Catto ena soluziun transitorica a Cunter

Cun la nova planisaziun locala e l’introducziun dalla planisaziun territoriala dattigl davart digl Cantun er ena nova valetaziun dalla carta da prievels. Chegl è betg angal succedia aint igl cantun Grischun, mabagn er an oters cantuns.

Pertutgias da chellas maseiras da protecziun èn alloura er numerous campadis. Cunzont aint igl cantun Valleis on ples campadis gia da sarar lour portas perveia da prievels dalla nateira, sen ordinaziun digl Cantun. Betg digl tottafatg saro è nia igl campadi «Julia» a Savognin, mabagn angal la part tgi varda cunter la Gelgia. Scu para è chegl ena zona da prievel, cunzont schi dess erosiuns dalla riva dalla Gelgia.

Siva tgi dat las pendicularas

Igl campadi «Julia» sa catta a Savognin davos igl Cube e situo è el per lung dalla Gelgia. Chel campadi dattigl schi dei scu tgi dat las pendicularas a Savognin – e chegl èn er gio passa 60 onns. Blers digls locataris tg’on lour rulottas sen chel flatg èn giasts fidevels da Savognin. La gronda part dad els è ples decennis a Savognin. Igls giasts digl campadi èn per parta betg angal da staschung an Surses, mabagn er savens da staschung morta.

Igl campadi «Julia» a Savognin sa lascha cumparagler cun ena pitschna vischnanca, noua tgi bunamaintg mintgign sa canoscha. Ossa è chella vischnanchetta sa sminueida, perchegl tgi 24 rulottas e lour possessours on gia da midar plaz.

A Cunter è igl nov post transitoric

Igls gestiunaris digl campadi «Julia» èn las Savognin Pendicularas SA e chegl er gio decennis. Avant radond en onn èn las pendicularas scu  gestiunaris digl campadi neidas infurmadas tgi siva d’ena nova valetaziun dalla carta da prievels antras igl Cantun sa cattan parts digl campadi «Julia» da nov ainten ena zona da prievel. Chell’infurmaziun è neida tarmessa igl zarcladour 2025 naturalmaintg er a tot igls locataris. Per egns ègl sto ena formalitad e per oters en schoc. An consequenza ò igl cumegn da Surses, aint igl rom dalla revisiun dalla planisaziun locala, sortia las surfatschas pertutgeidas dalla zona da campar tenor las directivas cantunalas. Aint igl rom dalla cooperaziun alla procedura da planisaziun ins ò pero pudia contanscher tgi la surfatscha persa dalla vart dalla muntogna digl campadi vigna cumpensada cun en angrondamaint madem grond dalla zona da campadi. La revisiun dalla planisaziun locala è neida decideida ed approvada igl mars digl cumegn. Siva d’alloura è ella tar igl Cantun per l’approvaziun finala. Schinavant tgi chella è pendenta, ègl betg pussebel pigls gestiunaris da far las maseiras da reconstrucziun necessarias e da dislocar las parcellas pertutgeidas aint igl spazi previa da nov.

Per sustigneir igl migler pussebel igls locataris pertutgias ainten chella situaziun difficila ò Savognin Pendicularas SA catto ansemen cugl cumegn da Surses ena schliaziun transitorica. Anfignen tgi la lubientscha cantunala dalla planisaziun locala è avant mang e tg’igl campadi pò neir biagia anturn correspondentamaintg, stat a disposiziun gratuitamaintg agls locataris a Cunter en plaz da parcar provisoric per lour rulottas.