Hager, Terri ni Greina?

Igl onn 1925 ha la Secziun Piz Terri dil Club alpin svizzer – fundada ils 23 da schaner 1898 – baghegiau la camona dil Terri sin 2170 meters sur mar. Ils 30 d’uost da gliez onn eis ella vegnida inaugurada. Sco ins sa leger ella cronica dalla secziun pil giubileum da 100 onns ei quei succediu en preschientscha da rodund 100 commembers dil club. In interessant detagl dalla historia dalla camona pertucca siu num. A disposiziun persuenter stevan treis variantas: Hager, Terri ni Greina. Hager tenor il num da pader Karl Hager, commember d’honur dalla secziun. Per motivs geografics ein ins denton setenius vid in num da muntogna. «Damai ch’il num Greina vegn consideraus plitost sco pass ei la camona vegnida battegiada cul num Terri», seregordan ils exponents dalla secziun. In’interessanta indicaziun ella cronica pertucca era il quen dil baghetg, presentaus la fin digl onn 1925: «La tegia ha custau 20 165.35 francs, da quei ein 18 805.05 gia pagai. Dapi l’avertura ha ei dau entradas en tegia da 117.50 francs.»

100 onns pli tard

Tschien onns pli tard ei la camona dil Terri pli che s’etablida sco liug da dimora tschercau el territori dalla Greina. 3710 pernottaziuns ha ella nudau igl onn vargau e quei malgrad ch’il plaz ei staus limitaus pervia dallas lavurs da baghegiar. Quei ei stau ina quarta pli pauc ch’igl onn avon cun in menaschi cumplein. Igl onn 2025 ei la camona vegnida engrondida ed il medem mument ein las combras da durmir vegnidas structuradas da niev. «Cun occasiun dallas lavurs vid la camona igl onn 2008 era la part amiez dil baghetg buca vegnida renovada. Quei project havein nus realisau igl onn vargau. Nus havein alzau la part davon encunter la Val Sumvitg e scaffiu combras pli pintgas tenor ils basegns dalla clientella d’ozildi», di Selina Schmed ch’ei cassiera dalla secziun dapi 2019. Dapi la primavera 2026 tgamuna ella la secziun ad interim suenter la mort prematura dil president René Cavegn.

Dapli combras – pli paucs letgs

La camona dispona ussa sper stanzas da durmir pli grondas era da combras per duas, quater e sis persunas. Tut en tut porscha ella 94 letgs cun madrazzas pli ladas ch’avon. Plinavon ei vegniu erigiu igl onn vargau in baghetg annex niev cun indrezs sanitars. Medemamein ei la situaziun cun sortida d’urgenza vegnida meglierada ed adattada allas prescripziuns novas. Las lavurs d’engrondaziun e restructuraziun ein succedidas sut l’egida digl architect Gion A. Caminada. Tenor Selina Schmed ha il project custau rodund in milliun e miez. Las lavurs seigien sesplegadas tenor giavisch, aschia che la camona – menada da Jochen Schirmann e Verena Kuhle – hagi saviu vegnir aviarta uonn tenor plan.

Ina sempla fiasta

Sonda proxima, ils 18 da fenadur 2026 festivescha la Secziun Piz Terri dil Club alpin svizzer il giubileum da 100 onns da sia camona dil Terri. Il giubileum ei vegnius spustaus per in onn muort las lavurs ch’ein succedidas igl onn vargau e damai ch’il menaschi dalla camona ei staus restrenschius per quei motiv. «Nus fagein ina sempla fiasta», di Selina Schmed. Naven dallas 13.00 vegn offeriu in apero, silsuenter suondan in plaid e la benedicziun dalla camona. Suenter in intermezzo musical da Mattiu Defuns, Chiara Jacomet Trio sco era Rico Schwarz & Vivienne Bandli suonda la pusseivladad da prender investa dalla camona cun Gion A. Caminada. Igl autur Leo Tuor, ch’enconuscha la Greina sco paucs auters, vegn allura a preleger.