«Mintga di en chasa communala»
La vischnanca da San Murezzan ha elegì cun Adriano Iseppi ses nov president communal. Il magister ed anteriur sportist ha fatg 582 da 1462 vuschs ed entra en uffizi il 1. da schaner 2027 sco successur da Christian Jott Jenny. En il discurs cun RTR ha il president designà dà in sguard enavos ed enavant.
Adriano Iseppi è il nov president communal da San Murezzan. En il segund scrutini da dumengia passada è el vegnì elegì cun 582 da 1462 vuschs valaivlas, sco che la vischnanca ha communitgà. Il president designà ha fatg la cursa avant ses concurrents Leandro Testa (514 vuschs), Isabel Wenger (217 vuschs) e Sebastian Bahner (149 vuschs). Adriano Iseppi entra en uffizi il schaner 2027 sco successur da Christian Jott Jenny. En il discurs cun RTR ha il scolast ed anteriur sportist (guarda box) dà in sguard enavos sin ils ultims mais intensivs ed in sguard enavant sin sia nova incarica.
RTR: Adriano Iseppi, Vus avais gia annunzià Vossa candidatura mez mars. L’elecziun è pia stada ina lunga cursa. Quant grond è il levgiament uss?
Adriano Iseppi: Gea, igl è propi stà ina cursa zunt lunga. Perquai è il levgiament schon grond. Gia avant in mais hai jau sentì la tensiun e la paisa. Ussa, tschintg emnas pli tard sun jau fitg cuntent ch’igl è reussì. Ma jau ma legrel era ch’i cumenza en quatter mais e ch’jau ma poss ussa preparar per l’incarica sco president.
Vus entrais en uffizi il schaner 2027. Co As preparais Vus? Empruvais Vus er anc d’influenzar ils gremis che vegnan elegids l’atun?
Jau vi influenzar uschè pauc sco pussibel. Quai hai jau era gia mussà durant il cumbat electoral ed jau vegn er a cuntinuar cun quella via. Mia lavur dals proxims mais è dentant da m’inscuntrar cun la glieud dals differents uffizis communals e da dumandar, tge ch’ils e las fatschenta, tge che funcziuna e tge ch’igl è forsa d’instradar da nov.
Vus essas scolast, anteriur sportist e surpigliais uss il presidi cun in pensum dad 80 %. Co As preparais Vus era mentalmain per ina tala midada professiunala?
Jau faschess era 100 %. Mes antecessur ha fatg 80 %, ma jau vi lavurar 100 %. E cler ch’ils fastizs da Christan Jott Jenny èn gronds, ma er jau hai ina bulscha da differentas experientschas cun mes passa 50 onns. E plinavant sun jau persvas ch’i giaja vinavant bain cun San Murezzan era grazia a mia squadra.
Tge vulais Vus far auter che Voss antecessur Christian Jott Jenny?
L’unic ch’è auter è che mes center da vita è a San Murezzan. Jau vegn pia ad esser pli preschent e mintga di en chasa communala. Uschiglio hai jau propi grond respect da la lavur che Christian Jott Jenny ha prestà ils ultims otg onns.
Sin tge As legrais Vus il pli fitg?
Sin la glieud, sin tut ils collavuraturs e collavuraturas, insumma sin la gronda squadra, schegea ch’jau na vegn betg a vesair tuts 250 mintg’emna. E jau m’allegrel era da tut las pussaivladads che nus avain qua a San Murezzan.
Da tge avais Vus il pli grond respect?
Il pli grond respect hai jau dal cuntravent ch’ins ha era gia sentì avant il segund scrutini. Igl ha dà ina mobilisaziun e tscherta glieud ha resalvas ed è forsa in pau sceptica, sch’i vegn bun cun in magister al timun. Da quai hai jau schon in respect natiral, ma quai ma dat era motivaziun da mussar ch’i po funcziunar.
Vus avais fatg la cursa cun in avantatg da be 68 vuschs sin Leandro Testa. Avais Vus insumma gia realisà tge ch’è capità?
Quai vegn jau a realisar pir ils proxim dis u schizunt mais, cura che la nova incarica sa concretisescha.
Tge ha il cumbat electoral da quatter mais e mez fatg cun Vus?
L’entschatta èsi schon stà da morder. Ma l’ultim mais sun jau gia ma remess in pau ed ussa hai jau temp per ma revegnir endretg. Ed il 1. da schaner poss jau lura ma metter cun nov schlantsch vi da la lavur.
Infobox: Enconuschent sco commentatur
Adriano Iseppi (53) è da professiun magister. Enconuschent en Svizra è l’anteriur sportist da prestaziun però cunzunt sco commentatur ed expert da passlung tar SRF. Il bab da famiglia ch’è creschì si a Savognin è plinavant era suprastant da l’Uniun grischuna da skis e sco organisatur, commember da la direcziun u schef da sport fa el part dal Maraton da skis engiadinais, da La Diagonela, da l’Engadin Nordic e d’autras occurrenzas. Durant dus onns è el era stà schef da la disciplina passlung tar Swiss Ski.
Sper sia furmaziun sco magister ha Adriano Iseppi era fatg la scolaziun da trenader d’atlets d’elita tar Swiss Olympic ed in master da gestiun da fatschentas. Il 1. da schaner 2027 surpiglia el il presidi da la vischnanca da San Murezzan.
Gust da leger dapli?