Avant 30 onns è lippo «Fred»

Igl 1996 tutgiva er Savognin tar egn da chels lis digl Grischun noua tgi igl circus Nock sa preschentava adegna l’amprema emda d’avost agl public. Gnond da Son Murezza on artistas ed artists cun tot la suita piglia per varsaquants deis cutier a Savognin ainten lour rullottas. Montada è er neida la tenda e chegl segl parcadi dalla soptgera da Savognin a Tigignas.

Directour digl circus era igl 1996 Franz Nock, tg’ò chel onn festivo igls 7 d’avost a Savognin igl sies 60avel anniversari. Dumang venderde vign el digl reminent 90 onns. A Savognin on alloura blers giasts ed oters anvidos er festivo igl anniversari radond digl giubilar. Scu tg’è alloura sa musso ena festa d’anniversari cun ena surpresa nunspitgeida.

Prest en meis aint igl liber

La madema seira cura tgi tots eran an luna da festa ainten la tenda digl circus nizegia igl mastgel digl pêr da kengurus pitschens «Fred» en mument da negligientscha generala digl persunal per lippar e tschartger la libertad. Bagnspert ins ò bagn constato la sia fugia, pero betg dramatiso la tgossa essend tgi igl kenguru era lippo anc ple, ma adegna turno bagnspert aint igl sies stavel tar l’ameia «Eva». Chest’eda pero è «Fred» betg turno e totta tschertga e tot clamar on nizigia navot. Igl kenguru è sto sparia ed igl circus Nock ò cuntinuo igl viadi tras igl Grischun ed er tras igl Tessin sainza «Fred».

Aint igl frataimp è «Fred» alloura davanto en veir star ed en animalet tg’ò caschuno an Svizra per lengias grassas an spezial tar las gasettas da boulevard, ma er tar las otras. Ma igl kenguru s’ampipava da tot chegl tgi vign scretg e discurria dad el ed ò simplamaintg galdia la sia libertad e chegl prest per en meis.

RTL ed er SRF eran permanent preschaints

Er l’amprova da carmalar «Fred» anavos cun lascher «Eva» aint igl liber a Savognin ò purto nign success e schi igl kenguru fiss forsa lippo aposta perveia dad ella, alloura fiss bagn sto chel ager cumplet sbaglea. Tge relaziun tgi «Fred» veva da lez taimp cun «Eva» era nign tgi saveva ed igl pi tgunsch mianc el sez. Pi tard an mintga cass ò igl pêr kenguru gia en pitschen e battagea ins ò chel «Grischa» e padregn è sto da lez taimp nign oter tgi Guido Camous, igl anteriour pulicist da vischnanca da Savognin. El è avant 30 onns er sto chel tgi ò piglia ancunter tot las indicaziuns da giasts ed indigens tgi cartevan dad aveir via «Fred» er schi constava igl ple betg.

Guido Camous sa regorda er bagn agl interess dallas medias e dei tgi per en meis seia el sto igl ple angal agl telefon per dar infurmaziuns sur digl kenguru sparia. Teams da televisiun scu per exaimpel er RTL e naturalmaintg SRF eran ple u manc mintga de preschaints per gio esser igls amprems per filmar igl animalet sparia. Via ins veva igl kenguru ainten las tgaglias tranter Riom e Savognin, aint igl manevel dalla soptgera da Savognin a Tigignas. Lò è alloura er reuschia igls 4 da settember 1996 da durmantar «Fred» e per chella acziun è sto responsabel avant treis decennis Batist Bischoff, tgi era da lez taimp guradiaselvaschigna. Tgappo igl kenguru ins ò pacs deis avant tgi la tgatscha ò scumanzo, per bung cletg!