In tunnel per otg milliuns
La davosa mesjamna sera ha il parlament communal da Ilanz/Glion priu enconuschientscha dalla demissiun dil president communal Marcus Beer. Plinavon han las deputadas ed ils deputadas debattiu ina buna ura davart il project pigl access da Duin ellas aclas da Varduz.
Pér alla fin dalla sesida dil parlament dad Ilanz/Glion ha il president da vischnaunca Marcus Beer fatg da saver ch’el vegni a calar sco president communal alla fin digl onn 2026. (mira boxa). Discussiunau durant la sesida ha il parlament denton surtut davart igl access all’alp ed allas aclas da Varduz dadens Duin. Quei access duei vegnir construius sco tunnel da biebein 300 meters. La via da Varduz ei exponida dapi onns a sbuadas e bovas da crappa. Sin quella via hai era gia dau ina persuna ch’ei morta entras ina curdada da crappa. Il niev tunnel cuosta approximativamein otg milliuns francs. Ina clara maioritad dallas deputadas e dils deputai ein s’exprimi mesjamna sera en favur da quei tunnel. Cun critica enviers quella varianta ei denter auter il parlamentari Jan Berni da Castrisch s’exprimius. Ei seigi surfatg d’investir tons daners en ina colligiaziun cun in’alp ed entginas aclas. Malgrad che la vischnaunca stoppi purtar mo circa ina tiarza da quels otg milliuns seigi ei da considerar che era ils ulteriurs sis milliuns seigien daners da taglia, ha Jan Berni manegiau. El ha survegniu sustegn d’aunc dus deputai. Dils votums en favur dil tunnel ei resortiu che la situaziun ella Val da Sum Punt ch’ ei il tschancun il pli exponiu silla via a Varduz seigi aschi precara ch’il tunnel seigi la suletta varianta realistica. Quella mesira d’access munti in grond sustegn cunzun per l’agricultura ed insumma per la populaziun dalla pintga fracziun da Duin.
Project d’avertura forestala
Il tunnel da Varduz vegness baghegiaus ella Val da Sum Punt dadens il vitg da Duin. Cun quei access per l’agricultura realisescha la vischnaunca da Ilanz/Glion era l’avertura forestala da Varduz. Per quei motiv separticipeschan era la Confederaziun ed il Cantun cun circa duas tiarzas dils cuosts.
En in studi haveva igl Uffeci cantunal d’uaul e prighels dalla natira examinau igl onn 2025 duas variantas: la construcziun nova d’ina via d’untgida da rodund 1485 meters sco era la construcziun d’in tunnel per untgir la Val da Sum Punt. Ella evaluaziun dallas duas variantas ei semussau claramein che la varianta dil tunnel porta ils megliers resultats totals.
Il parlament communal da Ilanz/Glion ha alla finala decidiu cun 21 encunter 3 vuschs da suttametter la damonda da credit pil tunnel da Varduz al suveran da Ilanz/Glion che vegn a decider all’urna.
«Jeu haiel buca pli la forza ch’jeu havevel»
Alla fin dalla sesida dil parlament dad Ilanz/Glion da mesjamna sera ha il president dil parlament Flavio Elvedi prelegiu la brev da demissiun dil president communal Marcus Beer. El sez ha priu il plaid e detg ch’el hagi per motivs da sanadad stuiu prender quella decisiun.
FMR: Tgei vul quei dir, motivs da sanadad?
Marcus Beer: Jeu haiel giu in’operaziun dil cor la davosa primavera. Quella ei gartegiada bein. Jeu sun serevegnius bein ed haiel puspei entschiet a luvrar. Mo jeu sentel ch’jeu haiel buca pli la forza ch’jeu havevel avon l’operaziun. La vischnaunca drova denton in president ch’ei plein forzas ed energias per dumignar las sfidas. E perquei sun jeu sedecidius da seretrer sin la fin digl onn 2026.
Vus haveis gia fatg amogna la primavera avon Vossa operaziun da metter a disposiziun igl uffeci, sch’il parlament havess giavischau quei. Ha la decisiun dad ussa in connex cun la proposta da lezzas uras?
A quella damonda vuless jeu buca rispunder.
Vus haveis detg al parlament che vus hagies buca las forzas pli. Co sentis Vus quei?
Jeu vegnel semplamein pli spert staunchels dapi l’operaziun dil cor. Era la concentraziun ei buca pli la medema. Ed jeu vegnel era buca pli giuvens. Anzi, jeu haiel gia contonschiu la vegliadetgna da pensiun.
Tgei profil drova la presidenta ni il president communal futur dad Ilanz/Glion?
Quei ch’el ni ella drova ei la promtezia da s’engaschar per la vischnaunca senza risguard sin sururas. Jeu haiel fatg l’experientscha ch’ei drova ina persuna cun diplomazia, cun dapli diplomazia che quei ch’jeu haiel giu en certas situaziuns. E lu fetg impurtonta ei ch’il president ni la presidenta seigi ina persuna communicativa.
Tgei ei special el presidi da Ilanz/Glion?
Nus essan ina gronda vischnaunca cun biars projects e biars problems da sligiar. Vischnauncas pli pintgas ein segiramein pli semplas da menar. Sco vischnaunca da center han ins in grond buordi da fatschentas ch’ein da sligiar ensemen culla suprastonza communala. (fmr/mg)
Quen cun gudogn
Il parlament communal Ilanz/Glion ha approbau mesjamna sera il rapport administrativ ed il quen communal 2025. Cun in gudogn annual da biebein 290000 francs siara il quen digl onn 2025 dalla vischnaunca Ilanz/Glion cun in gudogn da circa 260
000 francs. (fmr/mg)
Gust da leger dapli?