La stad drova igl unviern

La Infra Mundaun SA ei vegnida fundada igl onn 2019. Ed ussa ein ils credits dallas duas vischnauncas e dallas pendicularas concedi. Sursaissa ha decidiu il credit dad 11.5 milliuns igl avrel 2026 e la vischnaunca Lumnezia ha priu la medema decisiun ils 14 da zercladur 2026. «Ussa eis ei da dar gas e finalmein realisar», ha Marco Casanova, igl anteriur skiunz da professiun ed oz president dalla Infra Mundaun, detg en in rapport dalla gasetta Suedostschweiz avon paucas jamnas. Era Kevin Brunold, il directur dall’organisaziun Surselva Tourismus AG ha detg ch’en emprema lingia seigi ei ussa d’investir en novs indrezs da far neiv.

20 milliuns per canuns da neiv

Tenor Kevin Brunold vulan las destinaziuns da sport d’unviern da Surselva Tourismus AG investir cun prioritad ellas stagiuns d’unviern. Gest els intschess da skis entuorn il Mundaun drova ei urgentamein indrezs d’enneiver, di Kevin Brunold. «La finamira dall’Infra Mundaun ei d’equipar mintga pendiculara cun ina pista ennevada artificialmein. Oz ei quei buc il cass. Igl ei denton ina mesira per garantir bunas pistas era en unviarns cun pli pauca neiv.» Per quella mesira impunda l’Infra Mundaun pressapauc 20 milliuns francs. En tut duei ei dar 22 kilometers novas pistas ennevadas dalla vart da Sursaissa Mundaun e dalla vart lumneziana. Per saver producir neiv avunda vegn ei baghegiau per sis milliuns francs in niev lag d’accumulaziun. Quel tschaffa 300 000 meters cubics aua. 

Indrezs indispensabels

Il directur da Surselva Tourismus AG Kevin Brunold accentuescha en discuors culla FMR che bunas stagiuns d’unviern seigien indispensablas. Quei surtut era per haver las resursas finanzialas necessarias per las stagiuns da stad. «Senza indrezs d’enneiver mauncan las pistas attractivas per hosps ed indigens. Quei san ins era leger ellas cefras dallas sviultas dallas pendicularas. Schliatas pistas han pia era consequenzas negativas per la stad», di Kevin Brunold. «Igl unviern gudignein nus ils raps che nus duvrein per investir ella stad.»

Neiv artificiala porta raps

Kevin Brunold ei perschuadius ch’ina producziun da neiv artificiala efficienta els territoris da skis da Surselva Tourismus AG sepaga. El di ch’in territori da skis cun pistas preparadas cun avunda neiv artificiala da buna qualitad hagien ina influenza positiva era sin las pernottaziuns els hotels dalla regiun. «Sch’igl ei pusseivel d’ennevar il territori, vegnin nus da tener sidretg senza problems il menaschi d’unviern.»

Midada dil clima ha consequenzas

La midada dil clima seigi cunzun igl unviern ina dallas grondas sfidas per la destinaziun turistica entuorn il Mundaun, di il directur da Surselva Tourismus AG. «Nus havein percepiu ils davos onns ch’ei dat adina pli pauca neiv e ch’ei plova igl unviern entochen siado els aults.» Temperaturas pli e pli cauldas detti ei era la stad e perquei tscherchi la glieud d’ir els aults, di Kevin Brunold. «Empau dils raps che las vischnauncas e las pendicularas han concediu vulein nus investir en infrastructuras da stad sco per exempel ella senda da viandar tematica sil Péz Mundaun, ella tuor da reiver a Vella/Triel ni era ella ballabeina da bike ch’ei en planisaziun.»

Deplorablamein senza Ilanz/Glion

Las vischnauncas finanzieschan mintgina ina cumpart 40 % dil credit da 25 milliuns. Ils 20 % che restan pagan las pendicularas Sursaissa Mundaun. Era la vischnaunca da Ilanz/Glion s’auda tier la medema regiun turistica sco Sursaissa Mundaun e Lumnezia. Malgrad quei ha il suveran da Ilanz/Glion renviau igl onn 2017 da separticipar alla Infra Mundaun SA. La vischnauncas Sursaissa Mundaun e Lumnezia e las pendicularas da Sursaissa Mundaun han da lezzas uras priu notizia dalla decisiun da Ilanz/Glion ed han planisau persulas las activitads e las infrastructuras dall’Infra Mundaun naven da 2019.