Dal museum a l’ufficina: A Strada vegna stampà
A Strada savura darcheu da palperi, culur e lavur. La Stamparia Strada, üna jada stamparia da l’Engiadina Bassa, as transmüda pass per pass in ün lavuratori da stampa public. Las veglias pressas nu sun be perdüttas da temps passats – ellas prodüan darcheu e mettan istorgias sün palperi.
La prümavaira passada ha la Stamparia a Strada ris-chà üna gestiun da prouva. Quella es statta ün success; l’ufficina da stampa dvainta dal 2026 üna part essenziala dal museum. Maschinas sco glieud dal fat sun prontas. Duos graficras e duos «artistas nairas» stan a disposiziun sco instructuras. Indigens sco eir giasts pon provar, experimentar e fuormar cun instrucziun professiunala vi da las pressas.
Ün accent important sun texts rumantschs
Texts rumantschs fuorman da prüma davent ün accent. Il museum collavura per quai cun persunalitats da nom e da pom chi fuorman la fatscha rumantscha da la regiun. Tant cuors cullas auturas premiadas Flurina Badel e Gianna Cadonau toccan pro la sporta sco eir uraris d’ufficina per las artistas e’ls artists da la Chasa d’artists da Scuol Nairs.
Per üna sporta chi persvada tecnicamaing ha la Stamparia ingrondi seis parc da maschinas. Üna seguonda pressa da stampa es gnüda procurada ed üna donaziun generusa ha permiss da cumanzar a lavurar cun gravüras, aquatinta ed aguoglia fraida.
Var 20 arrandschamaints drivan l’access a stampa, set e palperi. Il patrimoni cultural extraordinari da Gutenberg inscuntra nouvas ideas illa Stamparia.
Exposiziun speciala e gö medieval
In üna da las bellas stanzas dal museum d’eira gnü stampà dal 1689 – 1881. La Stamparia es bain cultural svizzer d’importanza naziunala. L’exposiziun permanenta es dedichada a la stampa istorica da cudeschs. L’exposiziun speciala «L’otra via – der andere Weg» quinta da la vita da l’autura da l’Uorsin, da Selina Chönz. Pro’l gö medieval pon vegl e giuven s’annunzchar per üna plazza sco agüdont pro Nuot Cla Janett, il fundatur da la Stamparia.
Il museum muossa la convivenza tipica da plü bod da mansteranza, abitar ed agricultura accumpagnanta. Locals d’exposiziun separats documenteschan co chi gniva vivü e fat musica dürant il 19avel tschientiner in l’Engiadina Bassa rumantscha. Preschantaziuns cun musica, cuschinar, filar e cusir fan dvantar la visita ün evenimaint. La Stamparia guarda eir cun üna tschegnada vers l’avegnir: Il plü pitschen stampader dal museum nu lavura cun tinta naira da stampar, dimpersè in 3D – culla plü fina tschiculatta svizra.
Uras d’avertüra: sonda 15 – 17 h, dals 17 lügl fin als 7 avuost e dals 9 fin als 16 october implü venderdi 15 – 17 h. A partir da la fin d’october esa posa d’inviern. Stradun 154, 7558 Strada. www.stamparia.ch
Gust da leger dapli?