Denter tschiel e stanza da scola

Questa dumengia schai denter dus eveniments che paran dad esser totalmein differents: Sonda ei la fiasta da Nossadunna d’uost e gliendisdis entscheiva en biaras vischnauncas puspei la scola. Cheu in firau catolic solemn cun bials usits e leu turnisters da scola, novs etuis ed affons agitai. – Quels dus eveniments ein propi fetg differents, mo tenor miu manegiar han els era in tratg communabel che nus savein prender sco impuls sin via.

Il firau da Nossadunna d’uost regorda che Maria ei vegnida prida si en tschiel cun tgierp ed olma. – Per mei sco teolog eis ei buc adina sempel dad entelgir e da declarar co quella ascensiun cun tgierp ed olma funcziuna. Ed era la damonda nua che quei tschiel seigi, surpassa savens miu entelletg! – Mo tuttina less jeu buca refusar la speronza che schai en quei misteri. Formulau a moda sempla di quella speronza a nus: «Ti stos buca haver tema dalla mort e manegiar che tut seigi a fin. Tut quei che ti eis, tia existenza, tia dignitad, tia historia, tut quei vegn a restar. La mort ei ina nova entschatta e Dieus lai tei buca persuls. Hagies fidonza che tut vegni bien!»

Novas entschattas vegnan biaras gadas accumpignadas da malsegirtad. Sco scolast vesel jeu quei mintgaton all’entschatta dad in niev onn da scola. Sper l’agitaziun ed il plascher da vegnir en scola dat ei era affons che han en lur turnisters buca mo carnets ed etuis, mobein era caussas pesontas, sco per exempel la malsegirtad da vegnir en ina nova classa, la tema da far sbagls e da vegnir ris ora ni era il squetsch da satisfar als geniturs ed allas pretensiuns dils scolasts. – Cheu eis ei per mei sco scolast impurtont da far curascha als affons e da dar ad els fidonza e dir: «Ti stos buca haver tema, ti astgas far sbagls! Quei s’auda tier igl emprender, jeu sun cheu e gidel tei!»

Quels dus eveniments regordan mei ch’ei dat adina puspei muments en nossa veta nua che nus stein alla sava dad enzatgei niev. Era sche nus savein buc exact tgei che spetga nus davos quella sava, eis ei per mei enzaco calmont da saver che nus stuein buca far persuls quei pass e ch’enzatgi ei cheu e di che tut vegni bien …

En quei senn giavischel jeu a Vus tuts ina buna entschatta dil niev onn da scola ni semplamein tut il bien per quei che spetga Vus ella nova jamna.