Dar a padel è oz en trend
Igl turissem da stad an Surses è per ena purscheida pi retg. Venderde passo è stada a Savognin l’avertura dalla plazza da giuier a padel. Chel sport vign adegna pi popular. Igl plaz iniziia digl Club da tennis Savognin ò ena spezialitad: en vèder dobel – en novum svizzer.
La Nars davainta adegna daple igl center da sport dalla regiun da vacanzas Surses. Igl anviern è lò igl center dalla Scola da skis Savognin, la plazza da glatsch per dar a hockey u a curling, la stad igls plazs da tennis – ed ossa è nia vetiers en plaz per dar a padel. Gist dasperas sa catta er da nov en schinumno plaz da «street-workout». Chegl è en indrez da fitness, noua tg’ins pò far trenamaints funcziunals cun l’atgna peisa digl corp.
Sen l’anterioura plazza da tennis
La raschung tg’ins ò construia a La Nars en plaz da dar a padel è tg’ins ò lia nizigier l’anterioura plazza da tennis tgi niva betg ple duvrada cun construeir dasperas la «EWZ Arena» cun dus novas plazzas da tennis. Patrick Thurner, igl president digl Club da tennis Savognin, ò detg anvers la FMR: «Da tschispantar l’anterioura plazza da tennis vainsa betg lia ed uscheia è neida l’ideia da far sen chella plazza en plaz per dar a padel.»
Igl Club da tennis Savognin è sa participo finanzialmaintg agls costs da chel plaz, cun 30 000 francs. Sa participo agls costs – tenor RTR budgetos cun 70 000 francs – è er igl cumegn da Surses. Sen la dumonda quant tgi igl cumegn surpeglia digls costs totals ò la FMR retschet la rasposta: «Igl rendachint da biagier digl cumegn è betg anc saro giu, cunchegl tgi n’èn betg avant mang tot igls chints finals. En sclarimaint liont davart la part digl cumegn savainsa perchegl betg dar igl mument.»
Tgi chel project ò pero ansomma savia neir realiso è er d’angraztger ad en’innovaziun tecnica. Perchegl tgi vaschigns faschevan chitos tgi pudess dar mengia blera canera, ògl do recurs tgi on retardo la construcziun. Igls responsabels on reagea allas resalvas ed on laschea construeir la plazza cun ena construcziun speziala da vèder dobel. Scu tgi para sa tractigl dalla amprema plazza da padel cun vèder dobel an Svizra.
40 francs per giuier en’oura
Ena plazza da padel è 10 sen 20 meters grond e separada aintamez d’ena reit (varda boxa). Ella è circumdeda cumplettamaintg da pareis da vèder e da giatters da metal. Giuia vign cun palottas spezialas curtas sainza garnitura, tgi disponan d’ena surfatscha da pitgier da plastic u carbon cun rosnas. Cuntrari da las palottas da dar a tennis èn chellas digl padel betg tandeidas. Las ballas sumeglian a ballas da tennis, on pero pi paca pressiun ed èn er pi levas. I vign dumbro precis scu tigl tennis (15, 30, 40, gi). Tgi tgi decida igl amprem dus messas da gudogn per sasez, gudogna igl matsch. La taxa per duvrar igl plaz da padel a La Nars costa 40 francs per oura, ò detg Patrick Thurner.
Tge è padel e scu funcziunescha igl gi?
Padel vign quasi adegna do an dus (dus cunter dus). Igl service succeda scu colp da mang sot. Siva igl service aint igl camp digl adversari dastga la balla tutgier la pare da vèder u igl giatter, stò pero rivar igl amprem segl taratsch. Padel è uscheia en gi multifar, tridimensiunal e communicativ per gioven e vigl, tg’è simpel d’amprender e fò immediat plascheir. Padel vign do ozande an radond 130 teras. I dat segl antier mond passa 60 000 plazzas da padels e passa 30 milliuns giuiedras e giuieders gioian a padel, e de per de vignigl daple. Padel è ancunaschaint per la sia sveltezza, pretenda colps precis e pansar strategic, chegl tgi fò el en sport excitont e ravidont. La spertezza e la dinamica s’adatteschan agl nivel digls giuieders. Padel è en gi tgi cumbinescha elemaints da differents sports da racket. Patrick Thurner, igl president digl Club da tennis Savognin,dei: «Padel è en sport tgi sa cumpona dad 1/3 squash e da 2/3 tennis.» Pigls gis olimpics da Los Angeles igl 2028 n’è padel betg anc en sport accepto – uscheia tgi padel pudess igl pi bod davantar igl 2032 a Brisbane an Australia ena disciplina olimpica. (gns/rtr/fmr)
Gust da leger dapli?