Successiun digl archivar ei segirada

Entochen la fin digl onn 2025 ha Simon Derungs archivau ed administrau igl Archiv cultural Lumnezia persuls ensemen cun Gian Carlo Albin che fa era egl avegnir la lavur d’archivar. Per segirar la successiun digl archivar e gestiunari hagi el giavischau dalla Fundaziun da cultura Lumnezia sco purtadra digl archiv cultural, d’ir alla tscherca d’in successur, di Simon Derungs duront ina viseta dalla FMR egl archiv. «Casualmein sun jeu vegnius en discuors cun Marcus Cavegn a caschun d’ina occurrenza. Jeu haiel dumandau el sch’el havessi interess da surprender in di igl Archiv cultural Lumnezia.» Els seigien spert vegni en raschieni davart temas che hagien da far cugl archiv cultural. «En mintga cass ei Marcus Cavegn staus interessaus fetg da mia damonda da collaborar. E quei fagein nus ussa dapi igl emprem da schaner 2026. Actualmein e pils proxims onns essan nus co-menaders.»

Suenter la fusiun ei l’idea naschida

«Jeu sun ussa el 77avel onn da naschientscha», di Simon Derungs. «Igl ei uras da  ponderar vid ina successiun.» Enteifer quei miez onn ch’els lavurien ensemen hagi el saviu seperschuader che Marcus Cavegn seigi la persuna predestinada per menar en in bien futur igl Archiv cultural Lumnezia. Marcus Cavegn sez di, ch’el seigi staus canzlist communal a Vella e cunquei era archivar da vischnaunca. «Enteifer la fusiun alla vischnaunca Lumnezia igl onn 2013 hai jeu era giu l’incumbensa da fusiunar ils vegls archivs communals. Duront quei proceder eis ei semussau che nus havevan buca plaz per tut ils fatgs publics dallas otg anteriuras vischnauncas.» Ed aschia ei l’idea d’in archiv cultural naschida e lu vegnida realisada pass per pass.

Relaschs da famiglias

Egl archiv cultural Lumnezia ch’ei domiciliaus ad Uors ella anteriura casa da scola ein deponi relaschs da famiglias, cudischs, fotografias, uniformas, tschupials e medaglias, ina biblioteca ed auters purtaders da datas. Simon Derungs raquenta dils relaschs da famiglias che s’audien tier ils scazis ils pli prezius digl archiv cultural. «Per mei ei l’entrada dils relaschs per da pliras famiglias lumnezianas adina stai puncts culminonts.» Las actas dils relaschs tonschien per part anavos entochen igl onn 1602. Ils relaschs famigliars seigien ils pli impurtonts, mo era ils pli sensibels documents digl archiv, di Simon Derungs.

Digitalisar ei igl avegnir

Marcus Cavegn di ch’igl Archiv cultural Lumnezia hagi gia entschiet e cuntinueschi cun la digitalisaziun. «D’accelerar la digitalisaziun vegn ad esser ina  da nossas incumbensas principalas dils proxims onns. Per digitalisar a moda e maniera efficienta duvrassen nus denton in sistem digital communabel da plirs archivs, ni schizun dils archivs culturals digl entir cantun Grischun.»

Igl archiv cultural Lumnezia ei aviarts mintga davosa sonda dil meins naven dallas 9.00-12.00. A caschun d’ina viseta en casa da scola ad Uors san ins lu era fixar in termin duront l’jamna culs archivars.

Ulteriuras informaziuns silla pagina: www.archivculturallumnezia.ch