In um, ina tribuna, in’exposiziun

Zarli Carigiet ei turnaus a Trun e cun el sia tribuna per ina persuna. L’Uniun Cultura Trun ha numnadamein dedicau in’exposiziun agl actur e cabarettist ella Casa Carigiet, sia casa paterna. La nova exposiziun cul tetel «Davon e davos las culissas», ch’ei vegnida inaugurada sonda suentermiezdi, accentuescha denton buca la vart la pli renconuschida da Zarli (mira box). Quei han la curatura Felicita Felley e la menadra da project Esther Spycher puntuau venderdis vargau a caschun d’ina conferenza da medias: «Il credo ei staus: mussar in Zarli meins enconuschent.» E quei munta en quest cass il Zarli dalla tribuna per ina persuna ch’ei il resultat e la risposta sin ina crisa persunala dils onns 50. «Da lezs temps ei el sesentius sco pigliaus en sia rolla da cabarettist», aschia la curatura.

Reconstruiu la tribuna per ina persuna

Sco Felicita Felley, la sutniaza da Zarli, ha ditg, seigi ei denton stau ina sfida da realisar l’exposiziun en quella fuorma: «Duront las lavurs preparatorias vein nus intervegniu che la tribuna per ina persuna originala ei daventada unfrenda d’in donn d’aua.» Mo era en general seigien paucs objects da lezs temps conservai. Las fotografias ed objects exponi derivan perquei per gronda part dils vegnentsuenter da Zarli.

Per tuttina saver dar in element central a «Davon e davos las culissas» han la curatura e la menadra da project decidiu da schar reconstruir la tribuna solo. Quei a maun d’in model ch’ei medemamein exponius sper la tribuna nova. Mo grazia al model seigi ei stau pusseivel da construir ina tribuna solo sco quella da Zarli. «Ina dallas sfidas ei stada d’eleger las colurs che sedistinguan da quellas dil model. Las colurs originalas ein buc enconuschentas, cunquei ch’ei dat digl original mo fotografias alvneras», ha Felicita Felley explicau.

Ina tribuna d’empristar

Per l’exposiziun munta la tribuna plinavon era cuosts nunprevedi. Quels cuosts vulan la curatura e la menadra da project perquei cuvierer silmeins parzialmein cun in crowdfunding. «Nossa finamira ei da recaltgar en tut 9500 francs. Actualmein essan nus tier rodund 2000 francs», aschia Felicita Felley ch’ei denton pli che perschuadida dalla nova tribuna: «Cun quella mantenin nus la regurdientscha da Zarli e purtein ina part dad el en nies temps.» En connex cun il crowdfunding eis ei numnadamein era pusseivel d’empristar la tribuna da Zarli per il diever privat. Aschia sa tgi che vul seschluitar ella rolla digl actur e cabarettist da Trun. Lez veva mintgamai creau ina rolla per mintga vart dalla tribuna rotabla.

Zarlis dapertut

Trun fa denton buca mo reviver siu actur e cabarettist famus culla nova exposiziun. Ad el ei numnadamein era dedicau il festival da tribunas «Dapertut». Sco la co-menadra dil festival Paula Nay ha ditg, vegnan el decuors dil fenadur plazzadas pintgas tribunas en differents loghens a Trun, per exempel alla staziun, entuorn la Casa Carigiet ni tiel Museum Cuort Ligia Grischa. Igl uost sepresentan lura artistas ed artists dils pli differents geners cun musica, cabaret, sault e teater sin quellas. «La finamira ei da purtar la tribuna da Zarli el futur e da far reviver quella. E secapescha astga ina e mintgin era muntar spontanamein ina dallas tribunas», aschia Paula Nay. Quellas vegnien plazzadas per duvrar.