La Buteia sin buna veia

«Nus essan fitg cuntents. Nus vain gì ina bun’entschatta è quai sur nossas aspectativas», declera Gian Sonder, il president da la gruppa inizianta Societad Cooperativa Pro Salouf sin dumonda da la FMR. Ils da Salouf han dapi il december 2025 puspè ina nova butia da vitg per far cumissiuns, La Buteia.

Questa stizun sa chatta en las localitads da la veglia butia da vitg – il Prima che ha serrà sias portas la fin dad october da l’onn passà – dentant cun tut in auter concept. Ella è numnadamain averta durant 24 uras e quai set dis l’emna.

«Ina scua nova scua bain»

Ch’ins era senza dubi in zic sceptic a l’entschatta, manegia Gian Sonder plinavant. Quai surtut resguardond las cifras da svieuta plitost modestas dal Prima. Suenter in bun mez on che la butia ha uss avert sias portas, pon ins dentant gia dir che tut las fadias hajan valì la paina. «Ina scua nova scua bain. Blers èn vegnids a guardar, er intginas persunas scepticas areguard il nov sistem ed han sa laschadas persvader silsuenter. Dentant propi far bilantscha pon ins pir suenter dus u trais onns.»

Davart svieuta ed auters detagls da gestiun da l’emprim mez onn renviescha Gian Sonder a la proxima radunanza generala da la societad. Il president agiunscha dentant che sper la basa da clientella fidaivla ch’il Prima aveva gia avant, haja La Buteia carmalà ina massa nova clientella ils ultims mais. Sco per exempel giasts da vacanzas e segundindigens e perfin singulas persunas dad auters vitgs.

Success, dentant era dapli lavur

Betg mo las uras d’avertura sajan tenor Gian Sonder il motiv per il success, mabain era la purschida da products. «Cunquai che nus n’avain betg ina schelta fixa da products – sco quai ch’igl è il cas tar in grossist – avain nus pudì engrondir nossa purschida cun products biologics e products regiunals. E quai è insatge fitg dumandà.»

I dat dentant er in’autra vart da la medaglia. La flexibilitad da betg esser dependent da products fixs sco in grossist porta cun sai era dapli lavur. Numnadamain dapli coordinaziun tar las empustaziuns cun tut ils furniturs. En il cas da La Buteia è quai ina deschina da differents furniturs. «Da quai n’eran nus a l’entschatta anc betg uschè conscients», constatescha Gian Sonder ed accentuescha: «Da l’auter man marschi uschè bain che questa lavur supplementara cunvegn.»

Ins haja perfin stuì augmentar ils pensums da lavur. Avevan ins entschet cun pliras plazzas parzialas en l’equivalent dad 80 %, porscha La Buteia danovamain ina plazza cumplaina.

Plans per l’avegnir

Cun tut il success dovria dentant er anc adina la prontadad da prestar blera lavur voluntara, concluda Gian Sonder engraziond a tut las persunas involvidas e rendend attent a duas chaussas anc en planisaziun per l’avegnir. Per ina, ina meglieraziun dal sistem d’empustaziun cun in’eventuala collavuraziun cun autras butias sumegliantas en il conturn. Quai cun la speranza da pudair profitar communablamain da meglras cundiziuns d’acquistar e furnir products en l’avegnir.

E da l’auter man survegn era l’edifizi in update. Quai sin tet e cun in project solar che duai vegnir realisà anc in avust. Uschia che La Buteia a Salouf para en vista a l’avegnir dad esser sin buna veia.