«Il baghetg sto vegnir mantenius – aschia ni aschia»

Dapi plirs onns discussiuneschan autoritads e populaziun da Tujetsch davart il basegns d’ina sanaziun dalla casa da scola a Sedrun. Quella ei vegnida erigida 1962. Da 1996 entochen 1999 ein ils baghetgs vegni sanai en pliras etappas. La davos’investiziun ei succedida 2010. Lu ei la tecnica dalla tribuna dalla halla da gimnastica vegnida adattada.

Sanaziun urgenta

«Il baghetg dalla scola sto vegnir mantenius – aschia ni aschia. Quei mument che nus renovein el stuein nus era ademplir las pretensiuns dalla segirtad. Quei pertucca la resistenza encunter tiaratriembel ni las directivas dalla polizia da fiug. Mo lu eis ei era necessari d’adattar il baghetg als basegns da persunas cun handicap», di il president communal Martin Cavegn. Silla damonda, schebein ins hagi era risguardau ellas ponderaziuns il diember d’affons che sereducescha en vischnaunca di el: «Quei havein nus fatg, mo quei mida nuot vid la necessitad da sanar il baghetg. Quel stuein nus renovar aschia ni aschia.»

9,156 milliuns francs

Ina part dalla casa da scola a Sedrun encunter vest duei vegnir adattada aschia ch’ella sa survir era per habitaziuns ni biros sch’il basegns dil scolaresser ei buca daus. «Per quei motiv plidein nus era d’ina adattaziun dil baghetg dalla scola en fuorma d’in sistem multifuncziunal», puntuescha Martin Cavegn. Dil credit total da 9,156 milliuns francs van 4,465 milliuns sil conto dallas mesiras obligontas, vul dir l’investiziun ella segirtad.

Provisori en vesta

Davart il credit decida la radunonza communala mesjamna proxima, ils 19 d’uost 2026. Vegn quel acceptaus suonda la votaziun all’urna. Tenor Martin Cavegn havess quella liug igl emprem da november 2026. «Sch’ei dat in gie vegnan las lavurs da baghegiar instradadas probablamein la stad 2027. Duront il temps dalla sanaziun vegn il menaschi da scola menaus en in provisori. Nus essan il mument en contractivas finalas culs possessurs dil baghetg digl anteriur center d’informaziun digl AlpTransit a Sedrun. Leu sepurschess la caschun ideala d’endrizzar quei provisori», declara il president communal e manegia plinavon: «Probabel duvrassen nus quei provisori in onn ni forsa aunc pli ditg.» Pil provisori quenta la suprastonza communala cun in’expensa da 150 000 francs. Quella ei cuntenida el credit.

Da niev ina sala da cultura

Il project da sanaziun pertucca pli u meins tutta infrastructura sigl areal dalla scola a Sedrun. La gronda part dils biebein nov milliuns francs – numnadamein 3,84 milliuns francs – flessegia el baghetg principal dalla scola. Rodund 3,2 milliuns francs ein previ pil baghetg annex encunter nord e 1,34 milliuns francs per la halla da gimnastica. Quella duei vegnir transformada en ina sala da cultura. «Sin fundament dallas directivas dalla polizia da fiug astga quella vegnir occupada il mument cun sulettamein 50 persunas. Suenter la sanaziun fussen ei 300 persunas», di Martin Cavegn. Per la sanaziun dil plaz da pausa eis ei previu d’investir 350 000 francs e per la garascha per la habitaziun dil pedel 52 000 francs.

Investiziun supportabla

Sco la suprastonza communala constatescha el messadi per mauns dalla radunonza da vischnaunca da mesjamna proxima, ei l’investiziun supportabla per la vischnaunca: «Quei ei pusseivel sin fundament dils cash flows positivs dils davos onns. Ils davos tschun onns ha la vischnaunca saviu recaltgar en total cash flows (atgna finanziaziun) da rodund 13 milliuns francs.»