Il «Sykora Gisler» sursilvan

Podcasts da ballapei dat ei ferton ina massa. Il pli popular en Svizra ei probablamein il duo da SRF «Sykora Gisler». Mo era autras casas da medias, clubs da ballapei, expertas ed anteriurs ballapedists delecteschan ils fans cun lur savida e pareris davart prest tuttas ligias e tiaras.

Ch’ei dat in tal podcast era sur dil ballapei regiunal en Surselva, ei denton in novum. Quei dat ei pér dapi bien treis meins grazia al duo Joris Tomaschett (33) e Martin Schär (32). L’emprema episoda da «Denter ballapei e meisa rodunda» vevan els – il trenader e defensur dall’US Rueun – registrau la fin da mars en in hotel en Terchia. «Pil solit vein nus fatg videos dil camp da trenament. Quest onn vai jeu tertgau da far inaga zatgei auditiv ed aschia ei l’idea da far in podcast naschida», ha Joris Tomaschett explicau.

Dil hotel en cabina

Els hagien denton buca giu l’intenziun da publicar immediat sin Spotify lur emprema episoda davart il camp da trenament en Terchia, ha il scrinari Martin Schär tradiu enviers la FMR: «Nus vein empruau senza gronda preparaziun, sche quei funcziuna insumma.» Pér suenter il resun da lur emprem auditur hagien els fatg quei pass. «Nus vein schau tedlar nies co-trenader Marc Mirer l’episoda. El teidla savens podcasts da ballapei. E siu verdict ei staus: Prima, sas far!», aschia Joris Tomaschett che lavura sco assistent da pratica da miedi a Laax.

Per Joris Tomaschett e Martin Schär ei denton buca mo l’emprema episoda stada empau in empruar. Anavos en Svizra han els dus registrau la secunda episoda ella veglia casa da scola da Rueun. «Mo nus vein realisau ch’il tun ei schizun megliers en nossa cabina sil plaz da ballapei Isla», aschia il trenader dall’US Rueun davart lur studio temporar che sesanfla empau giud via denter Rein e via da Polacs. Mo leu sesentien els era bein, schegie ch’ei hagien gest all’entschatta aunc fatg quitaus da piarder il fil tgietschen. «Duront in podcast dess ei buca dar pausas ni segls dad in tema tier tschel. Senza in script ei quei nuota aschi sempel», ha Martin Schär fatg da saver. Propi preparau hagien els denton mo la secunda episoda cul hosp Claudio Brenn che veva dau nova veta all’US Rueun entuorn il 2007. Per lur tierz discuors registrau davart lur carrieras tier l’US Rueun ei quei buca stau necessari.

Per la cultura da ballapei romontscha

Malgrad quellas incertezias dall’entschatta seigi ei denton clar ch’els fetschien vinavon inaga il meins in’episoda, sche pusseivel. «Mo nus lein era arver empau il spectrum. Aunc uss ei il focus plitost sill’US Rueun. L’idea fuss denton da ver regularmein hosps era d’auters clubs sursilvans ni era dil Grischun. La finamira ei semplamein da mantener e promover la cultura da ballapei romontscha», ha Joris Tomaschett detg arisguard igl avegnir da «Denter ballapei e meisa rodunda».

Per il mument san els denton esser cuntents, pertgei ils resuns seigien dil tuttafatg buns. «Nus dumandein denton era direct collegas tgei ch’ins savess aunc far meglier. Lu dat ei schon remarcas e propostas per exempel pertuccont il tun ni ils micros», ha Joris Tomaschett detg. Tenor il trenader da Rueun seigi ei semplamein bi ch’ei dat puspei zatgei romontsch. Ed els seigien era cuntents, con savens che lur podcast vegn tedlaus: «Las empremas treis episodas ein vegnidas tedladas varga 500 gadas, e quei senza far gronda reclama.»

Dil reminent ha il duo «Tomaschett Schär» era gest registrau sia quarta episoda. Venderdis vargau han els discurriu dil campiunadi mundial da ballapei, aschia ch’els han bandunau per inaga il tema principal.