L’odur misteriusa da Luven

El freda bien. In tec vanilla, pauchet entscheins, levet tschugalata, aunc zatgei dultschin. Forsa la rosa? Ni forsa era schiember? Igl ei en scadin cass ina buna odur, ed ina misteriusa. Il parfum Alverin ei ina scuvierta. Igl ei buca in product renomau, mobein in parfum niev che vegn da Luven. Da principi ei in parfum ina caussa fetg persunala ch’ei cumbinada cun gusts, sentiments e sensualitad. Pli baul druvavan dunnas ed umens l’aua da Cologna. Il guoter cun quei liquid odurus tipic era reservaus per fiastas, firaus e nozzas. Oz dat ei ina immensa variaziun da marcas. Pilpli laian ins influenzar dil prezi. In parfum car sto esser per forza in bien. Ed in carischia aunc megliers. «A mi ei quei schabegiau onn vargau. Ella stizun ch’jeu sun entraus hai jeu elegiu aposta in car. Quel ha lu trumpau mei totalmein», raquenta Samuel Vinzens.

Buca ina industria

Aschia ei l’idea naschida da far sez in parfum. Cun siu frar pli giuven Jonathan ha gl’um da 35 onns fatg in concept e sviluppau vinavon l’idea. Gl’unviern vargau han els entschiet ad experimentar cun destilats odurus. Ils novizs ella branscha han scuviert in hobi special e survegniu tschaffen da crear enzatgei diltuttafatg niev. «Mintga manipulaziun e mintga pass che nus fagein ei lavur a maun», declara Jonathan. Egl anteriur clavau sper casa han ils dus frars endrizzau in pign luvratori. Igl ei buca il labor nua ch’els produceschan il parfum. «Lez fagein nus en casa en ina combra separada», tradescha Samuel. En quella casa sisum il vitg da Luven habiteschan el e sia dunna Claudia.

Il labor da parfums a Luven ei il cuntrari d’in menaschi industrial. Tut auter che a Grasse en Frontscha. Samuel e Jonathan Vinzens san ch’il center mundial dils parfums ei ella Provence. Mintga turist che viseta quei marcau sto esser staus el «Musée International de la parfumerie (MIP). Ils dus producents da parfum da Luven ein aunc buca stai a Grasse. Els han experimentau ils davos meins cun mischeidas, fan ussa lur atgna odur e vulan buca seschar influenzar. Igl ei clar che Samuel Vinzens, igl iniziant dil project, tradescha buca la consistenza exacta dil parfum. «Per nus dominescha l’odur da lenn», gi il destillader da hobi.

Duvrau curascha

El e Jonathan han entschiet a producir. Omisdus ein mistergners e disai da luvrar cun maschinas. Samuel ha empriu ella Fabrica da Domat construider d’indrezs e d’apparats e Jonathan ei stagner da carrossaria diplomau. Gl’inschign da mesirar, furar, turnar, glimar e tagliar drova el ussa per far las buttegliettas.

Tgei finamiras vulan ils interprendiders giuvens contonscher cun lur project da far parfum? «Nus essan in ‘startup’ e nus vulein mirar sch’ei dat resuns, sche nossa lavur ha insumma il success giavischau», rispunda Samuel Vinzens. El ha creau ina pagina d’internet cul num «Maison Alverin». Professiunalmein lavura el en plazza cumpleina sco survigilader da serenera egl implont Sablun a Rueun. Il temps liber unfrescha el per sia «casa Alverin» a Luven.

Ei dat parfüms feminins e parfüms masculins. Quel da Luven dils frars Vinzens savess tuccar omisduas schlatteinas. Ch’ei ha duvrau empau curascha d’anflar ina nischa el sectur dils parfums conferman Samuel e Jonathan. «Nus vulein ussa mirar sch’ei funcziuna cun nossa idea», gi Samuel ed il frar dat il tgau. Ferton ch’il vegl d’els dus s’occupa dalla pagina d’internet e da presentar il product finiu, ei Jonathan responsabels da scaffir la butteglietta cul vapurisader.

Semtgau per ir viadora

Mintga flacon seigi individuals ed in unicat da lenn, declara Jonathan e demonstrescha co el gliema e fuorma il lenn. Igl ei lenn da nugher ch’el elaborescha cul tradel e culla maschina da turnar. La firma da startup ch’ils frars Vinzens han fundau ha in avantatg. «Destillarias da parfum dat ei biaras. Denton ch’in producent fa sez la butteglietta dil parfum, ei enzatgei tut niev», puntuescha Samuel Vinzens.

Il product ch’ei el vapurisader descriva la branscha sco «extrait de parfum». Maison Alverin garanteschi in liung temps da conservaziun, la receptura seigi harmonica, cumpleina ed eleganta, san ins leger ella pagina d’internet. Il product exclusiv da Luven ei semtgaus per ir viadora el mund. In product da massa eis ei buc. «Nus havein empleniu nies parfum el vapurisader, quel ei confecziunaus el guoter da lenn cugl uvierchel. Ussa mirein nus tgei che schabegia», gi Samuel Vinzens.