En media 30 persunas al di

Il nov local da consum a Cuira ha pliras finamiras: El less meglierar il sentiment da segirtad per la populaziun ed era meglierar la situaziun da las persunas dependentas. Ultra da quai vuless ins grazia a questa localitad era render main attractiva la citad per toxicomanas e toxicomans dad auters chantuns. Avant exact trais mais, l’entschatta d’avrigl 2026 ha la citad avert il local da consum, numnà uffizialmain «Post da contact e da consultaziun cun local per consumar drogas».

Ina da las pli grondas scenas avertas

La scena da drogas a Cuira è numnadamain creschida ad in crescher en il decurs dals ultims onns. En il Stadtpark, in parc urban a l’ur da la citad veglia, è sa sviluppada ina da las pli grondas scenas da drogas avertas en Svizra. Durant ils dis da grond travasch dumbrava la Polizia da la citad da Cuira passa 50 persunas en il Stadtpark. Il cumandant da la Polizia da la citad, Andrea Deflorin, ha declerà questa mesemna en occasiun dad ina conferenza da medias che la polizia n’haja betg spetgà che quella scena svaneschia entaifer be trais mais. «Nus n’essan anc betg là, nua che nus lessan esser – il Stadtpark è anc adina in lieu impurtant per las persunas dependentas da drogas.»

Insatge è dentant sa midà per la polizia: «Nus pudain trametter ils toxicomans en il local da consum, silmain durant las uras d’avertura, tranter las 11.00 e las 19.00.» Durant quellas uras na vegnia betg pli tolerà da consumar e martgadar cun drogas en il spazi public – ed ins intervegnia rigurusamain. Sche insatgi cuntrafetschia a quels cumonds, lura vegnian confiscadas sias drogas, la persuna vegnia denunziada e tut tenor er anc tramessa davent. «Nossa finamira è da padimar la scena da drogas e da perfin reducir quella a lunga vista», ha ditg Andrea Deflorin questa mesemna.

En media 30 persunas al di

Il local da consum vegn duvrà stediamain. En media consumeschan radund 30 persunas per di en las localitads a Cuira, en il Seilergraben en vischinanza dal Welschdörfli. Tut tenor l’aura, la repressiun tras la polizia e la disponibladad da las substanzas varieschan las cifras però fermamain, sco ch’il manader da l’Agid da survivenza dal Grischun (UHG), Carlo Schneiter, ha explitgà e bilantschà a la conferenza da medias. Passa 90 persunas èn sa registradas per pudair consumar en las localitads. Questa cifra surpassa tenor Carlo Schneiter las aspectativas.

Cun distanza il pli savens vegn tenor il manader da l’UHG fatg diever dal local per inhalar crack e base – pia per fimar variantas da cocain. Sper porscher spazi per martgadar e consumar drogas, serva il post da contact e consultaziun a las persunas dependentas era sco ricover, sco lieu per l’igiena dal corp e per discurs e cussegliaziuns. Plinavant pon las persunas toxicomanas era mangiar insatge en il local.

Tenor la Polizia da la citad n’èn betg sa sviluppadas novas zonas delicatas enturn il local da consum. «La segirtad en il quartier è stabila. I n’ha strusch dà schabetgs en connex direct cun la nova purschida per persunas dependentas», ha declerà Andrea Deflorin. Plinavant na sajan era betg vegnidas chattadas en il quartier dapli squittas che avant.

Tramess davent 15 persunas

Il local da consum è avert mo per persunas toxicomanas che abiteschan en il Grischun. Tenor indicaziuns da Carlo Schneiter saja perquai vegnì refusà a var 15 persunas da sa registrar en l’instituziun. «Quai eran per part toxicomanas e toxicomans dad auters chantuns, ils quals consumavan fin uss lur drogas a Cuira. Quels han uss in pli grond problem», ha declerà Andrea Deflorin. Pli baud sajan talas persunas vegnidas toleradas. Ussa vegnian quellas dentant renviadas pli savens.

Tenor Andrea Deflorin è en mintga cas sa meglierada – durant las uras d’avertura dal local da consum – la situaziun enturn la staziun da Cuira ed en il center da la citad. La raschun: Il traffic cun drogas saja stà collià per regla cun agressiun. Ussa vegnia martgadà en il local da consum. Plinavant vegnia consumà durant il di pli darar en las tualettas publicas. Problems dettia dentant tuttina anc en citad, spezialmain la damaun, cura ch’ils toxicomans giajan a batlegiar per pudair acquistar novas drogas.

Ultra da quai ha il cumandant da la Polizia da la citad constatà en la conferenza: La criminalitad per acquistar drogas na saja betg sa sbassada. En quel connex n’haja il local da consum betg gì in’influenza – però, cun in tal svilup n’haja la citad era betg fatg quint.

In test da trais onns

Per Patrik Degiacomi (PS), il cusseglier da la citad da Cuira ch’è responsabel en chaussa, meglierescha il spazi da consum la situaziun per toxicomanas e toxicomans – ed era quella da la populaziun. Questa mesemna ha el dentant era ditg: «Talas midadas dovran temp – intginas sfidas ans restan anc.»

Il manaschi da pilot cuntinuescha durant trais onns e vegn evaluà externamain. Per la stad 2027 datti in rapport en chaussa. En l’avegnir vuless la citad etablir en il local da consumar in drug-checking, «per pudair eruir meglier, tge che vegn insumma consumà.» Plinavant duain las purschidas d’abitar per persunas dependentas vegnir meglieradas. Patrik Degiacomi ha accentuà danovamain questa mesemna ch’el beneventass, sch’il Grischun sa participass vi dad in project da pilot per distribuir – a moda controllada da medis – ina substanza che substituescha cocain.