Paris è simplamaintg Paris

Ena part essenziala dalla stad culturala 2026 d’Origen è deditgeida agl solt. Igl è gio la 13avla ediziun digl festival da solt ed er actualmaintg èn da vaseir tar Origen saltunzs e saltunzas dallas miglras operas e tgesas da ballet digl mond. Igls coreografs e las coreografas ò Giovanni Netzer, igl intendant digl pi grond festival cultural digl Grischun betg d’anvidar, na els ed ellas s’annunztgan per esser ena part digl festival da solt. Ena raschung da chel grond interess davart digls coreografs e dallas coreografas è tgi igls lis noua tgi igls ballets vignan preschentos èn singulars e sa laschan ansomma betg cumparagler cun las grondas tribunas dallas tgesas d’operas scu Amsterdam, Moscau, Londra e Paris. Las surfatschas da tribuna digl casti da Riom, dalla Clavadeira a Riom e dalla Remisa agls Mulegns cunfineschan directamaintg cun las retschas d’aspectatours e pussibiliteschan ena gronda vischinanza tigls saltunzs e tar las saltunzas. Per coreografs e coreografas e per saltunzs e saltunzas ena schanza sfidonta per etablir da nov igl dialog cugl public. Ultra da chegl lascha Giovanni Netzer libertad cumpletta chegl tgi pertotga lour expressiun artistica, la schelta da saltunzs e saltunzas ed er dalla musica. Chesta stad cumpeglia igl program da solt gist otg premaudiziuns ed egna da chellas ò gia li l’emda passada cugl ballet «Dido ed Aeneas».

Amprems saltunzsed ampremas saltunzas

Per la coreografia digl ballet «Dido ed Aeneas» è sto responsabel Sébastien Bertaud tgi dereiva digl «Ballet de l’Opéra de Paris». Igls ensembles da solt da chella tgesa d’opera èn ancunaschaints per lour agen stil, per lour eleganza, per ena tenuta guliva e schizont loscha. A Sébastien Bertaud è reuschia cugls dus saltunzs Pablo Legasa e Marius Rubio e las dus saltunzas Adèle Belem e Silvia Saint-Martin da rachintar l’istorgia d’amour da «Dido ed Aeneas» angal cun solt, sottamess dalla musica e digl cant dalla madema opera messa an notas da Henry Purcell. Igls dus saltunzs e las dus saltunzas totgan tigl Ballet dall’opera da Paris tigls schinumnos «premiers danseurs», vot deir tgi els ed ellas èn tar ena producziun da ballet er solists e solistas.

En maletg cumplessiv e saro

Agls dus saltunzs Pablo Legasa e Marius Rubio e las dus saltunzas Adèle Belem e Silvia Saint-Martin è reuschia a Riom da persvader cun ena precisiun tecnica, cun en’expressiun artistica e betg igl davos er cun ena tgapientscha musicala fitg profonda. Alla gleisch è neida durant igl antier ballet da stgers 60 minutas la controlla digl corp sainza macla, la credibladad emoziunala ed alloura er la coreografia armonica e sincronica. L’invista dalla prestaziun maximala corporala e da bleras parts digl corp è adegna puspe sa verifitgeida. Posiziuns precisas, stortas e sagls tot ò paria controllo, sieir ed equiliber. L’eleganza, la fegnezza e l’armuneia digl ensemble on creo en maletg cumplessiv e saro. Mintga muvimaint è er curria an accord exact cugl ritmus e la melodia dalla grondiousa musica e digl cant magnific. Do on igls dus performants e las dus performantas er blera veta ed irradiaziun ed uscheia laschea davantar igl ballet tar ena veira aventura da solt, solt scu angal igl Ballet dall’opera da Paris preschainta, detg oter Paris è simplamaintg Paris, schi er a Riom.