Per habitaziuns, hostel, commerci ni sanadad?
Co duei la casa da scola a Rueras vegnir nezegiada igl avegnir? Da quella damonda ei ina gruppa da lavur sefatschentada questa primavera. Ella propona differentas ideas: Habitaziuns, hostel, casa da commerci ni center sportiv-medicinal. Il proxim temps vegn la suprastonza communala da Tujetsch a discutar las ideas.
La casa da scola el vitg da Rueras ei vegnida baghegiada igl onn 1959. Da gliez temps haveva Rueras aunc biars affons e consequentamein era scolars. 1997, 1999 e 2002 ei il baghetg cun ina fuorma empau speciala vegnius renovaus. La casa da scola ha ina surfatscha da localitads da totalmein 2800 meters quadrats. 2007 ha la vischnaunca da Tujetsch decidiu da serrar la casa pil menaschi da scola e da centralisar l’entira scola a Sedrun. Dapi lu ei il diever dalla casa staus pliras ga en discussiun. Avon diesch onns eis ei schizun stau tema da vender la casa, la fin finala ei quei pass lu tonaton buca vegnius fatgs. La casa ha denton era surviu sco camp da gruppas ed ei adina puspei era vegnida nezegiada d’uniuns, societads dil vitg ni dalla Casa Soldanella.
Igl avegnir dalla casa
Questa primavera ei ina gruppa da lavur sefatschentada digl avegnir dalla casa da scola a Rueras ed in’autra dall’integraziun da persunas che prendan dimora ella vischnaunca da Tujetsch (mira box). Las duas gruppas mischedadas cun indigens e secundindigens ein vegnidas accumpignadas da Tamara Bardy e Severin Geisseler da communicaziun.ch da Glion. Lezza interpresa ha la fin finala era evaluau ils resultats. Pertuccont la casa da scola a Rueras ein differentas ideas per in nez futur vegnidas sin meisa. La gruppa ha tematisau aschibein il nez dalla casa sco ella sepresenta oz sco da spazzar ella ed ereger in auter edifeci en quei liug.
Habitaziuns ein in basegns
Sco ins sa leger ell’ediziun da La Tuatschina, igl organ ufficial dalla vischnaunca da Tujetsch, dils 26 da zercladur 2026, ei il meini da procurar per novas habitaziuns per famiglias e giuvens carschi predominonts. La gruppa da lavur vesa ton il basegns per famiglias sco per persunal. Autras variantas discussiunadas ei ina mischeida cun habitaziuns e localitads da commerci ni era in hostel cumbinaus cun habitaziuns pintgas. Vegnida tematisada ei era l’idea da scaffir in center sportiv-medicinal ni ina casa da commerci. La gruppa ei era sefatschentada dall’idea da spazzar la casa da scola e d’ereger leu la «Tuor da Rueras», ina casa cun in’altezia da 60 meters cun habitaziuns primaras.
Novas ideas
«Pliras ideas presentadas dalla gruppa da lavur ein da quellas che nus havein era gia discussiunau ella suprastonza communala. En quei senn confirmeschan ellas nies meini. Ei dat denton era novas ideas sco quella dil center sportiv-medicinal ni d’in hostel. Per nus eis ei stau impurtont da survegnir impuls da tiarzas persunas ed aschia da porscher ina procedura da participaziun», di il president communal Martin Cavegn e puntuescha: «Il desideri da habitaziuns per indigens vegn puntuaus claramein dalla gruppa da lavur.»
In mund da giugs
Oriundamein era ei previu da nezegiar ina part dalla casa da scola a Rueras per in mund da giugs. «Quell’idea ei buca stada tema da discussiun ella gruppa da lavur, mo ella ei aunc buca giud meisa. In mund da giugs fuss in’alternativa favoreivla da divertiment era da dis da malaura», di Martin Cavegn. Las ideas dalla gruppa da lavur e quellas dalla suprastonza communala duein vegnir examinadas il proxim temps. Il nez futur dalla casa da scola a Rueras duei vegnir tematisaus el niev program dalla legislatura communala che ha entschiet igl emprem da fenadur 2026. Sco Martin Cavegn di, duei quei plan allura vegnir presentaus en La Tuatschina.
Co integrar meglier persunas che secasan ella val?
Sper la gruppa da lavur ch’ei sefatschentada dil nez futur dalla casa da scola a Rueras ha in’autra gruppa da lavur tematisau l’integraziun da niev-arrivai ella vischnaunca da Tujetsch. Ella resumaziun dalla lavur dalla gruppa, publicada en La Tuatschina, constatescha ella che la vischnaunca da Tujetsch porscha gia in’aulta qualitad da viver ed ambient favoreivel per famiglias. Leu menziunescha la gruppa da lavur era las pusseivladads da sport e temps liber. Las mesiras ch’ella propona a cuorta vesta per esser aunc pli attractiva ei da scaffir spazi da habitar pagabel, installar in post da contact ni ina persuna da contact per persunas che prendan dimora en vischnaunca, e meglierar la survesta d’informaziuns ed arranschaments. A mesa vesta propona ella da meglierar las pusseivladads dil traffic public, promover il lungatg e la participaziun politica sco era d’optimar la communicaziun. Ina mesira a liunga vesta, proponida dalla gruppa da lavur, ei da crear ulteriuras plazzas da lavur e d’emprendissadi. Sco dallas propostas pil nez dalla casa da scola a Rueras vegn la suprastonza communala era a sefatschentar da quellas per l’integraziun dils niev-arrivai. (fmr/hh)
Gust da leger dapli?