Il credit per la patinera ei pli che dispiteivels
Dumengia proxima, ils 12 da fenadur 2026, decida il suveran da Mustér davart il credit dad 1,11 milliuns francs per la sanaziun dalla patinera el Center Fontauna. Il comité d’iniziativa recamonda in GIE, il cussegl da vischnaunca in NA. La FMR ha discurriu cullas duas partidas: D’ina vart Bruno Flepp sco coniniziant che giavischa la sanaziun, da l’autra vart la presidenta dil cussegl da vischnaunca, Theres Burri Gadola, ch’ei dil meini che quell’investiziun seigi buca persistenta.
Il glatsch artificial el Center Fontauna a Mustér dat da discutar. Suenter ch’il cussegl da vischnaunca ha refusau questa primavera il credit per sanar quel per 1,11 milliuns francs, ei vegniu rimnau suttascripziuns per tonaton realisar quei project. 280 persunas han suttascret l’iniziativa. Dumengia proxima, ils 12 da fenadur 2026 decidan vischinas e vischins da Mustér all’urna davart il credit dad 1,11 milliuns francs. Co s’expriman ils adherents, respectivamein ils adversaris da quei credit? La FMR ha discurriu cun Bruno Flepp ch’ei commember dil comité dall’iniziativa e cun Theres Burri Gadola ch’ei presidenta dil cussegl da vischnaunca.
FMR: Il credit per sanar la patinera el Center Fontauna ei pli che dispiteivels. Daco s’engascheis Vus per, respectivamein encunter quei credit?
Bruno Flepp: La patinera ei ina purschida per las famiglias indigenas da Mustér e contuorn che fan stediamein diever da tala. Ella ei era ina buna purschida per la giuventetgna che va cun patinas ni che dat hockey. Sco liug turistic fuss ei in disavantatg, sche quella purschida vegness strihada per tut nos hosps e proprietaris da secundas habitaziuns. Plinavon ei il glatsch ina fetg buna alternativa da sport cura che la neiv maunca.
Theres Burri Gadola: Investar varga in milliun francs per ina patinera che sa vegnir nezegiada maximalmein treis meins ad onn e che caschuna cuosts annuals da rodund 100 000 francs ei per la maioritad dil cussegl da vischnaunca negina investiziun persistenta.
Vus argumenteis Vossa posiziun denter auter cun cuosts da menaschi memia aults. Dess ei alternativas tiel glatsch el Center Fontauna ni in sistem da glatsch, respectivamein cuvrida, cun dameins cuosts?
Theres Burri Gadola: Il cussegl da vischnaunca ei sefatschentaus d’alternativas igl onn 2022. Ei dat bein alternativas pli favoreivlas sco per exempel in glatsch sintetic, denton buc ecologicas.
Tenor il messadi da votaziun caschuna la patinera in deficit d’annualmein rodund 60 000 francs. Ei quel responsabels ord vesta dalla vischnaunca?
Bruno Flepp: Culla sanaziun dalla patinera vegnan quels cuosts segiramein reduci enviers ils onns vargai. D’ina vart cul sistem da sferdentar ch’ei bia pli efficients cun quella matta speciala, da l’autra vart entras la renovaziun dils indrezs. Ils davos onns ei la patinera stada aviarta naven da miez november tochen la fin fevrer. Schebein quels cuosts ein era vinavon responsabels ni buca, decida il pievel entras la votaziun.
Ch’ils indrezs dalla patinera ein en in schliet stan ei en sesez enconuschent dapi plirs onns. Daco ei igl engaschi per la patinera buca vegnius giavischaus en connex culla sanaziun dil Center Fontauna ch’ei succedida avon entgins onns?
Bruno Flepp: Quei ei ina damonda ch’ins sto tschentar alla cumissiun dil Center Fontauna. Jeu supponel ch’ins ha vuliu tener aschi bass sco pusseivel las investiziuns ell’emprema etappa e perquei buca vuliu surcargar la sanaziun dil Center Fontauna e periclitar quella tier la votaziun.
La patinera producescha bein in deficit alla vischnaunca, mo ella ei ina purschida alternativa pil temps d’unviern. Sto tut render quei ch’ina vischnaunca porscha?
Theres Burri Gadola: Nossa destinaziun porscha nundetg biaras pusseivladads igl unviern. Per exempel pistas da ski e da cuorsa liunga, sendas da gianellas, sendas d’unviern ni sendas da scursalar. Vinavon offerescha Mustér biaras purschidas sur onn, independent dall’aura: Reiver, bouldrar, dar tennis, dar badminton, far fitness. Il futur dat ei cul parc da giugs e moviment in’ulteriura purschida alternativa. Aschia sa Mustér desister d’ina patinera artificiala, cunzun era perquei che patineras naturalas stattan a disposiziun – a Sedrun e Trun. Per bia buca tut renda quei ch’ina vischnaunca porscha. Las expensas ston denton star en ina sauna relaziun cul nez dalla purschida. Per la maioritad dil cussegl da vischnaunca ei quei tier la sanaziun dalla patinera artificiala buc il cass.
280 persunas han suttascret l’iniziativa. Tgei resultat spitgeis Vus dumengia proxima?
Bruno Flepp: Jeu sun fetg optimistics, cunquei ch’igl ei reussiu da rimnar quellas suttascripziuns enteifer mo diesch dis.
Theres Burri Gadola: Muort las vacanzas spetgel jeu ina bassa participaziun ed in stretg resultat.
Gust da leger dapli?