A Rona èn tiradours e tiradouras stos igl pi bagn

Er a Rona è dumengia passada allas 12.00 nia do igl davos schoz dalla 59avla Festa federala da teir. Durant tschintg fegns d’emda è er nia tratg agl stand da teir Livizung sen la distanza da 300 meters egn digls 16 stetgs. Per de on tranter 60 e 70 tiradours sagetto a Rona e chegl dalla dumang allas 07.30 anfignen allas 19.00. Vurdo tgi tot funcziunga dalla dumang alla seira on 20 persungas, seia chegl aint igl biro, aint igl stand e sa tgapescha ainten la tenda da festa.

Dalla Svizra franzosa a Rona

L’atmosfera è durant tots 15 deis stada grondiousa chegl cunzont cun participants e participantas neir tractos a Rona scu veir rètgs. Remarcabel è tuttegna tgi radond 20 uniuns da teir dalla Svizra franzosa on tratg lour program dalla Festa federala da teir a Rona. Els on cunzont galdia la hospitalitad, gia plascheir da far cunaschientscha cun ena regiun tgi cunaschevan betg ed er stos ventirevels tgi er a Rona è nia discurria franzos. Fitg simpaticas alloura er las uniuns digl cantun Berna, en cantun noua tgi igl sagettar ò er aint igl 2026 anc adegna en post fix per blers e bleras. Igl è er nia fatg an en cuntign festa e chegl schizont gronda festa.

Igls pi blers resungs positivs

Rona è sto egn da chels 19 stands externs nou tg’è nia sagetto igls total 2,5 milliuns colps dalla Festa federala da teir 2026. Chel stand è er sto igl stand cun la pi lunga distanza davent da Coira, noua tgi igl center dalla festa era. Singular è bagn tgi gist uniuns digl Grischun on er tscharnia chel stand per sagettar lour program cun esser el betg aint igl manevel dalla capitala grischuna, mabagn agl our digl perimeter digls 19 stands.

Fatg igl viadi da Coira a Rona ò dus deis avant la fegn dalla Festa federala da teir er Martin Candinas, igl president digl comite d’organisaziun dalla gronda occurrenza naziunala da teir 2026. El ò salido mintga persunga persunalmaintg e gia immens plascheir da far cunaschientscha cun blers tiradours e tiradouras dalla Romandie. En amei da parteida da Martin Candinas tg’è nia aposta a Rona per antupar igl cunsiglier naziunal ò managea: «Cun santeir tè Martin a discorrer schi perfetg franzos, vessas an mintga cass pudia davantar cunsiglier federal.»

Clers e bels pleds ò el er drizzo agls organisatours dalla festa a Rona: «Igls pi blers cumplimaints, igls pi blers resungs positivs vaia retschet dallas uniuns pigl tractamaint a Rona, per l’organisaziun perfetga, la hospitalitad gentila e cunzont la cuschigna excellenta.» El vegia grond plascheir da tot chels resungs positivs. Els conferman tgi er en’uniun pi pitschna saptga organisar bagn ena festa an chella grondezza.

Anc mai vandia schi bleraint igl meis da zarcladour

Vurdo turisticamaintg è l’occurrenza naziunala da teir er stada per la regiun da vacanzas Surses en immens success. Cun pacas excepziuns on las uniuns pernotto ainten en hotel tranter Beiva e Casti u schiglio cunzont a Lai e conturn. Gregorio Torriani, igl patrung digl Hotel Solaria a Beiva ò detg tgi igls tiradours seian stos fitg ampernevels giasts. Els vegian consumo e maglea bagn. El ò detg: «Anc mai vaia vandia schi bler vegn aint igl meis da zarcladour scu igl davos zarcladour.»

Igl gioven hotelier ò er menziuno tgi profito dalla Festa federala da teir vegia er la bar Trapla tgi totga tigl Hotel Solaria. Graztga agls tiradours seia la bar marschada scu da staschung d’anviern e chegl aint igl meis da zarcladour. En’uniun dalla Romandie ò betg lia durmeir ainten en hotel, catto persiva en li singular on igls tiradours sur Mon e chegl per star sur notg ainten en’acla ed ena tenda tipi d’Arthur Albertin. Or digl aspect turistic ed economic è la Festa federala da teir 2026 pigl antier Grischun Central damai sto en success.