sco nunsincer e sco buca fair enviers nus ed era buc enviers la populaziun sursilvana.»
Sururas senza indemnisaziun
La damonda co il pertschiens da plazzas vacantas ella partiziun da naschientschas savessien vegnir cumpensai ei in ulteriur tema ella brev aviarta. Tenor quella hagi la direcziun dil spital presentau la sligiaziun da far survetschs da 12 uras ni pichet senza indemnisaziun supplementara e senza perspectiva co las sururas savessen vegnir cumpensadas. «Ussa essan nus en in conflict persunal difficil», stat ei scret ella brev publica. E vinavon: «D’ina vart stat la tgira ed igl accumpignament dallas famiglias fetg a cor a nus. Da l’autra vart vegnin nus strusch da pigliar si ils procents la lavur che mauncan senza far donn a nus sezzas a liunga vesta.»
Las spindreras concludan lur brev aviarta als responsabels per la sanadad publica en Surselva ed alla populaziun cun in giavisch. Lur patratgs duessien cumpletar las biaras perspectivas ch’ei detti en connex culla discussiun davart il futur dalla partiziun da naschientschas el spital da Glion.
Il bal ei tier ils purtaders dil Spital regiunal Surselva
Il schef dil departament cantunal da giustia, segirtad e sanadad, Peter Peyer, ei igl emprem adressat dalla brev aviarta dallas spindreras dil spital da Glion (mira artechel). Alla damonda dalla FMR, sch’el capeschi ils quitaus dalla spindreras rispunda Peter Peyer ch’il problem seigi la digren dallas naschientschas el spital da Glion: «Ils davos tschun onns ha ei aunc dau ella media 156 naschientschas a Glion.» La glieud vegni pli e pli veglia e la demografia seigi negativa egl entir cantun, rispunda Peter Peyer. «Ord quei pugn da vesta capeschel jeu ils panzieris dallas spindreras.»
Render attents ei legitim
René Epp, il president dalla SanaSurselva ei il secund exponent che vegn plidentaus ella brev aviarta. El scriva: «Che las spindreras rendan attents nus, sch’ellas fan quitaus ei legitim.» De facto seigi ei denton da dir il suandont, scriva René Epp: «Senza sustegn finanzial dil Cantun resp. senza che la partiziun da naschientschas ei el futur sin la gliesta dil Spital da Glion, eis ei buca pli pusseivel da purtar quella finanzialmein.» Igl accumpignament avon e suenter las naschientschas sco era las prestaziuns da ginecologia e pediatria seigien denton vinavon garantidas, aschia René Epp. «Plinavon sto la SanaSurselva ensemen cun la Reit da Sanadad en general far ponderaziuns co il provediment da basa da sanadad duei veser ora el futur.» Las sfidas seigien grondas, gest en connex cun las investiziuns necessarias che spetgien il spital.
Gust da leger dapli?