Il tarpun è turnà

Dapi bun in mais pon ballapedistas e ballapedists amaturs tegnair ad aut lur chommas e giudair la pausa da stad. Sin las plazzas da ballape grischunas regia damai per gronda part ruaus – cun excepziun da Lai. Là nizzegia la vischnanca da Vaz la pausa per renovar sia plazza da ballape artifiziala. Quella n’adempliva betg pli las prescripziuns da l’Associaziun da ballape da la Svizra Orientala (OFV, guarda boxa).

«I dovra sensibilitad»

Tar l’Associaziun da ballape da la Svizra Orientala (OFV) sa fatschenta ina cumissiun cun las plazzas da ballape. Quella controllescha, cusseglia e dat liber las plazzas per il manaschi da gieus. E sco ch’il president da la cumissiun Roman Ullmann ha confermà envers la FMR, po l’OFV sclauder champs da ballape dal manaschi, sche quels na correspundan betg a las normas.

«Ma quai n’è atgnamain betg la finamira», ha ditg Roman Ullmann. L’anteriur arbiter, che sa deditgescha en uffizi d’onur cun plazzas da ballape, observa numnadamain ch’il basegn da talas crescha: «I na mancan betg be trenaders, mabain era plazzas per tut ils giuvens e giuvnas che vulan dar ballape.» Perquai serrian ins be cun cor grev singulas plazzas. «Da l’autra vart duain las normas dentant era betg mo esser ina farsa. I dovra sensibilitad», uschia Roman Ullmann.

Evaluaziuns regularas

En la pratica vul quai pia dir che l’OFV pretenda pli u main mintga tschintg onns ina evaluaziun da mintga plazza da ballape. Sper las dimensiuns, cunzunt il spazi da segirtad, controllescha la cumissiun era, co che la balla sa cumporta sin la plazza, l’elasticitad ed auters criteris.

A Lai hajan ins fatg ina tala controlla avant in dus onns, sco che Roman Ullmann ha ditg: «Sche nus constatain che la plazza na correspunda betg pli a las normas, contactain nus il club e la vischnanca per chattar ina schliaziun.» En il cas concret munta quai che la cumissiun ha claus in egl, spetgond che la plazza vegnia renovada a temp util tenor las normas. Sche quai na fiss betg stà il cas, avess il FC Lai Valbella stuì chattar baud u tard in’autra plazza da ballape en la vischinanza.

Almain 90 sin 45 meters

Las dimensiuns da plazzas da ballape na prescriva la cumissiun da l’OFV dal reminent betg sezza. I valan quellas prescripziuns internaziunalas ch’ins chatta en il reglament correspundent da l’Associaziun da ballape svizra (SFV). E quella prescriva ch’in champ da ballape sto esser almain 90 meters lung e 45 meters lad – e quai senza il spazi da segirtad da trais meters. Sco che Roman Ullmann ha però ditg, dependan las dimensiuns era da la liga. Per dar en classas pli autas, 2. liga interregiunal ed ensi, sto ina plazza per exempel esser almain 100 meters lunga e 64 meters lada.

Ina plazza redimensiunada

«Per l’ina è la plazza daventada memia dira ils ultims onns e per l’autra na correspundeva il spazi da segirtad betg a las normas», ha Lucas Thöni da la partiziun ovras da la vischnanca da Vaz explitgà sin dumonda da la FMR. Las normas pretendan numnadamain trais meters spazi liber enturn la plazza e quai n’era betg il cas a Lai. «L’OFV avess en il mender cas pudì sclauder dal campiunadi l’equipa dal FC Lai Valbella. Perquai èsi stà necessari d’agir», uschia Lucas Thöni.

Per ademplir las normas han ins pia decidì da renovar e redimensiunar la plazza, ubain il champ da gieu. Cun ina mesira da 92 sin 52 meters è quel da nov radund trais meters pli curt. Ina da las pitschnas plazzas da ballape grischunas daventa pia anc pli pitschna. Sco che Lucas Thöni ha ditg, correspundia il champ da nov dentant dapli a las normas grazia a la midada: «Igl impurtant è che la relaziun tranter lunghezza e ladezza constettia. E quai è ussa pli equilibrà.»

In nov profil – in nov tarpun

La plazza artifiziala da Lai na survegn però betg mo novas dimensiuns, mabain en emprima lingia er in nov tarpun. Tar quel vegl da l’onn 2005 sajan ils fustis da plastic numnadamain stads smatgads bravamain a plat, ha declerà Lucas Thöni. In basegn d’agir n’haja dentant betg mo dà pervia da la surfatscha: «Cun allontanar il tarpun vegl han ins vesì che la vetta da catram suten era donnegiada. Ins ha damai cuvrì da nov l’entira plazza cun ina vetta da granulat da gumma e colla. Grazia a quella duai il champ esser pli lom.»

Il nov tarpun verd ch’è vegnì rasà ora quest’emna, è pia tschentà era sin in nov fundament. Sco proxim pass vegn lura taglià ora il muster per las lingias. Quellas n’èn numnadamain betg dissegnadas en il tarpun verd, ma vegnan pezzadas separadamain. «L’entira plazza vegn lura anc emplenida cun sablun da quarz e granulat da spia da tirc. Quai è il standard, actualmain», uschia Lucas Thöni. En ina duas emnas saja era questa lavur terminada e la plazza puspè pronta per ballapedistas e ballapedists. L’inauguraziun è però planisada pir per l’atun da quest onn, cura ch’il campiunadi è puspè en plain’acziun.