L’architectura è igl mies plan A

Antschet ò tot gio cura tg’ia va gia set onns. La nossa famiglia abitava da lez taimp anc a Lantsch ed igls mies genitours eran ve da planisar la noss’abitaziun nova a Savognin. Ia ma regord anc fitg bagn scu tgi bab e mamma tschantavan ve da meisa an steiva e stibgivan scu planisar la noss’abitaziun. Ainten l’abitaziun a Lantsch vaia partia la tgombra cun mia sora pitschna. Ia sung stada cuntainta cura tg’ia va savia, tg’ia vegia a Savognin ena tgombra per me suletta.

Mamma ò alloura declaro scu tgi chels plans vignan dessignias: igls simbols per ischs e fanestras e scu tg’ins dessegna la mobiglia cun la vista or dall’aria. E siva vaia pudia dessignier mezza scu tg’ia va lia andrizzar la mia tgombra cun letg e stgaffa e tot igls mies tarmagls.

Durant igls onns da scola a Savognin è dessegn adegna sto igl mies rom preferia. Ia va malagea adegna, schizont sen figls d’oters roms da scola tgi vessan gia da restar sobers. Cura tg’ia va gia nov onns ò mia mamma cumpro en Ipad. Sen chel vagn mia sora ed ia pudia carger se dus u treis gis. Tranter «Tempel run» e «Fruit Ninja» vaia spert er installo igl gi «HomeDesign». Tottanegna è sto per me igl pi cool da deir a mia sora Simona tgi ella vegia dad esser la patrunga da construcziun e vegia declarar scu tgi ella vess gugent la sia tgesa, ed ia va fatg alloura igls plans. Ia sa betg quantas gedas tgi ella ò gia absolutamaintg nign gost da giuier chella rolla, pero igl è adegna reuschia da surpledar ella d’am dar ena nov’incumbensa da construcziun.

Chella fascinaziun da pudeir crear bietgs am ò accumpagnea siva da chegl tg’ia sa ma regurdar. Ed uscheia fògl betg surstar tg’ia va antschet ossa a stibgier architectura. Avant tg’ia va scumanzo igl studi vaia fatg, siva la matura, en practicum tar en architect. Ia va lia esser sieira tgi chel mastier am plaia ainten la practica er schi bagn scu an teoria. An chel onn tg’ia va luvro aint igl biro d’architectura vaia pudia rimnar bleras bungas experientschas. Chellas am geidan fitg per igl mies studi.

Ia va tscharnia l’Universitad da Liechtenstein per la mia scolaziun, chegl or digl simpel muteiv tg’ia va gia nign gost da stueir abitar a Turitg. L’universitad a Vaduz è an relaziun cun otras universitads extrem pitschna, ed oter tgi architectura porscha l’universitad angal anc igl studi da bachelor an scienza d’economia da menaschi. Masters ins so stibgier quatter differents. Ossa sunga pero pir aint igl amprem semester digl bachelor, chegl vot deir tg’ia sa betg anc rachintar schi bler davart igl mies studi.

Ma chegl tg’ia sa deir è, tgi chel studi am plai fitg fitg bagn, er sch’igl è mecta strantg cun tot chels projects tg’ins ò da dar giu. Dantant tg’ia screiv igl text preschaint, vaia vacanzas per amprender. Cunchegl tg’ia va da dar giu blers projects, vaia betg schi bleras clausuras scu otras studentas ed oters students dad oters studis. Ossa vaia marveglias scu tgi las clausuras vignan ad esser. Cunzont digl rom «statica» vaia respect, essend tgi la fisica n’è mai sto en rom tg’ia va gia gugent e tg’ia va tgapia.

Tuttegna vaia bunga speranza da saveir reuscheir cun success chel studi. Ia stò deir tg’ia savess er betg tge oter mastier tg’am plaschess schiglio anc. Cun oters pleds, igl studi d’architectura è igl mies plan A tg’ia vi er manar a fegn!

Annina Jenal è carscheida se a Savognin. Ella sa catta aint igl 2. semester digl bachelor ed abitescha a Sargans.