Dus dis d’engaschament cumplein

La Lumnezia ei reha da bunas sportistas e buns sportists, era sil sectur da bike. Forsa ha quei era da far enzatgei cul Bike Maraton Lumnezia che vegn organisaus dapi varga 30 onns ella val. Uonn ha quel liug per la 35avla ga e per la tiarza ga vegn el cumbinaus cun ina cuorsa campestra. La cuorsa campestra ha liug sonda, ils 8 d’uost 2026 – il Bike Maraton Lumnezia dumengia, ils 9 d’uost 2026.

Dil bab tiel fegl

Che las Lumnezianas ed ils Lumnezians san buca mo far sport, mobein era organisar gronds arranschaments ei medemamein enconuschent. Ins patratgi per exempel vid igl Open Air Lumnezia. Sco tiegl Open Air basegna ei era tiel Bike Maraton e la cuorsa campestra in tschuppel persunas voluntarias che segida avon, duront e suenter las cuorsas. «Tut en tut ein varga 100 persunas engaschadas en ina fuorma ni l’autra», di il president dil comité d’organisaziun Tino Solèr (39) e precisescha: «Fetg biaras e biars ein dall’Uniun sportiva Lumbrein, l’organisatura ufficiala dallas cuorsas. Mo lu era persunas d’autras uniuns, amitgas, amitgs e collegas da nus organisaturs.» Tino Solèr ha surpriu il post da president avon quater onns. El cuntinuescha la lavur prestada ils varga treis decennis, denter auter da siu bab Toni Solèr che haveva fundau il Bike Maraton Lumnezia ensemen cun Hans Derungs. Dapi 2022 vegn Tino Solèr sustenius ell’organisaziun da Sebastian Solèr, Norbert Capaul, Larissa Albin, Gabriel Derungs, Beat Solèr e Rafael Cabalzar, sco era d’Ignaz Arpagaus ch’era gia avon el comité d’organisaziun.

Fin d’jamna cun duas cuorsas

Avon dus onns ha il comité d’organisaziun purschiu per l’emprema ga ina cuorsa campestra la fin d’jamna dil Bike Maraton Lumnezia. «Quella cuorsa campestra munta buc il dubel lavur. Ei dat dapli lavur, mo nus savein nezegiar bia infrastructura per omisduas concurrenzas. La differenza essenziala ei che biars voluntaris ein engaschai dus e buca mo in di», di Tino Solèr. Igl onn vargau ein rodund 370 ciclistas, ciclists, curridras ni curriders – giuvens e vegls – separticipai allas duas cuorsas. Era uonn quentan las organisaturas ed ils organisaturs cun in semegliont diember. «Tiel Bike Maraton havein nus giu ils davos onns ina leva digren, igl onn vargau perencunter puspei dapli participonts. Apparentamein haveva Swiss Cycling nezegiau la cuorsa per porscher als concurrents d’elita la pusseivladad da rimnar puncts per las selecziuns», di Tino Solèr. 160 ein stai rangai igl onn vargau alla cuorsa da bike, strusch 70 alla cuorsa campestra, leutier ils affons en lur categorias.

Differentas categorias

Per omisduas cuorsas – la campestra sco quella da bike – san interessentas ed interessents s’annunziar mintgamai entochen il di avon da miezdi. «Igl ei era pusseivel da s’annunziar aunc la damaun avon la partenza, mo lu cun in daner supplementar», di Tino Solèr. «La tendenza dils davos onns muossa che biaras e biars sedecidan per ina participaziun a fetg cuorta vesta», constatescha il Lumnezian ch’ei staus sez in ciclist da muntogna passiunau da giuven.

Andrin Beeli tegn il record

«Alla partenza uonn ein segiramein Andrin Beeli, Timo Rüegg e Benj Inauen», di Tino Solèr. Cun in temps dad 1.55,11 tegn Andrin Beeli il record dil Bike Maraton Lumnezia. Quel ha el contonschiu igl onn vargau. La cuorsa campestra Staviala Vedra meina sur la distanza da 6,1 km cun ina differenza d’altezia da 600 meters. El Bike Maraton Lumnezian han las ciclistas ed ils ciclists da surmuntar ina distanza da 38,2 km ed ina differenza d’altezia da 1850 meters. Il comité d’organisaziun porscha differentas categorias, sco era concurrenzas da bike e cuorer per affons. Sco Tino Solèr di, dat ei uonn dapli categorias per affons e carschi tier la cuorsa campestra.