Hannibal ò contanschia igl pass

Da rachintar l’istorgia plagn aventuras digl general Hannibal e chegl angal cun maletg, musica ed ena culissa tgi vo a pêr cun l’istorgia, chegl so far Giovanni Netzer, igl intendant digl Origen Festival Cultura. Per el è igl Pass digl Gelgia en li d’inspiraziun, en flatg da blera istorgia  e la dretga culissa per inscenar en teater sot tschiel avert.

Siva da 16 onns sen igl Gelgia

Scuvert igl Pass digl Gelgia scu li per preschentar agl liber en teater musical veva el gio igl 2010 cugl toc «La regina da Saba», noua tg’el veva insceno en bavegna statal per la regina e chegl angal cun solt, musica e las pizzas imposantas scu culissa.

Ossa, 16 onns pi tard, deditgescha Giovanni Netzer igl gi agl liber betg ad ena persunga roiala, mabagn agl ferm, pussant ed ancunaschaint general Hannibal. El tg’era partia dall’Africa vers la Spagna e da lò an direcziun Roma per mussar la sia fermezza. Alla fegn finala ò el cun sies 50 000 suldos, 50 elefants e nundumbrevels tgavals gia da capitular sen en pass tgi sa lascha pi prubabel cumparagler cugl Pass digl Gelgia. Er sen chel ò Hannibal per deir uscheia «da capitular» chesta stad e chegl anc 15 gedas.

Ena prestaziun mentala e corporala

Rachintada vign l’istorgia sainza en pled e chegl da 15 saltunzs e saltunzas tg’èn pero er actours ed actouras da vaglia. Igls protagonists e las protagonistas digl gi agl liber Hannibal dereivan dallas miglras tgesas da ballet e da teater digl mond. Ad els gartegigl d’interpretar an moda reala en cumbat plagn forza scu er ena scena amabla e fegna. Mintga muvimaint è perfetg, tgapibel e cunzont interpreto schi real tgi la seira davainta en mument tgi para er agl public d’esser sez ena part dall’armada digl general Hannibal.

An îgl dat alloura er cun tge expressiun, persvasiun e passiun tgi igl ensemble dat agl maletg da tribuna la dretga noda. Igl è betg angal ena gronda prestaziun teatrala, mabagn er ena prestaziun mentala e corporala.

Igl Pass digl Gelgia è scu fatg

Fenomenala è sa tgapescha la culissa, cun las muntognas imposantas, la cuntrada malanguleiva plagn crappa. Gist chella cuntrada ò Giovanni Netzer tscharnia per igls rebels tgi cumbattan cunter igl general Hannibal. All’antschatta digl gi agl liber paran igls rebels d’esser muntanelas tgi on interess da vaseir tge tgi succeda tot sen la tribuna dalla gronda tenda. Pi dei tgi igl gi agl liber cozza e pi manevel tgi igls rebels, tots vistgias cun mantels da calour bregna tgi sa mesda adegna daple aint igl far notg.

Igls rebels èn actouras ed actours laics e gist chel aspect dat all’antiera inscenaziun er en’atgna taimpra. Hannibal tschertga cunter igls rebels la victorgia ed uscheia davainta igl Pass digl Gelgia en li, noua tgi vign cumbattia per pussanza e glorgia.

Collaboraziuns siva da blers onns

La gleisch naturala, la nateira singulara e la cuntrada muntagnarda dattan sa tgapescha agl gi agl liber anc bler daple veta. Chella cumbinaziun sa dat sainza leir e gist chegl è er ena raschung tgi Giovanni Netzer ò eneda daple tscharnia igl Pass digl Gelgia per deditgier ad ena persunalitad dall’antica.

Cun Lorenz Dangel ò el alloura catto en cumponist tgi canoscha igl pass. Cun la sia musica vign el da dar agl gi sot tschiel avert anc daple tensiun e vivacitad. Igl cumponist tudestg so gio siva da ples onns er tge tgi Giovanni Netzer spetga. Els von bagn a pêr, cun esser tots dus plagn ideias e magari er fantascheias. Chegl è alloura er d’attribueir a Martin Leuthold tg’è sto responsabel cun Lucia Netzer-Peduzzi pigls costums. Chels costums  dattan an veir senn anc daple splendour agl gi agl liber Hannibal. Blera splendour dereiva er da Serge Schmucki – ena persunalitad, schi sa tracta per gleisch ed illuminaziuns.