Nouvs manaders per la Pensiunina

San Ferdinando, ün prüvà cumünet da pes-chaders bod pro’l piz dal pè da l’Italia i’l nord da la Calabria. Quai es la patria da Salvatore Pantano (40) e sia duonna Nadia Borgese (40). Intant – e per fingià var 12 ons – es il cumün da Sent dvantà lur nouva patria, ingio chi nu mainan be daspö 10 ons üna pizzaria insembel, dimpersè bainbod eir amo üna pensiun.

L’arriv casual in Engiadina

«Cha nus eschan rivats in Engiadina, d’eira insè be üna casualità», quinta Salvatore Pantano, il pizzaiolo e co-manader da la Pizzeria Da Salvatore, guardond inavo a seis arriv in Svizra dal 2013. Il prüm i’l Tessin e là amo sulet, ed ün on davo – lura insembel cun sia duonna – apunta in Engiadina. 

«I’l Tessin n’haja imprais a cugnuoscher be per cas al proprietari d’üna pizzaria in Engiadina Bassa. El ha mangià pro nus üna pizza quella jada. La pizza til ha gustà ed ün pêr mais plü tard m’ha el contactà per dumandar, sch’eu nu gniss a lavurar pro el.» Ed our dad oriundamaing üna stagiun da lavur, sun intant dvantats passa 13 ons – culla realisaziun da lur pitschen sömmi: Na plü stuvair lavurar per oters, dimpersè sün agen quint.

«Piccoli asini di Sent»

Ch’impustüt il cumanzamaint quia in Svizra – culla lingua e «cul möd da viver magara different a quel illa Calabria» – saja stat difficil. Però cha sainza invlidar lur ragischs, sajan els dvantats dürant ils ons plü e plü Svizzers, Grischuns, Engiadinais e perfin ün zich «piccoli asini di Sent», constatescha in riond il pêrin chi’s cugnuoscha fingià daspö si’infanzia.

«Dschain uschea: Il sang da l’Italia dal Süd, quel nu sparischa mai. Nossa natüra e noss esser es adüsà ad ün ambiaint cumplettamaing different», disch Salvatore Pantano ün zich fond spass, intant cha sia duonna agiundscha: «Nus eschan però quia, perquai chi’ns plascha. E scha nus eschan in visita ill’Italia, schi surgnina il plü tard davo desch dis fingià darcheu l’increschantüm per l’Engiadina.»

Dimena es l’Engiadina – ed impustüt il cumün da Sent – dvantà i’l fratemp bler daplü co be il lö, ingio ch’els duos han tscherchà a seis temp sgürezza e perspectivas per els svessa e lur uffants. Sent es intant dvantà lur nouva patria e lur lö da lavur cun ün’aigna pizzaria ed apunta bainbod eir amo üna pensiun.

Nouva sfida – nouva furtüna

Ed uschè per cas sco cha Salvatore Pantano e Nadia Borgese sun rivats in Engiadina quella jada, uschè per cas han els duos surgni la pussibiltà da surtour la gestiun da la Pensiunina a Sent. Quai es ün garni cun üna deschina da stanzas da durmir, chi’d es sper l’Hotel Aldier amo üna da las unicas sportas d’hotel a Sent. E daspö avrigl tscherchaiva la Pensiunina nouvs fittadins.

Cugnuschond bain il proprietari dal stabilimaint – ün giast regular illa pizzaria – s’haja dat üna saira simplamaing ün discuors e pac plü tard lura la decisiun cun ün contrat da quatter ons. «Nus eschan fich cuntaints, cha nus vain surgni la fiduzcha», manajan ils duos hoteliers novizs tuottafat inchantats. «Quist es per nus ün’experienza cumplettamaing nouva. Nus eschan amo relativmaing giuvens e vain uossa l’energia per tour per mans amo alch implü.»

Ourdvart consciaints dal grond impegn e ris-ch, sun Salvatore Pantano e Nadia Borgese però gnüts incuraschits da blera glieud in cumün dürant las ultimas eivnas. E cha quist sustegn tils haja rendü davaira cuntaint e saja eir ün segn ch’els hajan trat la güsta decisiun. «Nus eschan gnüts acceptats quia dal prüm di davent e vulain cun quist pass eir in ün möd dir grazcha ad ün e minchün. Scha la Pensiunina resta averta, schi es quai d’avantag per tuot il cumün e seis affars», sun ils duos maridats e partenaris d’affar persvas.

Cumanzar üna jada plan a plan

Lavurond sco team e chattond adüna «üna buna via d’immez», haja gnü nom per Salvatore Pantano e sia duonna Nadia Borgese dürant las ultimas eivnas da drizzar aint da nouv la Pensiunina. Cun quai cha l’edifizi es però gnü renovà da fuond sü  avant ün pêr ons, haja dovrà be pacs müdamaints. 

Nouvas tendas quia, ün zich ün oter stil da decoraziun là, ün nouv concept da püschain e cha’l rest gnia lura plan a plan. Cha’l plü important saja uossa da pudair servir bain a lur giasts illa Pensiunina – da laschar sentir lur «culur, savur, persunalità ed atmosfera» – e cha lura as possa ponderar inavant. Sco per exaimpel pudair eventualmaing profitar da las sinergias culla pizzaria o forsa realisar ün pitschen cafè o lö d’inscunter pels indigens.

Reavertüra, giubileum e cumplion

Ch’ideas per l’avegnir detta a tuottavia amo avuonda ed avuonda, conclüdan ils duos nouvs manaders da la Pensiunina, s’allegrond finalmaing per lur reavertüra. «Quistas ultimas eivnas sun stattas nossas eivnas las plü intensivas in tuot nossa vita. Scha nus nu d’eiran illa pizzaria, schi d’eirna illa Pensiunina e scha nus nu d’eiran illa Pensiunina, schi d’eirna illa pizzaria. Uossa eschan simplamaing cuntaints cha nus pudain finalmaing cumanzar.»

E quai vain fat prossem marcurdi cun üna gronda festa in cumün, chi cumpiglia güsta trais evenimaints in d’üna: La reavertüra da la Pensiunina, 10 ons Pizzeria Da Salvatore ed il cumplion da 41 ons dal pizzaiolo da San Ferdinando e «piccolo asino di Sent», Salvatore Pantano.