Il microcosmos da la deessa da Rona

Qua e là in tun d’ina ghitarra, uffants che dattan ballape ed insaquantas persunas che baterlan, fan in cupid u chantan communablamain enturn in fieu. En cumparegliaziun cun auters festivals èsi al Pachamama-Festival a Rona paschaivel e meditativ: naginas grondas controllas da segirtad a l’entrada. E drogas na vegnan era betg consumadas.

A partir da la mesemna enfin dumengia saira passada è ina part da la lunga planira da Rona sa midada en in microcosmos particular: Jurtas e tendas èn vegnidas installadas sin ils prads, nua che la muaglia pasculescha per il solit. Sin pliras tribunas èsi vegnì concertà cun shows da fieu e borlas da savun. E varga 40 workshops sco jodlar selvadi, meditaziuns celticas e sunar didgeridoo han divertì ed animà giuven e vegl.

Ina tenda sco il venter da la mamma

Part dal microcosmos da Rona fa era Alejandro Quirós da Costa Rica. Durant il Pachamama maina el ceremonias spiritualas en ina «hitta da suar» (Schwitzhütte). Ina tenda bassa, ma anc relativamain gronda, è ses lieu da ceremonia, dus tarpuns cun si chaus da tighers cuvran quell’entrada: «La tenda simbolisescha il venter da la mamma», di l’um da la Costa Rica.

Avant la ceremonia dal venderdi raquinta el, co che tut funcziuna: «L’emprim vegn crappa en la grondezza dad ina tievla stgaudada en il fieu avert, enfin ch’ella è buglienta.» Silsuenter vegn quella crappa transportada cun ina furtga en la tenda, nua che ina ventgina da participants e participantas sesa – e cumenza a suar. I para in pau sco ina «sauna», ma davostiers è in’idea pli profunda, sco quai che Alejandro Quirós declera. «L’idea è da simular ina naschientscha e dad uschia chattar ina via pli autentica tar ins sez.» E la crappa, lezza simboliseschia l’ossa dals antenats.

«Igl è bel, sch’i marscha insatge»

Il funs, sin il qual la tenda dal «venter-mamma» ed era autras jurtas èn tschentadas, tutga totalmain a set purs ed al Cumegn Baselgia Surses. Othmar Poltera da Mulegns è in dals purs che metta a disposiziun ses prads per ils visitaders e las visitadras da la festa. «Igl è bel, sch’i marscha insatge – e la glieud che organisescha il Pachamama è flotta», di el cun bainvulientscha al telefon.

Suenter las main bunas experientschas cun il Goa-Festival – che ha gì lieu enfin l’onn 2017 – na sa chapeschia betg da sasez che tut ils purs tiran vi  d’in char. «Gea, cun quels dal goa n’è betg adina tut stà bun, els han mintgamai laschà enavos bler rument», raquinta Othmar Poltera. «Ma quels qua fan pulit e laschan enavos tut en urden e rimnan era ensemen bain tut», di l’um da Mulegns. Sulettamain il parcar dals autos na saja betg ideal, cunzunt en cas da plievgia. En general para Othmar Poltera tut cuntent: «Igl è da’ls laschar far, sch’els han plaschair.»

Part dad ina gronda famiglia

Che la collavuraziun cun ils purs da Rona saja buna, quai conferma era il fundatur dal Pachamama-Festival, Daniel Hunziker. «Cler, ina giada ni l’autra datti discussiuns, ma nus chattain adina ina soluziun e vegnin simplamain extrem gugent qua.» Ina gronda paisa mettian els era sin l’ecologia, uschia datti p.ex. per spargnar aua tualettas che funcziunan cun cumpost. Ed avant ch’ins fa bogn en il flum èsi da far la duscha per betg tschufragnar l’aua cun crema da sulegl. A l’entschatta, l’onn 2012, haja la festa anc gì lieu giu la Bassa e mo en in pitschen rom, declera Daniel Hunziker. Oz, 14 onns pli tard, è il festival che porta il num da la deessa sidamericana Pachamama creschì a circa 2300 visitaders e visitadras ed ha gia lieu per la terza giada a Rona. «Tge ch’è anc bel: Era 500 uffants vegnan mintgamai qua e sa legran d’esser ora en la natira», di Daniel Hunziker durant che ses figl vegn sperasvi cun il velo.

Ed era sch’i vegn chantà e sunà enturn il fieu e blers che van a pe blut a spass, na lascha Daniel Hunziker betg valair che be «hippies» vegnian a Rona. «Tar nus vegnan persunas che han jobs tut normals ed igl è fitg eterogen – e quai è era exact quai che nus vulain esser: in plaz per tuts.»

La visita al festival ha mussà: La deessa Pachamama para da sa sentir bain a Rona, e d’avair striunà tuttas e tuts en umans patgifics – cun ni senza ina ceremonia en la «hitta da suar».