«Assa» a Trun

«Ti eis tut persuls sil plaz e stos mirar enzaco da vegnir a frida cugl adversari. Denteren datti dis ch’ei va super, ed auters dis va insumma nuot, quei ei il fascinont dil sport da tennis.» Pli probabel havess Ramun Venzin, il president actual dil Club da tennis Trun, aunc saviu filosofar ditg e liung davart las bialas varts dil sport cul bal mellen.

A Trun ei la febra pil tennis palpabla schon dapi 50 onns. Igl onn 1976 han 29 persunas decidiu da fundar il club, il medem temps che era Sedrun e Mustér han fundau lur clubs. Suenter entginas analisas ei il plaz adattau staus anflaus, giu sper l’Ogna datier dil Rein. «Igl ei in liug idillic cheu, quetas buc?», di Ramun Venzin. «Dalla casa dil club anora ch’ei alzada ora empau vesan ins il giug da tuttas treis plazzas, e quei ei cheu a Trun schon genial.»

Baracca – container – casa dil club

«Quei era buc adina aschia», relata il cronist e commember da honur dil club Venanzi Nay. «Emprem havevan nus propi mo ina sempla baracca sper il plaz, senz’aua currenta. Pli tard havein nus lu saviu haver in container, mo era quei era plitost sempel.»

Alla sava dil millenni lura la gronda viulta: In clavau dall’armada svizra, gest sper ils plazs, ei staus venals. «Quei ei stau per nus sco in da sis el lotto», raquenta Venanzi Nay. Per ina summa da 5000 francs ha il club da tennis acquistau il baghetg.

Ils temps entuorn ils onns 2000 ein en buna memoria a Ramun Venzin: «Cun grond engaschi, bia lavur cumina e grazia al president da lezzas uras Albert Demont ch’era da professiun meinabaghetg han commembers e commembras dil club mess en ina cuschina, fatg finiastras e lu era alzau ora empau la casa.» A medem temps seigi era il tierz plaz da sablun vegnius construius.

Oz ha Trun ina top-infrastructura, cun tut il necessari: duschas, gardarobas, avunda plaz per star da cumpignia, ina preit cun fotografias e regurdientschas e tabellas da rangaziuns et cetera. «Il sulet donn ei che la febra pil tennis ei deplorablamein empau tschessada, mo quei ei ell’entira regiun aschia», di Venanzi Nay.

Da 140 sin 95 commembers

Avon diesch onns dumbrava il club da tennis Trun aunc rodund 140 commembers, oz ei quei mo pli quei da 95 commembers. «Ils giugadurs da nossa pli giuvna equipa dad umens ein era schon entuorn 35 onns. E suenter vegn mo pauc», fa Ramun Venzin paleis. Junioras e juniors eis ei actualmein sut entuorn sis.

La suprastonza cumbatta vinavon, emprova da buc schar far in «break», tegn la dira. «Quei ei sco sil plaz, leu eis ei era da morder denteren e mirar da tener sut controlla las emoziuns, sch’ei va inaga buc aschi bein», di il president.

In’ingredienza per puspei ir per catsch: rinforzar la collaboraziun interregiunala. «Ensemen cun tschels clubs dalla Surselva Mustér, Sedrun, Tavanasa e Glion empruein nus da tgirar il contact.» La secund’ingredienza: Motivar giuvens e giuvnas cun cuors e trenaments. «Senza la giuventetgna va nuot. Schiglioc eis ei lura enzacu a fin, senza vuler malegiar memia ner», di Ramun Venzin.

Dunnas da success

Totalmein ha il club da Trun tschun equipas che giogan «interclub», la liga naziunala che dumbra totalmein 750 clubs dall’entira Svizra. Il pli grond success sportiv da 50 onns club da tennis ein las prestaziuns dallas dunnas dils davos onns. Tochen igl onn vargau han ellas dau en liga naziunala B. «Quei ei naturalmein stau genial per in pign club sco nus, absolut super!», seregorda Ramun Venzin.

Sper il success sportiv seigi era la cumpignia impurtonta – e da saver parter la pissiun per il medem hobi. Quellas e quels che han gust e peda seradunan ils davos onns mintgamai la mesjamna sera per dar empau. «Quei ei organisau via chat da Whatsapp ed ei ina buna caussa, il bia vegnan denter otg e 16 persunas», di el. Plinavon vegn era organisau turniers, mo leu mondi la participaziun plitost anavos.

Finanzialmein seigi la situaziun solida, grazia a sponsurs, biars e biaras che pagan aunc la contribuziun, schegie ch’els ein buc activs, e grazia alla sera dil lotto. Quellas entradas dil lotto seigien beinvesidas. «Leu ei lu era mintgamai bi da veser, sco tuts tilan vid il medem car e vegnan a luvrar quella sera.»

Cun cronica e fondue chinoise

La sonda vegn giubilau ella vischnaunca digl Ischi – a caschun da 50 onns club da tennis. Sco emprem vegn aunc giugau a tennis – ils finals dil turnier dil club – e silsuenter dat ei in pign apero. «La sera vegn surviu in fondue chinoise per las rodund 70 persunas envidadas ella sala da cultura», aschia Ramun Venzin. In dils puncts culminonts vegn la presentaziun dalla nova cronica dil club ad esser, in cudisch da 120 paginas che Venanzi Nay a scret el decuors dil davos onn.

A Trun ein las cundiziuns per dar tennis atgnamein idealas: Las plazzas vegnan tgiradas cun premura, l’infrastructura ei buna, il liug ei idillics, las finanzas dil club solidas. Il sulet giavisch dil president actual che vegn a remetter siu uffeci igl onn vegnent: «Il pli bi fuss per mei, sch’ei dess suenter la fiasta da giubileum gest diesch novs commembers.» El lungatg da tennis schess’ins matei: Quei fuss sco in’assa el servis.