«L’alternativa ei da serrar il Postigliun»
L’entrada principala ella Bar Postigliun a Mustér sto vegnir engrondida. Quei pretendan las prescripziuns per la protecziun encunter incendis. Pil possessur Pirmin Monn ei quei cumbinau cun cuosts da rodund 20 000 francs. «L’alternativa da quell’investiziun ei da serrar il local», di el.
Da Daniev endamaun 2026 ha in incendi ella Bar Le Constellation a Crans-Montana pretendiu 40 unfrendas mortalas e 119 blessadas e blessai, per part grev. Ils motivs exacts da quella catastrofa ein aunc adina ella fasa dallas examinaziuns entras las autoritads da persecuziun penalas. Spert ein possessuras e possessurs da semegliontas localitads sedumandai, schebein lur infrastructura corrispundi allas prescripziuns.
Schau cussegliar
In’jamna suenter la catastrofa ha la FMR visitau il menaschi dalla Bar Postigliun a Mustér. Avon l’avertura il december 2023 era ella vegnida renovada. Christina e Pirmin Monn han detg lu sin damonda: «Avon che renovar las localitads havein nus giu contact cull’Assicuranza da baghetgs dil cantun Grischun. Ensemen cul representant da lezza havein nus schau cussegliar tgei materials nezegiar per renovar il local. Tenor quei concept ei la segirtad garantida tier nus.»
Tonaton adattaziuns
Suenter la catastrofa a Crans-Montana ha ei lu dau ina controlla dall’Assicuranza da baghetgs dil cantun Grischun ella Bar Postigliun. «Ils 17 da fevrer 2026 ein nossas localitads vegnidas controlladas. Ils 24 da fevrer 2026 havein nus lu survegniu a scret tgei ch’ei da midar respectivamein d’adattar», di Pirmin Monn. Ella bar ha stuiu vegnir montau duas ulteriuras cazzolas cun akku. Quellas glischan era il mument che l’electricitad disdescha.
Sin fundament dil plaz per persunas sto igl esch principal ell’emprema alzada vegnir engrondius. «Igl esch sto sesarver anora e buca sco ussa anen. Ultra da quei sto el vegnir engrondius da 80 sin 120 cm ladezia. L’altezia ch’ei ussa 2 m sto vegnir augmentada sin 2,1 m», declara Pirmin Monn. Quell’investiziun che pretenda in auter esch sco era midadas vid il plantschiu su e sut, ein calculadas cun rodund 20 000 francs. «Quei ei lescha. Nus havein il temps da far quellas lavurs entochen la fin da settember 2026», di Pirmin Monn. Ei seigi previu da far las lavurs questa stad: «Naven da s. Placi havein nus serrau il menaschi per dus meins.»
L’alternativa fuss da serrar
A Christina e Pirmin Monn resta negin’autra lètga che d’engrondir igl esch. «L’alternativa fuss da serrar la Bar Postigliun. Quei lein nus denton buc. En emprema lingia perquei che nus havein gia investiu fetg bia ellas localitads e per l’autra perquei che nus lein porscher ina caschun da sentupada alla glieud», di Pirmin Monn. Tuttina sepresenta tiels conjugals la damonda dalla finanziaziun da quell’investiziun. Per saver garantir quella ein els sedecidi da spluntar per sustegn finanzial sur il portal «happy pot». Quei ei in portal che rimna daners per projects. Entochen ussa eis ei gia reussiu da rimnar biebein 6000 francs.
Sperar sin sustegn finanzial
Pirmin Monn spera ch’ei reusseschi da finanziar quell’investiziun, surtut era perquei ch’il menaschi marscha plitost sin flomma brausla: «En sesez havein nus aviert il local per porscher ina caschun da sentupada alla giuventetgna. Mo ils hosps ch’ein pli giuvens che 25 onns havein nus gleiti dumbrau.» La Bar Postigliun amiez il vitg da Mustér ei stada serrada biars onns. Ils 23 da december 2023 han Christina e Pirmin Monn – ils possessurs dallas localitads – allura decidiu d’arver il menaschi.
Gust da leger dapli?