Pitost ena festa da vischnanca

Dallas occurrenzas turisticas tgi dat a Savognin u er an Surses totga la Scuntrada, eneda numnada la Fiera da Savognin, tar la pi gronda. Igls bungs onns eran dalla parteida vers 4000 persungas all’occurrenza tgi dat gio siva digl 1985. Antschet ò l’istorgia da success dalla Fiera da Savognin avant 41 onns cun esser Savognin hospitant dall’occurrenza 2000 onns Retoromania. Da lez taimp ò l’Uniun da commers e mastirants Surses, igl cumegn da Savognin cun l’Uniun da cura Savognin gia l’ideia da cumbinar la festa 2000 onns Retoromania cun ena fiera da products, artisanat e commers indigen. Per en de sarar la veia principala e far or da chella en tratg cun stands noua tgi dat da cumprar roba, tgossas ed artisanat dalla regiun scu er products dall’antiera regiun. Chegl ò alloura er funcziuno passa 20 onns. Siva da 20 onns èn adegna daples affars indigens svanias e cun els er las ustareias. Oz è uscheia tgi plessas uniuns segnan per manar dalla Scuntrada menaschis noua tgi dat damagler e dabever e fon uscheia concurrenza agls pacs ustiers tg’èn anc dalla parteida alla fiera. Er venderde passo ò ensacu mantgea l’atmosfera da fiera, cun esser ella pitost ena festa da vischnanca scu tg’ins canoscha er dad oters lis. 

Pitschen domber da stands

Per lung dalla veia naziunala è er venderde passo la purscheida da speisas e bavrondas da tot gener stada fitg vasta, persiva era igl domber digls stands da fiera pitost pitschen. La Fiera da Savognin è igls davos diesch onns s’avanzada tar en inscunter, detg tar ena Scuntrada e betg ple tar ena fiera noua tgi vign fatg venal tot chegl tgi totga tar ena dretga fiera. Da chel aveis è er igl comite d’organisaziun cun Patrick Thurner e Silvia Capeder dall’Uniun da commers e mastirants Surses, Veronica Janett dall’organisaziun turistica Anavant Surses e Madrisa Signorell da Turissem Val Surses Savognin Beiva SA. Venderde passo on igls organisatours ed expositours alloura er gia disfurtegna tgi dus temporals èn nias an en colp e siva da chels on blers visitaders e visitadras banduno la veia principala ed èn betg ple turnos vers seira. Do an îgl è er tgi igl sivamezde era l’occurrenza betg schi bagn occupada scu usito. Ensacu mantga tar la Scuntrada l’attracziun tgi carmala daple gliout a Savognin, er cun esser la Scuntrada ple u manc adegna igl madem event, en event sainza sal e pever per deir uscheia. Da plessas varts è nia detg tgi fiss da ponderar da far la Scuntrada aint igl center da Savognin a Grava, noua tgi la Tundeida ò li siva da 20 onns e chegl cun grond success. Singuls expositours on alloura er punctuo tgi dalla Tundeida ins fetscha miglers affar tgi dalla Scuntrada.

Thal scu vischnanca hospitanta

An chels quatter decennis tgi dat la Scuntrada, avant la Fiera da Savognin, è anc mai sa preschentada ena vischnanca a visitaders e visitadras dall’occurrenza. Venderde passo è chegl sto igl cass. Igl è alloura er nign misteri pertge tgi gist la vischnanca digl cantun Son Giagl Thal è stada giast a Savognin. La regiun da vacanzas da Surses e cunzont Savognin on fitg blers giasts da Thal e conturn ed an spezial giasts fitg fidevels. Blers da chels on a Savognin ena tgesa da vacanzas u en’abitaziun da vacanzas. Gist tar egn da chels totga er Hubert Müggler. El ò cun la sia famiglia siva da 35 onns en’abitaziun da vacanzas a Savognin e sa catta ple u manc scu indigen an Surses. Igl om appartigna er alla suprastanza dall’organisaziun da turissem Anavant Surses. Ultra da chegl è Hubert Müggler ed er la sia famiglia fitg angaschea scu voluntari tar occurrenzas da sport, cunzont bike, ma er simplamaintg tar event noua tg’è basigns da sustign.

Tgirar igls contacts

Cun anvidar aint Thal vegia igl comite d’organisaziun dalla Scuntrada lia porscher ensatge da nov er per tgirar igls contacts tranter Thal e Savognin, ò menziuno Hubert Müggler. Per far varsaquantas cumparaziuns tranter Thal e Savognin ins dastga deir tgi la vischnanca digl cantun Son Giagl ò passa 7000 abitantas ed abitants e Savognin stgers 1000.

Situada è la vischnanca da Thal aint igl manevel digl Lai da Constanza ed agl pe digl Buechberg. Ella cunfinescha cugl cantun Appenzell ed er cun l’Austria. Staad ed Altenrhein cugl sies eroport èn dus fracziuns digl cumegn da Thal. Igl li è er ena tipica vischnanca da viticultours. Ainten la vischinanza dalla vischnanca dattigl ena ferma industreia scu per exaimpel er la Stalder Rail SA noua tgi chels e chellas da Thal cattan er lavour. (fmr/gns)