Recurs blochescha igl project Surveglias

«Atgnamaintg fiss tot pront, ma en recurs blochescha deplorablamaintg igl project», dei Donat Simeon, igl president dalla societad d’abitadi Lantsch. Cun «igl project» è managea la surbiageida planisada sen la parcella «Surveglias» a Lantsch. Circa 22,5 milliuns francs costs, quatter tgesas da ples famiglias, spazi d’abitar per 60 persungas – e chegl per tschains da fit paiabels (varda box).

Nov milliuns francs digl mang public

La «Societad d’abitadi Lantsch» è ena societad tgi vot cumbatter ena problematica an vischnanca: Mengia pacas abitaziuns per indigenas ed indigens. «Igl squitsch a Lantsch è grond», conferma Donat Simeon.

Igl mars 2026 veva igl cumegn da Lantsch/Lenz approvo all’urna cun gronda maioritad igl sustign finanzial supplementar da 3,4 milliuns francs per igl project «Surveglias» dalla societad da nonprofit.

Ed er schiglio veigl or bagn cun la finanziaziun digl project d’abitaziuns paiablas, dei Donat Simeon. «Nous vagn anc davos discurs cun las bancas, ma i vei or fitg bagn.» Igl concept da finanziaziun seia er nia approvo dalla Confederaziun, uscheia tgi er igl sustign digl mang public è garantia. Tot an tot sa tractigl damai da 9 milliuns francs tg’igl mang public ò impundia per «Surveglias». La fegn d’avost 2026 vess igl project pudia neir iniziia per esser fitto alla fegn digl 2028. Vess.

Agl recurrent disturba  la canera

Actualmaintg dattigl numnadamaintg anc opposiziun dad ena persunga privata cunter la lubientscha da biagier. Igl recurs è actualmaintg pendent tar la Dertgira superioura digl cantun Grischun. Igl nom digl recurrent n’è betg sto d’erueir dalla redacziun, tenor indicaziuns da Donat Simeon na seia la persunga betg indigena da Lantsch.

«Scu chegl tgi nous vagn intervignia ainten la correspondenza cun igl recurrent na sa drezza igl sies recurs betg principalmaintg cunter igl project, mabagn cunter la situaziun da canera dalla veia principala», daclera Donat Simeon. «Igl recurrent sa disturba cunzont, tgi la suprastanza da Lantsch n’è betg cuntainta cun igl ager digl Cantun e dalla Dertgira superioura», daclera el venavant.

Per recapitular: Igl Cantun vot atgnamaintg introdueir tempo 30 tras la vischnanca da Lantsch. Las misiraziuns vegian musso tgi las limitas da canera vignan surpassadas an ples lis, rapporta RTR siva dalla decisiun dalla Dertgira superioura igl mars 2026. Ma igl cumegn ò tratg anavant igl cass davant igl Tribunal federal. E lò è igl cass anc pendent.

Dupêra calzers

«Nous vagn dantant declaro ples gedas ad el tgi nous dalla societad d’abitadi Lantsch na vagn da far navot cun chella dumonda digl tempo 30. Chegl è ena dumonda digl cumegn politic, noua tgi nous na vagn nigna influenza. A nous vogl propi sulettamaintg per igl spazi d’abitar a Surveglias. E nous tignagn er aint tot las prescripziuns da canera tg’èn dumandadas.»

Chels argumaints da Donat Simeon, tgi sei dupêra calzers, na paran pero betg da persvader igl recurrent. La dumonda è ossa angal, scu tg’igls derscheders grischuns giuditgeschan igl cass.

Recurs metta an prievel igl project

Per igl team da project è la situaziun «fitg irritonta e frustronta», dei Donat Simeon. «Nous savagn sulettamaintg sperar, tgi la Dertgira superioura decidia bagn dalunga da betg antrar aint igl recurs – u tg’igl recurrent sa reteira da sasez», daclera el.

La pressiun sen la fiera d’immobiglias da Lantsch resta dantant ota: «La gliout spetga tgi vigna finalmaintg biagia spazi d’abitar paiabel, ma chel recurs metta an prievel tot», uscheia Donat Simeon.