Trais dumondas a Daniel Albertin

Daniel Albertin: Gea, en mintga cas. Tant la suprastanza, ma er ils responsabels dal Chantun e tut quellas e quels che han elavurà quest project èn levgiads. Era per nossa vischnanca sun jau cuntent ch’il credit è ì tras uschè bain – e per tut quellas persunas che han gia survegnì credits da totalmain 20 milliuns francs da la vischnanca per ch’i possian gia cumprar ina chasa u abitaziun. La decisiun dat ussa sustegn e levgiament.

Na, per esser sincer: Jau n’avess betg pensà ch’i na dettia betg discussiuns pli criticas cunter l’entir project. Jau hai er empruvà da dar ina resumaziun da l’istorgia – co che nus essan insumma vegnids a quest project. E natiralmain hai dà tschertas discussiuns. Ma quai èn discussiuns, perquai che la glieud na po betg chapir, pertge ch’ins sto bajegiar enavos ils edifizis. Quels discurs avain nus cuntinuadamain. E quellas dumondas vulain nus discussiunar enavant sin plirs livels –communal, chantunal e federal: Tge far cun edifizis en ina zona da privel? Laschain nus star il bajetg? Al sbuvain nus? Gist en il futur vegnin nus a stuair discutar davart las basas legalas.

Quella saira vulain nus discussiunar cun la populaziun da Brinzauls, cun la populaziun da nossa vischnanca, cun las persunas pertutgadas e cun quels che n’èn betg pertutgads, co che nus applitgain la lescha da guaud che pretenda da bajegiar enavos ils bajetgs che fan part a la dischlocaziun preventiva. Nus avain sentì oz: I dat discussiuns. I dat differentas opiniuns. Ed jau crai ch’i dovra quellas differentas opiniuns per chattar bunas soluziuns. Senza vegnir ensemen cun la glieud na chattain nus betg las dretgas soluziuns.