«Sün ün oter nivel da qualità co il rest dal muond»

Sülla maisa da büro da Hansruedi Ammann a Müstair es üna s-charpa da snowboard gelgua da sulai. Id es ün uschedit hartboot «Mountain Slope Point.951» cun stizis d’adöver visibels. Id es sia aigna s-charpa.

Cha quella nun es illa gardaroba pro la seguonda s-charpa, dimpersè i’l büro da Hansruedi Ammann, nun es però üna casualità. L’impressari ed impiegà da la Pulizia chantunala dal Grischun, chi ha bod 50 ons, faiva plü bod svess sco activ cuorsas da snowboard sül plü ot nivel, testescha seis prodots il plü gugent e per regla güsta svess e chatta eir davo desch ons temp da svilup e producziun amo adüna detagls chi’s laschan amegldrar ed optimar. «Nossa furtüna es cha da Müstair davent eschna praticamaing dürant tuot on svelt sün vadrets, ingio cha nus pudain testar nos material», uschea Hansruedi Ammann.

Lapro es il bilantsch fingià hoz sainza congual: Sainza excepziun han tuot las vendschadras e tuot ils vendschaders da las cullas da cristal illa coppa mundiala alpina FIS da snowboard 2024/25 gnü aint las s-charpas müravgliusas gelguas. Ed eir 17 da 18 vendschaders da medaglias als champiunadis mundials 2025 a San Murezzan. Als Gös olimpics d’inviern 2022 a Peking han tschinch da ses vendschadras e vendschaders da medaglias portà gelg, quist favrer a Livigno perfin tuots ses.

La fabrica immez la fabrica

Chi chi fa üna visita a Hansruedi Ammann al domicil da la firma a Müstair – la Mountain Slope SA ha seis domicil in üna da las hallas da producziun e da deposit dal producent da fuonds LICO – nu craja a seis ögls. Invezza d’ün lö da producziun drizzà aint bain sun las maschinas da la Mountain Slope SA sparpagliadas qua e là sün duos plans sparpagliadas – ed immez tanter mantuns da palettas cun prodots da LICO.

Quia faja però dabsögn da declerar: Eir schi para cha’l lö da producziun es improvisà, è’l drizzà aint topmodern, almain quai chi reguarda il parc da maschinas. E schabain chi giaschan sül fuond s-chaclas da s-charpas cun nouvs hartboots, prototips o s-charpas dublas düras gelguas chi nu vegnan plü dovradas, nu vegnan prodottas be s-charpas, dimpersè daspö la stà passada eir snowboards alpins d’ota qualità da l’aigna marca «MACK».

Per Hansruedi Ammann es la producziun dad assas üna consequenza logica dal success internaziunal cun sia s-charpa da snowboard gelgua. Quellas vegnan bainschi sviluppadas, concepidas e distribuidas a Müstair, ma fabrichadas a Treviso in Italia in üna fabrica specialisada our da materials retrats per gronda part da la regiun. Il plastic gelg da grilamid® chi dà fermezza, fuorma e culur als hartboots deriva per exaimpel dal svilup da prodots da la Ems Chemie grischuna.

Trendsetter cun s-charpas da juniors

Tenor Hansruedi Ammann consista ün pêr da seis model da s-charpas da bundant 200 tocs singuls e var la mità es da materials deriva da la Svizra. «A la s-charpa vain ella però in Italia.» A Müstair lavuran ses persunas, «in tuot sun però partecipats ün pêr tschient persunas a la producziun da s-charpas.»

Il model «Point.951» daja in tschinch grondezzas e quatter differentas dürezzas adattadas al sistem classic da s-charpas da skis. Quai simplifichescha impustüt i’ls lös da vendita la cussagliaziun e la vendita. «Nus d’eiran ils prüms chi han prodot eir s-charpas da juniors e vain uossa schlargià quai eir süllas assas.» Adonta da la concurrenza sül marchà es Hansruedi Ammann persvas cha sia firma es ün pass ouravant als concurrents. «Nus eschan a la testa in divers reguards, vain grond success cun quai e prodüain sül nivel da material da cuorsa e sün ün oter nivel da qualità co il rest dal muond», disch el cun sgürezza da sai svess. Cha quai es uschea cumprouva ün pitschen scharnier lateral vi da la s-charpa da paca apparentscha. Id es ün agen svilup ed ün factur clav da la s-charpa d’or chi permetta megldras regulaziuns vi da la s-charpa e chi schanaja las lisüras. Adonta da la protecziun da patentas ha quella part fingià chattà imitaders i’l sport da skis d’elita. Amo predominescha pro el il plaschair e la satisfacziun sur l’ütilità recugnuschüda da la lisüra, disch Hansruedi Ammann cun superbgia.

Fingià da giuvenil ün’affinità per materials

Hansruedi Ammann lavura in ün pensum dad 80 % pro la Pulizia chantunala dal Grischun e disch cha sia affinità per materials, detagls tecnics e s-charpas as basa sün seis temp da giuventüna e sias scolaziuns. Pelvaira d’eira’l da chattar fingià sco teenager suvent ill’ufficina da seis vaschin, ün chalger renomnà, al qual el pudaiva eir adüna darcheu ir a güdar. Plü tard ha’l imprais mecaniker d’autos, lura chattà svess l’entusiassem dad ir cul snowboard, fat sport da cuorsa e pudü testar là ed eir sco specialist da muntogna pro l’armada adüna darcheu bler material. El viva cun sia duonna e’ls trais uffants daspö il 2012 a Sta. Maria e disch ch’el saja ün, «chi scriva svess eir amo plans da business.» Natüralmaing cha la Mountain Slope SA ha cumanzà avant desch ons sün basa d’ün tal.

S-charpa gelgua, assa naira

Uschè svelt e bain sco cha la s-charpa düra gelgua «Mountain Slope Point.951» es dvantada la marca da success, s’ha etablida i’l sport d’elita e sül marchà e contribuischa a l’identificaziun culla pitschna firma jaura, uschè dess quai capitar tenor la voluntà da Hansruedi Ammann eir cull’aigna marca da snowboard «MACK».

Quai ans maina inavo i’l lö da producziun a Müstair, ingio chi vegnan pel mumaint e daspö la stà passada prodots ses differents models in lavur a man ed in fabricaziun individuala. Duos ulteriurs models dessan amo seguir, implü eir softboards. Las assas sun consciaintamaing tgnüdas in nair neutral nöbel cun logo in custabs gronds albs. Chi chi guarda però bain la fuorma, la fuormaziun da las cantas e la structura da la surfatscha, vezza subit il prodot da qualità. «Il möd da fabrichar es in princip il listess sco pro skis», disch Hansruedi Ammann, «nus fabrichain nossas assas però sco skis da cuorsa ed eschan cun quai fin uossa ils unics.» Eir quia haja el svess zambrià bler vi dal material, testà quel a fuond e laschà integrar bler savair ed experienza da plü bod. Per demonstrar quai trametta’l ün’assa duos jadas tras la maschina da glimar cantas topmoderna, allontanescha a la fin da la procedura l’aua da sfradantar d’avanz davent da la surfatscha cun ün süaintavaiders, struscha l’assa cun üna taila fin ch’ella es sütta e tilla tira in seguit amo sur la maschina da tschaira. Lapro agiundscha’l: «Nus eschan landervia dad automatisar pass per pass il parc da maschinas.»

Eir ün agen indriz da masüraziun es in construcziun, cul qual el e seis team pon examinar in avegnir precis quant düras e flexiblas cha las assas sun. «Quai es important per la reproducibilità da las assas in qualità constanta. Ma i douvra tuots duos, tests sün naiv e valurs fidadas dal labor.» Ch’eir las assas «MACK» sun bunas per plazzas da podest, han tests zoppats fingià muossà. «Nus vain eir fingià guadagnà üna medaglia da la coppa mundiala», disch Hansruedi Ammann cun ün surrier da furbazs.

Tuot tenor seis motto – pro nus capita tuot pass per pass – manca aint il construct dal plan da business davo s-charpas ed assas be amo la liadüra adattada. E cler, eir quia es la planisaziun fingià daspö lönch lantschada e’l svilup inizià.