Levar a las 3.00 – e plirs tips patriotics
Durmir u levar a las 3.00 la notg? E nua guardar la partida Svizra-Argentinia la notg da sonda sin dumengia? – Fans e persunalitads da politica e sport respundan: en letg, en stiva u da cumpagnia en l’abitaziun da vacanzas en Grezia. Intgins dorman dentant era la sien dals gists. Prest la meglra resposta vegn da Salouf.
«Franc ch’jau guard il match!» La resposta da Flurin Demarmels è pli che mo clera. Il trenader dal CB Surses na guarda betg sulet: «Nus festivain la sonda saira 100 onns Uniun da giuventetgna da Salouf, suenter mussain nus gist il gieu.» Sin la plazza da scola a Salouf datti perquai in pitschen public viewing la notg da sonda sin dumengia. A las 3.00 vegn mussà per quels e quellas che tegnan la dira il gieu Svizra-Argentinia dal champiunadi mundial da ballape. Flurin Demarmels fiss atgnamain in amatur da la squadra argentina, ma en quest match tegna el cun sia patria: «La Svizra gudogna 2 : 1.» E tgenins giugadurs al plaschan il meglier? «Da la Svizra chat jau Granit Xhaka il meglier, el gioga gia onns sin in nivel sco anc mai in Svizzer. En l’Argentina è sa chapescha Lionel Messi il grond giugadur.»
Anja Furger – probabel durmir
«Jau crai ch’jau dormia», di Anja Furger. «I dependa tge ch’jau fatsch la dumengia, ma stan uss na guard jau plitost betg il gieu, uschiglio è l’entira dumengia lavagada.» L’anteriura profi-giugadura che dat oz tar il Team Surselva sa legra dentant da levar la dumengia e lura guardar ils highlights.
Ella spera sa chapescha che la Svizra gudognia, ma ella crai che l’Argentinia giaja il davos cun 2 : 1 cun la plima. Fabian Rieder e Remo Freuler sajan ses favurits svizzers, di Anja Furger. «Tar l’Argentinia èsi Alexis Mac Allister da Liverpool. Jau sun fan da Liverpool.»
Valérie Favra Accola – patgific en letg
«Quai vegn ad esser l’emprim match dal campiunadi mundial ch’jau guard entir ed entratg», di Valérie Favra Accola. Ella vegnia adina nanavant da quellas uras la notg, lura possia ella gea gist guardar patgific il match en letg, tradescha la politicra ch’è a partir dal 2027 ministra da sport grischuna.
«Mes cor batta sa chapescha per nossa squadra ed jau crai ch’ils giugadurs svizzers sajan propi arsentads. Jau m’allegrass, sch’els gudagnessan 1 : 0. Jau na crai betg ch’els domineschian suren e surora quest match, ma sch’els defendan bain, han els ina schanza», manegia la futura cussegliera guvernativa.
Martin Candinas – ina festuna a Den Haag
«Las trais la notg dorm jau schon gugent», di Martin Candinas. «Ma jau suppon ch’jau vegnia a far insatge ch’jau n’hai anc mai fatg en mia vita: levar per guardar in match.» Da preschent sa chatta il cusseglier naziunal gist a Den Haag sco delegà da l’OSZE. Là ha el vis l’otgavelfinal da la squadra svizra en ina bar ensemen cun auters parlamentaris. El raquinta ch’i sajan vegnids natiers anc auters Svizzers e ch’i haja lura dà ina festuna.
Ses giugadur preferì saja Nico Elvedi. El haja raquinta a tuts che quel derivia oriundamain da la Surselva. Ma Breel Embolo saja sa chapescha era ina maschina d’in giugadur. «Nossa squadra mussa l’entira varietad da noss pajais – da nums sursilvans fin tar nums ch’ins na sa strusch co scriver. Quai è noss pajais», di Martin Candinas tut intgantà. L’Argentinia saja sa chapescha ina dira nusch. Ses tip dat el giu sco vair patriot – 2 : 1 per la Svizra.
Claus Caluori – amis e famiglia en Grezia
«Gnanc dumonda, sa chapescha che nus guardain il match», di Claus Caluori. «Igl è in mument istoric che nus essan en il quartfinal.» Il president da l’Associaziun da ballape grischuna sa chatta gist en Grezia. El ha l’intenziun da far ina gronda festa cun amis e parentella e vegn a guardar il matsch en l’abitaziun da vacanzas.
«Il giuven newcomer Johan Manzambi fa grond plaschair ed jau sper ch’el possia era giugar la dumengia», di Claus Caluori. Insumma persvadia l’entira squadra svizra. «Nus gudagnain 2 : 1, bain bain», di il pli aut ballapeist grischun.
Pius Paulin – en stiva cun il figl
«Jau level ed jau guard en stiva cun il figl», di Pius Paulin da Glion sco grond amatur dal ballape. Il match Svizra-Canada che ha gì lieu a las 5.00 n’ha el betg guardà, ma questa giada saja quai uschè impurtant ch’ins stoppia simplamain levar. «Jau hai il sentiment che l’Argentinia gudognia – deplorablamain – 2 : 1 suenter la prolungaziun», di Pius Paulin. Ma el agiunta immediat ch’el saja persvadì ch‘ils Franzos daventian a la fin campiuns mundials. Lezs hajan simplamain il meglier trenader e la meglra equipa. Ses giugadurs svizzers preferids èn Nico Elvedi, Johan Manzambi e Silvan Widmer. Tar l’Argentinia plascha ad el Lautaro Martínez che gioga tar Inter Milan.
Sandro Cadusch – arbiter va en il Tirol
«Jau na sai anc betg, sch’jau guard, pertge nus partin la dumengia la damaun en las vacanzas en il Tirol», di Sandro Cadusch, responsabel per ils arbiters tar l’uniun da ballape grischuna. «Sch’i fiss stà a las tschintg, fiss jau plitost levà.»
El spera che la Svizra gudognia, ma crai ch’i daventia difficil. Ses tip è perquai: 2:0 per l’Argentinia. Sandro Cadusch di ch’el saja in fan da Gregor Kobel ch’è goli tar Dortmund e tar l’Argentinia saja Lionel Messi simplamain il star mundial.
Gust da leger dapli?