«Igl ei bellezia da saver giugar a casa»
Ina cumedia criminala, ina prelecziun scenica per romontsch ed in teater per famiglias ein las producziuns digl emprem Teater da stad Surselva a Glion. La premiera ei ils 13 d’uost el curtgin dil Museum regiunal Surselva. Siat acturas ed acturs da professiun giogan las rollas dils treis tocs. Iniziau il Teater da stad Surselva ha igl actur professiunal Curdin Caviezel ch’ei carschius si a Luven e che viva dapresent a Vienna.
«Amiez la stad nescha en Surselva in niev liug d’inscunter per cultura e sentupada.» Cun quels plaids envida la pagina d’internet da Surselva Turissem agl emprem Teater da stad Surselva. Naven dils 13 d’uost 2026 detti ei in niev liug per teater professiunal a Glion informeschan ils organisaturs. Ei setracti d’in teater per tuttas vegliadetgnas, per tut ils lungatgs dalla regiun e per mintga budget.
Igl actur professiunal sursilvan Curdin Caviezel (mira boxa) ei igl iniziant dil Teater da stad Surselva. El ha getg en discuors cun la FMR ch’ei seigi in bellezia sentiment da saver turnar e giugar en Surselva pil publicum indigen.
FMR: Co vegn ins sill’idea d’organisar in teater professiunal da stad en Surselva?
Curdin Caviezel: Quei giavisch ei naschius fetg baul tier mei. Jeu sun sco giuven staus commember dalla gruppa da teater da Luven. Quei ei stau in fetg cuort mo in fetg bi temps. Leu haiel jeu fatg persenn ch’ei muncava en Surselva in teater professiunal sper las biaras ed excellentas producziuns da laics. Jeu haiel adina giu el tgau da far zacu ina producziun da teater professiunal en nossa regiun ed uss eis ei gartegiau da realisar il Teater da stad Surselva a Glion. Quellas producziuns vegnan probabel ad haver liug mintga dus onns. Las 14 producziuns dad uonn han liug el curtgin dil Museum regiunal Surselva, in liug predestinau per dar teater sut tschiel aviert.
Co ei quei per Vus da turnar dallas tribunas internaziunalas e da giugar sco actur professiunal en Surselva?
Igl ei bellezia per mei da saver giugar teater a casa. Jeu sun era spanegiaus, co ei vegn ad esser da giugar teater professiunal per la glieud ch’ins enconuscha.
Daco consista igl ensemble dil Teater da stad mo da profis e buca per exempel d’ina mischeida da profis ed amaturs indigens?
Entgins dils profis engaschai tier quella producziun ein era acturas ed acturs sursilvans e dil Grischun. Lu havein nus acturs svizzers ed internaziunals. Era sch’il Teater da stad ei in teater professiunal ei ina buna part dallas acturas ed acturs indigena. Ed ins sa gir che biaras acturas ed acturs han experientscha da giugar era sin tribunas da teater internaziunalas.
San ins dir ch’ina occurrenza sco il Teater da stad Surselva promovi il nivel dil teater insumma en Surselva?
Il teater professiunal ella regiun ei cheu per sustener l’entira scena da teater. En Surselva vegn ei gie veramein fatg fetg bunas producziuns da teater sin in ault nivel. Per mei duess ei esser in luvrar maun en maun, pia in cun l’auter. Mo quei excluda buca ch’ei dat ina formaziun da teater professiunala en Surselva. Jeu quetel ch’ina caussa duei buca sclauder l’autra.
Vus dil Teater da stad Surselva propagheis vossa purschida cun ina pagina d’internet. Vus essas era fetg activs sin las medias socialas. Tgei resuns haveis Vus survegniu entochen dacheu?
Biars resuns. Biaras e biars dian ch’ei seigi bien che nus fetschien il Teater da stad Surselva. Jeu haiel era giu resuns da persunas che dian ch’ei seigi bien che las producziuns seigien a Glion en in liug central ch’ins sappi vegnir e turnar cul traffic public.
Co ei la schelta dallas treis producziuns d’uonn succedida?
Fetg sempel. Nus havein mess sco finamira da contonscher in publicum vast. Il punct culminont uonn ei la cumedia criminala «Achtsam morden» che vegn giugada per tudestg da scartira e plidenta pia era ils turists ella regiun. «Achtsam morden» enconuschan biaras e biars forsa dils cudischs ni dalla seria da Netflix. La secunda producziun «Madame Montouchi» ei stau in giavisch da nus perquei ch’ei setracta d’ina producziun en lungatg romontsch. Ed il tierz toc «Herr Widerstand und seine Glücksmaschine» vegn giugaus en dialect tudestg svizzer e plidenta ils affons naven da tschun onns (mira era box).
In publicum vast en mira
Cun treis producziuns da differenta tempra vulan ils organisaturs dil Teater da stad Surselva a Glion contonscher in publicum vast. Quei vul dir, persunas da lungatg tudestg e romontsch, famiglias ed amaturs da cumedias criminalas.
«Achtsam morden»
Björn Diemel ei in advocat da success stressau cun relaziun stretga culla mafia. Sin squetsch decent da sia dunna viseta el in coach d’attenziun e stem. Mo schispert ch’el entscheiva ad arranschar sia veta tenor las reglas da quei coaching vegn siu mund in ord gl’auter.
Premiera ei gievgia ils 13 d’uost 2026. Ulteriuras producziuns tenor la pagina d’internet indicada sutvart.
«Madame Montouchi»
Culla producziun «Madame Montouchi» arvan Angela Collenberg e David Flepp la trucca dalla Pandora. Ina cofra d’in patissier grischun ch’ei plein objects ord in’autra epoca ha anflau la via el museum. Angela Collenberg e David Flepp seschluetan en differentas rollas e s’avischinan melodicamein a Madame Montouchi – ni tuttina buc? Tgi era insumma quella biala dunna misteriusa cun quei num aschi special?
Mardis, ils 25 d’uost allas 20.00 e sonda, ils 29 d’uost 2026 allas 17.00.
«Herr Widerstand und seine Glücksmaschine»
Signur Widerstand ei in perscrutader caotic, nunstunclenteivel, che ha l’idea geniala da sviluppar ina maschina che fa ventireivels. Ei quei sia schanza sil Premi Nobel? Sia assistenta spontana, la Betta, ei dapi onns da sia vart e sustegn el a moda viva tier sias invenziuns. Mo plaunsiu cumparan impediments e resistenzas. (fmr/mg)
Sonda, ils 22 d’uost allas 14.00 e dumengia, ils 23 d’uost 2026 allas 11.00.
Detagls e reservaziuns sin sommertheater-surselva.ch.
Cun ragischs ella Foppa
Curdin Caviezel ei naschius igl onn 1993 e carschius si a Luven. Suenter la scola eis el staus in onn ell’America. Silsuenter ha el absolviu il studi d’actur a Berlin. 2014 ha Curdin Caviezel terminau il studi cul diplom ed ha retschiert in engaschi stabel al teater a Quedlinburg e Halberstadt en Tiaratudestga. Dapi igl atun 2017 lavura il Sursilvan sco actur liber per differentas producziuns da film e teater. Avon paucs onns ha el giugau ina rolla ell’emprema seria romontscha «Metta da fein». Il davos temps eis el staus engaschaus denter auter al teater Hans Otto a Potsdam, al Vorarlberger Landestheater a Bregenz, al Nordharzer Städtebundtheater, al Theaternatur Festival, cun il duo «caviezel & stohler» en Tiaratudestga ed en Svizra. Plinavon ha el giugau a Cuera en teaters el liber ed ella Klibühni. 2024 ha Curdin Caviezel realisau siu emprem grond project da solo cul tetel «9 Monate all inclusive» ch’ei staus da veser sin diversas tribunas egl entir territori da lungatg tudestg. (fmr/mg)
Gust da leger dapli?