«Ei ha duvrau in pei-tgil»

Igl ei in novum en Surselva, la pratica da higiena dentala «La Diala» a Mustér. Quella ha Fabienne Columberg aviert avon biebein nov meins cull’intenziun da saver praticar siu mistregn en moda pli persunala e pli flexibla. «Ussa sun jeu mi’atgna scheffa e sai prender peda per clientas e clients», ha la giuvna da 30 onns explicau enviers la FMR sia decisiun che seigi denton buca stada ina sempla. Mo la finala hagien collegas che luvravan gia sur sesezzas sco higienicras da dents encuraschau da far il pass ell’independenza. «Gie, ei ha duvrau in pei-tgil dallas collegas», ha Fabienne Columberg admess.

Finanzas, organisaziun, administraziun

Sco la giuvna da Mustér ha fatg da saver, seigi ei denton stau la dretga decisiun da far quei pass, malgrad las sfidas d’arver ina pratica: «Gest all’entschatta drova ei curascha da far investiziuns ella localitad ed ils instruments necessaris. Jeu hai denton saviu surprender la gronda part da secund maun. Mo la sutga ei resch nova. Quella sto esser cumadeivla, pertgei clientas e clients duein sesentir bein tier mei.» E quei para dad esser il cass. Sco Fabienne Columberg ha saviu raquintar, seigi in da ses clients era schon sedurmentaus silla sutga.

Sco higienicra da dents independenta sto Fabienne Columberg denton buca mo sefatschentar cun finanzas e clients dormulents. Sco atgna scheffa ei ella da niev era responsabla per l’organisaziun e l’administraziun. Era quei audi tier sia lavur e sappi esser ina sfida all’entschatta, porti denton era dapli variaziun el mintgadi. Ina variaziun, culla quala Fabienne Columberg sto denton buca sefatschentar tschun dis ad jamna. In di lavura ella numnadamein vinavon en ina pratica a Cuera. E quei fetschi senn: «Aschia vai jeu in’entrada fixa e sai cunzun era sebrattar cun collegas. Quei muncass schiglioc a mi persula a Mustér.»

Clients da tuttas sorts

La bilanza che Fabienne Columberg sa far suenter nov meins ei denton tuttafatg positiva: «Jeu hai survegniu dabia sustegn e sun fetg engrazieivla persuenter. E sco jeu hai udiu appreziescha la glieud dalla regiun da veser ina fatscha enconuschenta ella pratica.» Mo ei seigi lu tuttina buca mo indigens che vegnan tier ella en pratica. «Igl ei persunas da tuttas vegliadetgnas e tuttas sorts. Era turists svizzers e digl exteriur. A mi fai plascher da saver tractar glieud da tut il mund.»

En la pratica vul quei dir che Fabienne Columberg schubregia cunzun dents. Pli e pli vegni sia clientella denton era per in tractament da bleaching. «Quella purschida ei denton aunc buc aschi enconuschenta», aschia la giuvna higienicra dentala che porscha plinavon era bischutaria da dents. Tut pia per che quels fetschien ina buna pareta. «E quei ei ozildi adina pli impurtont alla glieud», constatescha Fabienne Columberg.

Mo cun schar schubergiar professiunalmein ils dents seigi quei denton buca fatg. Ei drovi ina buna tgira quotidiana e dapli. «A mes clients e clientas recamondel jeu secapescha era da schar far controllas regularas tiel dentist. Quei va maun en maun culla higiena dentala.» E contribueschi la finala era a sia finamira per la clientella, numnadamein che quella sappi mantener ils agens dent aschi ditg sco pusseivel.