In gidonter da scriver romontsch

Dapi otg onns viva Martin Huber cun sia famiglia en Surselva a Dardin. E da leu anora ha il sviluppader da software creau la app cul num ClaviRom, in’assistent digital da scriver romontsch. El che discuora currentamein sursilvan ei staus alla tscherca dad in program che gidi d’emprender romontsch.

Per l’ina fa ClaviRom autocorrecturas duront scriver, quei vul dir sche ins scriva in messadi da Whatsapp e scriva il plaid «ruaseivladad» mo cun in «s», lura curregia ClaviRom directamein sin «ruasseivladad», cun dus «s».

E per l’autra propona il program era plaids, quei vul dir sche ins entscheiva a scriver il plaid «caul…», propona el gest «caultscha». «Ins sa entscheiver a scriver ils emprems bustabs dad in plaid, e lu muossa el schon tut las propostas che van a prau cun quei che ti has scret», cumpletescha Martin Huber.

Per tut ils tschun idioms e romontsch grischun

«Quei ei in project dad opensource che sebasa sillas datas dil Pledari Grond», declara Martin Huber.  Disponibels ei la app en tut ils tschun idioms ed en romontsch grischun. «Jeu vai semplamein cumbinau duas caussas: ina tastatura digitala dad opensource e las datas da pledarigrond.ch, bia auter vai jeu buca fatg», raquenta igl um da Dardin. Empau sustegn hagi el era survegniu dalla Lia Rumantscha che ha mess a disposiziun aunc dapli datas d’in corpus da gasettas.

Il sulet «problem» dalla nova purschida: la app funcziunescha mo sin telefonins che van cun Android. Quei ei il bia handys da tut las marcas (Samsung, Sony, Motorola, Nokia etc.). Sin il sistem IOS dad Apple va il program denton buc. E cunquei che circa 60 % dils Svizzers han Iphones, seigi quei buc ideal. «Cun projects dad opensource eis ei adina empau grev cun quels dil concern dad Apple, els fan buca gest sempel ei per da quellas iniziativas», declara Martin Huber.

«La gronda lavur han auters giu»

«ClaviRom funcziunescha offline e rimna neginas datas, pia ei il schurmetg da datas garantius cumpletamein», di Martin Huber, e vinavon: «Igl ei bi da veser ch’ei funcziunescha. Ed igl ei era propi pratic, cunquei che ins scriva gie savens via Whatsapp, va aber lu buc aunc extra silla pagina dad in dicziunari per mirar suenter co che ins scriva in plaid.» Il program va denton era sin autras apps da scriver messadis, buca mo sin Whatsapp.

«La fin finala eis ei buca stau ina gronda caussa», ei seigi mo stau da nezegiar quei ch’era schon d’entuorn. «La gronda lavur han quels giu che han scret ils vocabularis», di Martin Huber. Grondas ambiziuns cun il program ha igl um da Dardin buc: «Sch’enzatgi ha plascher vi da quei, lu fa quei era plascher a mi, quei tonscha schon.»

Il program ClaviRom san ins cargar giu sin Google Play (play.google.com), semplamein endatar „ClaviRom“ – u cun simplamein cliccar cheu sil link!