Nouvs suns e tuns made in Sent

«Eu sun schon ün zich agitada. Però, m’allegr uossa sül nouv chapitel in mia vita», manaja la giuvnotta da 16 ons, Arina Nuotclà da Sent, da quai riond e plain aspettativas pel avegnir. Fich intensiv e particular ha ella nempe passantà las ultimas eivnas e dis, culla finischun da la scoula ed uossa cul cumanzamaint dal giarsunadi – quai sco cuaffösa in Engiadin’Ota. E sco «Ari», culla publicaziun da sia prüma single, registrada i’l White Production Studio a Sent pro’l producent da musica Mischa Weiss chi sustegna cun seis studio ad artistas ed artists indigens.

Influenzada dad Eilish ed Eminem

«We Were Almost There» uschea as nomna la prüma chanzun da la giuvna chantautura engiadinaisa. Üna chanzun da pop chi’s tratta d’üna amur na sviluppada, uschè sco miss avant – per part autobiografica e per part cumpuonüda our da la fantasia.

Cha’l chantar ed impustüt il cumpuoner tilla detta simplamaing üna libertà particulara, oter co cha quai saja il cas illa lingua discurrüda da minchadi, declera Arina Nuotclà tuottafat inchantada dal fat ch’ella ha pudü publichar si’agna chanzun. «Eu sun fich superbgia. Forsa n’haja success, forsa nüglia. Per mai esa simplamaing important cha mia musica nu gnia be tadlada, perquai ch’inchün cugnuoscha forsa a mai persunalmaing, dimpersè impustüt perquai ch’ella plascha.»

Eir sch’Arina Nuotclà es gnüda influenzada – ouravant tuot da plü bod – da blera musica indigena rumantscha, scriva e chanta ella actualmaing il plü gugent per inglais. E plü internaziunala es intant eir dvantada la musica ch’ella ama e taidla hozindi, tanter oter da Billie Eilish, Sia, Metallica o lura perfin Eminem, sco cha seis t-shirt nair tradischa. Ch’ella nu’s lascha insomma na metter in ün chaschuot, accentuescha Arina Nuotclà plünavant, ne quai chi pertocca la musica ch’ella taidla ne si’agna.

Musica i’l sang

Musica significha tuot per Arina Nuotclà. Chi chi cugnuoscha nempe a la giuvnotta, tilla cugnuoscha insè obain chantond, fond o tadlond musica. Ella suna duos instrumaints – la flöta a travers ed il clavazin – e chanta cun gronda paschiun daspö ch’ella es ot ons. La musica ed impustüt il far musica significha tuot per la chantautura giuvna chi’d es creschüda sü in üna famiglia ourdvart musicala.

«In mia famiglia fan tuots musica. Saja quai chant o sunar, minchün fa alch. E quai fin pro mia nona e meis bazegner da tuottas duos varts», declera Arina Nuotclà chi’d es dal rest la nezza da seguond grà da Paulin Nuotclà barmör. Ch’eir sch’ella nun haja gnü da chefar bler cun el persunalmaing, haja ella impustüt imprais quant important chi saja d’avair ün agen maniamaint cun far musica, agiundschond cun resolutezza: «Quai less eir eu!».

Tanter giarsunadi e carriera da musica

Il prüm però haja nom per Arina Nuotclà – sper far musica cun profuondità e maniamaint – absolver il giarsunadi. Cha sch’ella saja plü agitada da cumanzar il giarsunadi sco quai ch’ella saja statta pro la publicaziun da sia single, respuonda la chantautura giuvna sainza stuvair ponderar lönch:

«La musica es alch ch’eu cugnuosch fingià daspö ons e perquai nu müda la single meis minchadi uschè ferm co’l giarsunadi.» Cha dürant ils prossems ons haja sgüra eir il giarsunadi üna gronda priorità e chi saja da chattar ün bun equiliber tanter la lavur e la musica, manaja Arina Nuotclà conclüdond e disch: «Il manster nu das-cha però consümar tuot il temp liber.»

La musica resta dimena ün grond focus da la giuvna Sentinra e chantautura Arina Nuotclà, alias «Ari» ed alch ch’ella less perseguitar a tuotta via eir i’l avegnir. «Eu n’ha planisà da stübgiar musica üna jada. Forsa cha quai as müda però eir amo, ma sgüra ch’eu scriv inavant chanzuns.» Quai cul böt da na be pudair publichar bainbod üna prosma single, dimpersè ünsacura lura seis prüm album.