Ustria dalla Posta siara

Suenter endisch onns e miez sur sesez ella gastronomia e da quels sis onns sco ustier dall’Ustria dalla Posta a Vrin vegli el haver dapli peda per sesez e per sia veta privata, di Lucian Alig, igl ustier dalla Posta a Vrin.  «Jeu stoi era conceder ch’jeu haiel il basegns da sesviluppar professiunalmein. Jeu haiel survegniu ina offerta che va en quella direcziun e che dat a mi supplementarmein la caschun da luvrar pli regulau.» Sche quella offerta fuss buca sedada havessi el probablamein bandunau la gastronomia, di Lucian Alig.

Liungs dis da lavur

«Jeu haiel giu in fetg bi temps sco ustier a Vrin. Jeu stun mal per buc ina minuta da quei temps ch’jeu haiel passentau cheu», conferma igl ustier. El ha scret ina brev persunala a tuttas habitontas e habitonts da Vrin ed informau ch’el cali ils 31 d’october 2026. Lucian Alig di ch’il mistregn d’ustier seigi in fetg bi mistregn. Sper tut il bi detti ei denton era auters muments. «Tgi che vul far d’ustiera ni d’ustier sto luvrar bugen. Mo cun luvrar otg uras e mesa per di fan ins buc igl ustier. Mes dis da lavur cuozan denter 13 e 15 uras ni dapli.» Ei seigi bein ina existenza, mo che quella pretendi ch’ins s’engaschi sez e buca cun ina massa persunal.

Clientella mischedada

Ell’Ustria dalla Posta hagi el giu ina clientella fetg mischedada da turistas e turists e d’indigenas e d’indigens da Vrin, dalla Lumnezia e dalla regiun insumma, di Lucian Alig. «Igl ei adina stau mia filosofia da buc esser in’ustria mo pil vitg. Jeu haiel denton era buca vuliu menar ina ustria mo pil turissem. Miu giavisch ei staus che tuttas e tuts hagien plaz tier mei. » En buna memoria hagi el biars inscunters directs denter indigens e turists en sia ustria. «Ussa eis ei denton aschia che la populaziun indigena tschessa dad onn tier onn.» El hagi adina giu ina bellezia relaziun cun ses seniors da Vrin. Malgrad tut hagi el ussa tuttina stuiu prender ina decisiun per siu avegnir.

Tut che deplorescha

Il president communal da Lumnezia Daniel Solèr deplorescha fetg ch’ina ulteriura ustria lumneziana siara sias portas. «L’ustria dalla Posta haveva in fetg bien num grazia a siu ustier Lucian Alig.» Il president da vischnaunca ha capientscha pil giavisch digl ustier da s’orientar da niev ella professiun. Ella medema crenna dat era Kevin Brunold, il directur da Surselva Turissem. «Vrin attira biars hosps cun sia architectura attractiva. E Vrin ei in impurtont punct da partenza ed arrivada per quellas e quels che van mintg’onn sur la Greina. Ins sa mo deplorar che aschi in bien ustier e cuschinier sco Lucian Alig terminescha siu temps. Jeu sperel che l’ustria vegni era el futur menada vinavon.»